ەكسپو-نىڭ سوڭعى كۇندەرى ورىن العان مۇنداي قاربالاستىڭ فوتوسۋرەتتەرى قازاقپاراتتا جاريالانعان بولاتىن. «كورمەنىڭ اياقتالۋىنا ءبىر كۇن قالعاندا, ياعني 9 قىركۇيەكتە ەكسپو-2017 حالىقارالىق مامانداندىرىلعان كورمەسىنە 100 514 ادام كەلدى. سالىستىرىپ قارار بولساق, كورمەنىڭ العاشقى كۇندەرى ورتا ەسەپپەن كۇنىنە 22 840 كەلۋشى تىركەلگەن ەدى», - دەپ جازدى «استانا ەكسپو-2017» ۇك» اق ءباسپاسوز قىزمەتى.
وسىلايشا, 10 ماۋسىمنان 9 قىركۇيەككە دەيىنگى ارالىقتا ەكسپو-2017 حالىقارالىق مامانداندىرىلعان كورمەسىنە 3 860 000 ادام كەلگەن.
ايتا كەتەيىك, بۇگىن ەكسپو-2017 كورمەسىنىڭ جابىلۋ سالتاناتى وتەدى. بۇل كۇنى كورمە پاۆيلوندارى تۇنگى ساعات 3:00-گە دەيىن اشىق بولادى. ءبىر عانا وزگەشەلىك, رەسمي تۇلعالاردىڭ كەلۋىنە بايلانىستى كورمە ايماعى 19.00-دەن 22.00-گە دەيىن جابىق بولادى. ال 22.00-دە وڭتۇستىك پەن باتىس جاقتاعى كىرەبەرىستەر قايتا اشىلادى. امفيتەاترداعى كونتسەرتتىك باعدارلاما 18:00-20:00 جانە 21:00-23:10 ارالىعىندا ۇيىمداستىرىلادى. ال كورمە جانىنداعى كاسسالار 08:30-18:30 جانە 22:00-00:30 ارالىعىندا ىستەيدى. مەرەكەلىك وتشاشۋ ساعات 21.15-تە بولادى.
