– ەرتەڭگى ماتچ گلازگودا وتكەن ويىنداي جەڭىل بولادى دەپ ويلايسىز با؟
– نەگىزى العاشقى ويىن بىزگە وڭاي بولدى دەپ ايتا المايمىن. بىراق جاقسى ناتيجەگە قول جەتكىزگەنىمىز انىق. ەرتەڭ دە جەڭىسكە جەتكىمىز كەلەدى. بۇل ءبىزدىڭ قولىمىزدان كەلەدى دەپ ۇمىتتەنەمىن.
– گلازگودا وتكەن ويىننىڭ الدىندا كوماندانىڭ ازداپ قوبالجىعانى انىق. بۇل جولى...؟
– «استانانىڭ» دەڭگەيىن جاقسى بىلەمىز. وسال قارسىلاس ەمەس. سوندىقتان بارىنشا جوعارى دەڭگەيدە ونەر كورسەتۋگە تىرىسامىز.
– «سەلتيك» وتكەن جىلمەن سالىستىرعاندا كۇشەيدى دەپ ويلايسىز با؟
– كوماندانىڭ نەگىزى قالدى. بىراق ويىنىمىزدىڭ ازداپ وزگەرگەنى راس. الدا ءبىزدى كوپتەگەن ماتچتار كۇتىپ تۇر. ءبىز بارىندە جەڭىسكە جەتۋىمىز كەرەك.
– «استانانىڭ» ورتالىق جارتىلاي قورعانىسىن قالاي باعالار ەدىڭىز؟
– «استانا» گلازگودا جاقسى ونەر كورسەتكەن بولاتىن. ءبىزدى ءجيى قىسىمعا الدى. جارتىلاي قورعانىسقا قاجەتتى فۋتبولشىلاردىڭ جينالعانى كورىنىپ تۇر.
– وتكەن جىلى «سەلتيك» «استانادان» ارەڭ وتكەن بولاتىن. بىراق بيىل العاشقى ويىننىڭ ءوزى-اق باسقا باعىتتا ءوربىدى.
– ءبىزدىڭ دايىندىعىمىز جاقسىراق بولدى. قارسىلاسىمىزدى الدىن الا زەرتتەپ, شابۋىلدى وتكىزۋدىڭ ءتۇرلى جولدارىن قاراستىردىق.
– ەرتەڭ «استانا» بۇرىن-سوڭدى بولماعان عاجايىپتى جاساپ, چەمپيوندار ليگاسىنىڭ تاريحىن جاڭارتار بولسا, «سەلتيكتىڭ» كۇيى نە بولماق؟
– بىلمەدىم...
– گلازگوداعى ويىندا پاتريك تۆۋماسيمەن بىرنەشە رەت جەكە شىقتىڭىز. كەي تۇستارىندا ۇرىسقا دا باردىڭىز. بۇل ماتچ الدىندا بەرىلگەن تاپسىرما ما؟
– قارسىلاسىمىز شابۋىلعا شىققاندا, ەڭ باستى ماقساتىمىز – ونى توقتاتۋ. كەي ساتتەردە مەن ودان مىقتىراق ويناپ, اشۋىنا تيگەن كەزدەرىم بولدى.
ايان ءابدۋالي,
«ەگەمەن قازاقستان»
