قالا اكىمدىگى مەن «قازتسينك» كومپانياسى بىرلەسە ۇيىمداستىرعان سايىستىڭ ءبىر ەرەكشەلىگى, قاتىسۋشىلاردىڭ جاسىنا شەكتەۋ قويىلعان جوق. ولار ءۇش توپقا (14 جاستان اسقان وقۋشىلار, ستۋدەنتتەر جانە ەرەسەكتەر) ءبولىنىپ جارىستىڭ كورىگىن قىزدىردى. شايتان اربا مىنگەن شاھار تۇرعىندارى قالانىڭ نەگىزگى كوشەلەرىمەن ءۇش اينالىم جاساپ, وزدەرىنىڭ شەبەرلىكتەرىن بايقاپ كوردى.
«مەن قالادا وتەتىن ۆەلو بايگەلەردىڭ بارلىعىنا قاتىسىپ كەلەمىن. قازىرگى ۋاقىتتا وسكەمەندە سپورت سالاسىنا ەرەكشە كوڭىل ءبولىنىپ جاتقانى قۋانتادى. بۇل جارىسقا وبلىس ورتالىعىنان بولەك ريددەر قالاسىنىڭ تۇرعىندارى دا قاتىسىپ جاتىر ەكەن. وسىنداي سپورتتىق شارالاردىڭ جيىرەك ءوتىپ تۇرعانى جاقسى», - دەيدى ۆەلوبايگەگە قاتىسۋشىلاردىڭ ءبىرى الەكسەي وۆچيننيكوۆ.
شارا سوڭىندا ۇزدىك شىققان وقۋشىلار مەن ستۋدەنتتەرگە سىيلىق رەتىندە ۇيالى تەلەفوندار مەن نوۋتبۋكتەر, ال ەرەسەكتەرگە تەلەۆيزورلار تابىس ەتىلدى.
ازامات قاسىم,
«ەگەمەن قازاقستان»
وسكەمەن
