ايماقتا 48 مەكتەپ پەن 44 بالاباقشا جۇمىس ىستەيدى, ولاردىڭ باسىم كوپشىلىگى قازاق تىلىندەگى مەكتەپتەر مەن بالاباقشالار. بايان-ولگەي تۋرالى بەكەرگە ءسوز قوزعاپ وتىرعان جوقپىز. جاقىندا وسكەمەنگە وسى ايماقتىڭ اكىمى عىلىمحان ايىپ باستاعان دەلەگاتسيا ارنايى كەلىپ قايتتى. التايدىڭ ار جاعىنان كەلگەن اعايىندارىمىز شىعىس قازاقستانمەن قارىم-قاتىناس, الىس-بەرىس كوكجيەگىن نىعايتۋ ماقساتىندا كەلگەندەرىن ايتادى. عىلىمحان ايىپ وبلىس اكىمى دانيال احمەتوۆپەن كەزدەسۋىندە وسكەمەن مەن بايان-ولگەيدى باۋىرلاس ايماق ەتىپ بەكىتىپ, بىرلەسە جۇمىس ىستەۋ جونىندە ۇسىنىس ءبىلدىرىپ, شىعىس قازاقستان مەن موڭعوليا اراسىن جالعايتىن توتە جول اشىلسا دەگەن تىلەگىن جەتكىزدى. «بۇل ماسەلە ۇزاق جىلدار بويى كوتەرىلىپ, مىنبەرلەردەن تالاي ايتىلىپ كەلە جاتقانىمەن, ازىرگە ناتيجە جوق. ەگەر ول جول اشىلاتىن بولسا, ەكى ايماقتىڭ اراسى ايتارلىقتاي قىسقارىپ, ساۋدا-ساتتىق تا جاندانا تۇسەتىن ەدى», دەگەن ع.ايىپ بيىل ەگىن شىعىمىنىڭ ناشارلىعىنا بايلانىستى ۇننان قىسىلىپ وتىرعاندارىن تىلگە تيەك ەتىپ, بايان-ولگەيدەگى قازاق مەكتەپتەرىنە وقۋلىق جاعىنان كومەك بەرسەڭىزدەر دەگەن ءوتىنىشىن دە جەتكىزدى. د.احمەتوۆ ەكى ايماقتىڭ باۋىرلاس بولۋىن قۇپتايتىندىعىن ايتىپ, وقۋلىق جاعىنان جاردەم بەرۋ ماسەلەسىن وبلىستىق ءبىلىم باسقارماسىنا جۇكتەدى. «بايان-ولگەي ايماعىندا تۇراتىن 102 مىڭ قانداسىمىزعا ءبىز ارقاشان قول ۇشىن بەرىپ, كومەكتەسۋگە ءازىرمىز. سىزدەردە ءوزىمىزدىڭ ءداستۇرلى حالىق ەمشىلىگىمەن اينالىسىپ جۇرگەندەر بار ما؟ اتا-بابالارىمىز شۇعىلدانعان حالىق مەديتسيناسىن قايتا جانداندىرىپ, جاڭعىرتىپ, بۇل باعىتتا دا بىرلەسە جۇمىس ىستەۋگە بولادى», دەدى وبلىس اكىمى. كەزدەسۋ سوڭىندا ەكى ايماقتىڭ اكىمدەرى ءوزارا ىنتىماقتاستىقتى دامىتۋ تۋرالى مەموراندۋمعا قول قويدى.
ازامات قاسىم,
«ەگەمەن قازاقستان»
وسكەمەن
