قازاقستان پرەزيدەنتى ماگاتە-ءنىڭ تومەن بايىتىلعان ۋران بانكىنىڭ اشىلۋىنا وراي ەلىمىزگە كەلگەنى ءۇشىن يۋ.امانوعا ريزاشىلىق ءبىلدىردى.
– بۇگىنگى شارا – تومەن بايىتىلعان ۋران بانكىن قۇرۋ جونىندە كوپ جىل بويى بىرلەسە اتقارعان جۇمىسىمىزدىڭ ناتيجەسى. قازاقستان ءۇشىن بۇل وقيعانىڭ ماڭىزى زور, – دەدى مەملەكەت باسشىسى.
نۇرسۇلتان نازارباەۆ قازاقستان جاھاندىق يادرولىق قارۋعا قارسى كۇرەس قوزعالىسىنىڭ كوشباسشىسى سانالاتىنىن اتاپ ءوتتى.
– ءبىز قۇرامىندا ۋرانى مول شيكىزاتقا يە مەملەكەت رەتىندە اتوم ەنەرگياسىن بەيبىت ماقساتتا پايدالانۋعا ىقپال ەتەتىن بولامىز, – دەدى قازاقستان پرەزيدەنتى.
سونداي-اق, مەملەكەت باسشىسى ەلىمىزدىڭ اگەنتتىكپەن ىنتىماقتاستىعى جان-جاقتى جانە بەرىك ەكەنىن ايتتى.
ماگاتە-ءنىڭ باس ديرەكتورى دەلەگاتسياعا كورسەتكەن قوناقجايلىق ءۇشىن نۇرسۇلتان نازارباەۆقا العىس ءبىلدىردى.
– بۇل شارا, ەڭ الدىمەن ءسىزدىڭ جەكە قولداۋىڭىز بەن قاتىسۋىڭىزدىڭ, سونداي-اق ءبىزدىڭ جەمىستى ىنتىماقتاستىعىمىزدىڭ ارقاسىندا ىسكە اسىپ وتىر, – دەدى يۋ.امانو.
سونىمەن بىرگە, اگەنتتىكتىڭ باس ديرەكتورى تومەن بايىتىلعان ۋراندى ساقتايتىن عيمارات اشۋمەن قاتار, بۇل شيكىزاتتى ساتىپ الۋ جانە ونى تاسىمالداۋ ماسەلەلەرى دە ماڭىزدى ەكەنىن اتاپ ءوتتى.
