شاراعا ءوڭىرىمىزدىڭ اۋدان, قالالارىنداعى ىرىكتەۋ بايقاۋلارىنان سۇرىنبەي وتكەن جەتى جەڭىمپاز قاتىستى.
«ەلىمىزدە تىلدەردى دامىتۋ مەن قولدانۋدىڭ 2011-2020 جىلدارعا ارنالعان مەملەكەتتىك باعدارلاماسىن جۇزەگە اسىرۋ اياسىندا وتكىزىلىپ وتىرعان بۇل شارانىڭ ماقساتى – ءۇش ءتىلدى جەتىك مەڭگەرگەن قابىلەتتى جاستارعا قولداۋ كورسەتۋ ارقىلى مەملەكەتتىك ءتىلدىڭ مارتەبەسىن كوتەرۋ, ۇشتۇعىرلى ءتىل ساياساتىن جۇزەگە اسىرۋ. جاستار اراسىندا تىلدىك قارىم-قاتىناس مادەنيەتىن قالىپتاستىرىپ, رۋحاني بىرلىكتى نىعايتۋ», - دەيدى وبلىستىق تىلدەردى دامىتۋ باسقارماسىنىڭ ءبولىم باسشىسى ساۋلە قاليعازينا.
سايىس ءۇش كەزەڭنەن تۇردى. العاشقى «تۇساۋكەسەر» كەزەڭىندە ۇمىتكەرلەر قازاق تىلىندەگى سۇراقتارعا جاۋاپ بەردى. ەكىنشى «ۇلتتانىم» كەزەڭىندە قاتىسۋشىلار قازاق ەلىنىڭ تاريحى مەن ۇلى تۇلعالارى, ەلىمىزدىڭ ايماقتارى جونىندەگى ساۋالدارعا ورىس جانە اعىلشىن تىلدەرىندە جاۋاپ قاتىپ, ءبىلىم-بىلىكتەرىن ورتاعا سالدى. سوڭعى شەشۋشى «ونەرتانىم» كەزەڭىندە قازاق, ورىس, اعىلشىن تىلدەرىندەگى جاڭىلتپاشتاردى جاڭىلماي ءۇش رەت ايتۋدان سايىسقا ءتۇستى. جارىس قورىتىندىسى بويىنشا قازىلار القاسىنىڭ شەشىمىمەن اياگوز قالالىق قازاق مەكتەپ-ليتسەيىنىڭ پەداگوگ-پسيحولوگى ءمولدىر مۇستافينا جۇلدەلى I-ورىندى, زىريانداعى №9 ورتا مەكتەبىنىڭ اعىلشىن ءتىلى ءپانىنىڭ مۇعالىمى ابىلايحان ءالماحانوۆ II-ورىندى, ريددەردەگى ورتا مەكتەپتىڭ اعىلشىن ءتىلى ءپانىنىڭ مۇعالىمى ايسارا كەنجەباەۆا III-ورىندى يەلەنسە, سەمەي قالاسى اكىمى اپپاراتىنىڭ ۇيىمداستىرۋ-ينسپەكتورلىق جۇمىس ءبولىمىنىڭ باس مامانى ماديار بايتابانوۆ باس جۇلدەگە يە بولىپ, ءوڭىرىمىزدىڭ ء«تىل شەبەرى» اتاندى. بارلىق جەڭىمپازدار مەن سايىسكەرلەر شارانى ۇيىمداستىرۋشىلار تاراپىنان ارنايى ديپلومدارمەن, سىيلىقتارمەن ماراپاتتالدى.
ازامات قاسىم,
«ەگەمەن قازاقستان»
شىعىس قازاقستان وبلىسى.
