قىلمىستىق ءىستى قاراعان جۋىرداعى سوت وتىرىسىندا پروكۋرور راۋان بوستانوۆ ونىڭ بىلىق-شىلىقتارىن جىپكە تىزگەندەي سانامالاپ بەرىپ, 4 جىلعا باس بوستاندىعىنان ايىرۋدى سۇرادى. ايىپتالۋشى «كازدورستروي» مەردىگەرلىك كومپانياسىنىڭ پەتروپاۆل تاسجولى بويىندا شىبىق باسىن سىندىرماعان جۇمىستارىن جالعاننىڭ جالپاعىنا شىعارۋدىڭ ورنىنا كوز جۇما قاراعان. ونىڭ سوڭى قوماقتى پارا الۋمەن اياقتالعان.
كۇدىكتىنىڭ كىناسىن بىردەن مويىنداۋى سۋديانى دا, سوتقا كەلگەندەردى دە تاڭعالدىردى. سويتسە, ونىڭ استارىندا «قۋلىق» جاتقانى ادۆوكاتتىڭ سوزىنەن كەيىن بەلگىلى بولدى. قورعاۋشى دۋلات ءومىرالين ا.جانكيننىڭ قىلمىسىن تولىق مويىنداعانىن, مەملەكەتكە كەلتىرگەن شىعىنداردى تۇگەل وتەيتىنىن, تاعى باسقا دالەلدەمەلەردى العا تارتا وتىرىپ, قىلمىستىق پروتسەسسۋالدىق كودەكستىڭ 382-بابى بويىنشا ءىستى قىسقارتىلعان تارتىپپەن قاراۋ, جازانى ايىپپۇل رەتىندە تاعايىنداۋ تۋرالى ءوتىنىشىن سۋديا ايدارحان جاناقوۆ قاناعاتتاندىرىپ, زاڭسىز جولمەن قالتاعا باسپاق بولعان قاراجاتتى 60 ەسە وسىممەن – 119 ميلليون تەڭگە مولشەرىندە وتەۋگە ۇكىم شىعاردى. دۇنيە-مۇلكى تاركىلەنىپ, مەملەكەتتىك قىزمەتتەن ءومىر بويى الاستاتىلدى. اتالعان سوما ءبىر ايدىڭ ىشىندە تولەنۋى ءتيىس. بولماسا التى ايعا ءبولىپ تولەۋ ءۇشىن سوتقا ءوتىنىش ءتۇسىرۋ قۇقى بار.
ايتپاعىمىز مىناۋ: سوتتالۋشىنىڭ اعايىن-تۋىستارى ۇكىمدى دۋ قول شاپالاقپەن قارسى الىپ, سۋديانىڭ ءسوزىن ۇزۋىنە, ەسكەرتۋ جاساۋىنا تۋرا كەلدى. ولاردىڭ قۋانىشتارىنا قاراعاندا ايىپتالۋشىعا ايىپپۇلدى تولەۋ شىبىن شاققان قۇرلى اسەر ەتپەيتىن سياقتى. ونى قالاي وتەمەك دەگەن ساۋال ءتىل ۇشىنا ورالادى. جەكە ەسەبىندە ءجۇز ميلليونداعان قارجىسى بولسا, ەكى ميلليون ءۇشىن قىلمىستىق قادامعا بارۋىنا, ابىرويىن ايرانداي توگۋىنە جول بولسىن؟
سۋديانىڭ شەشىمىن جۇرتشىلىقتىڭ ارقيلى قابىلداعانى راس. «دانىككەننەن قۇنىققان جامان» دەپ اتالارىمىز بەكەر ايتپاعان. تابەتى ەشقاشان تويمايتىن, ارانى ابدەن اشىلعان لاۋازىمدى تۇلعالاردان مەملەكەت قاراجاتىنىڭ ەسەلەپ قايتارىلعانى دۇرىس-اق. الايدا, وعان قوسا جازالارىن اباقتىدا وتەۋ شارالارىن دا قاراستىرعان ءجون. اسىرەسە, حالىق مەنشىگىنە قىرعيداي تيەتىن ۇرى-قارىلارعا جازانى قاتاڭداتۋ الدەقايدا اسەرلى بولارى انىق. ايتپەسە, ايىپپۇل تولەپ, قۇتىلىپ كەتە بەرسە, ەرتەڭ باياعى «انىنە» باسپاسىنا كىم كەپىل؟ مۇندايدا جازانىڭ تيىمدىلىگى جايىندا اڭگىمە قوزعاۋدىڭ ءوزى ارتىق. جەلكىلدەپ ءوسىپ كەلە جاتقان جاس بۋىن قانداي ساباق, ءتالىم-تاربيە الماق؟ تاياقتىڭ ەكى ۇشى بارىن ەسكەرمەي بولمايدى.
وسىندايدا «ۇرى تۇرمەدە وتىرۋ كەرەك» دەگەن قاناتتى ءسوز ەرىكسىز ەسكە ورالادى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى
