جاسىرىپ-جاۋىپ قايتەمىز, ءتىپتى اۋىلدا تۋىپ-وسكەن قىز-جىگىتتەردىڭ وزدەرى قالاداعى تىرشىلىككە تەز ارادا بەيىمدەلگەندىكتەن بە, كىم ءبىلسىن, ايتەۋىر وقۋ-ءبىلىم العان سوڭ كوبى ەلگە بارىپ ەڭبەك ەتۋگە سونشالىقتى ق ۇلىقتى ەمەس. باسقا مامانداردى ايتپاعاننىڭ وزىندە, قازىر اۋىلداعى مالشى-مەحانيزاتورلاردىڭ ورتاشا جاسى الپىستىڭ ۇستىندە, جەتپىسكە جاقىن. كوبى زەينەت جاسىندا بولسا دا, امال جوق, قاتاردان قالماي جۇمىس ىستەپ ءجۇر. بۇل قاشانعا دەيىن جالعاسادى دەيسىز؟ ءبىر سوزبەن ايتقاندا, ولاردىڭ ءىزىن باسىپ, جۇمىسىن جالعاستىراتىن جاستار قايدا؟
وسىمەن ساباقتاس تاعى ءبىر وزەكتى ماسەلە بار – جاس مامانداردىڭ باسىم بولىگىنىڭ بىلىكتىلىگى مەن ماشىعى تومەن. ءتيىستى وقۋ ورنىن بىتىرگەندىگىن راستايتىن ديپلومى بار, بىراق اۋىل شارۋاشىلىعى مەن ءوندىرىستىڭ قازانىندا قايناماعاندىقتان, ولاردى ءبىراز ۋاقىت تاربيەلەۋگە, تاجىريبە جيناقتاۋىنا تۋرا كەلەدى. ويتكەنى, ولار بىردەن بەل شەشە كىرىسىپ كەتەتىن دايىن مامان ەمەس. باسقا امالى جوق بولعاندىقتان, ەڭبەك ۇجىمدارىنىڭ باسشىلارى وسىنداي مامانداردى دا جۇمىسقا قابىلداۋعا ءماجبۇر. «ۋاقىت وتە كەلە توسەلەتىن شىعار», ء«ومىردىڭ ءوزى ۇيرەتەدى عوي» دەپ وزدەرىن جۇباتىپ جاتاتىنىن تالاي مارتە ەستىدىك.
جاسىراتىنى جوق, اۋدان-قالالاردا ۇدايى وتكىزىلەتىن ەڭبەك جارمەڭكەلەرىندە جۇمىسشى ماماندارىنا سۇرانىس وتە جوعارى. كەرەك دەسەڭىز, جالاقىسى جوعارى, بارلىق جاعدايى جاسالاتىن جۇمىس ورىندارى دا از ەمەس. بىراق, سوعان لايىق ماماندار تابىلماي جاتادى. بۇل اۋىلعا دا, قالاعا دا ءتان.. ءبىراز جىلدان بەرى جالعاسىپ كەلە جاتقان جاعداي بۇل. سوندا مۇنى شەشۋدىڭ جولى قانداي؟
بۇرىن اۋىلدا دا, قالادا دا كاسىپتىك-تەحنيكالىق ۋچيليششەلەر كوپ ەدى. قازىر جوق. ونىڭ ورنىنا تەحنيكالىق مەكتەپتەر اشىلدى. قارجىلاندىرۋدىڭ جانە قاجەتتىلىكتىڭ جوقتىعىنا بايلانىستى جابىلىپ قالعاندارى دا از ەمەس. بۇل – نارىقتىڭ قاتال تالابى. ال تەحنيكالىق مەكتەپتەردىڭ ىشىندە جوعارى كوللەدج بولىپ جاتقاندارى دا بار. ءبارى ەمەس, ارينە. ويتكەنى, كەز كەلگەن ورتا ارناۋ-
لى وقۋ ورنى قازىر مۇنداي جوعارى دەڭگەيگە يە بولا المايدى. تالاپ پەن جاۋاپكەرشىلىك وتە جوعارى. وسىعان سايما-ساي كەلەتىن وقۋ ورىندارى سيرەك. بۇل دۇرىس قادام. سانى بار, ساپاسى جوق, قاجەتسىز كادرلاردى توپىرلاتىپ جاتقان سانسىز وقۋ ورىندارىنىڭ قاتارىن ازايتىپ, سۇرانىسقا يە بىلىكتى ماماندار دايارلايتىن جوعارى كوللەدجدەر كوبەيسە قۇبا-قۇپ, ارينە. بىراق, ونداي ءبىلىم مەكەمەلەرى قازاقستاندا ازىرگە كوپ ەمەس, ساناۋلى. وڭتۇستىك قازاقستان جوعارى جاڭا تەحنولوگيالار كوللەدجى وسىنداي دارەجەگە يە بولعان وقۋ ورىندارىنىڭ العاشقىسى. بۇل وقۋ ورداسىن تىلگە تيەك ەتىپ وتىرعان سەبەبىمىز, بۇگىنگى تاقىرىبىمىزعا تامىزىق بولىپ وتىرعان ماسەلە − بىلىكتى ماماندار دايارلاۋ جونىندەگى وسىنداي كوللەدجدەردىڭ تاجىريبەسى رەسپۋبليكا اۋماعىندا كەڭىرەك تاراتىلسا دەگەن وي.
جوعارى كوللەدجدىڭ ەڭ باستى ەرەكشەلىگى – ءۇش دەڭگەيلى ءبىلىم بەرۋ. ونىڭ ءبىرىنشى دەڭگەيىندە وقۋعا قابىلدانعان جاستار جۇمىسشى ماماندىقتارىنا توسەلەدى. ال ەكىنشى دەڭگەي بويىنشا كوللەدج باعدارلاماسى, ءۇشىنشى دەڭگەي كەزىندە جوعارى وقۋ ورىندارىنىڭ باعدارلاماسى شەڭبەرىندە وقىتىلادى. ينتەگراتسيالىق ءبىلىم بەرۋ دەگەنىمىز مىنە, وسى. مۇنىڭ تيىمدىلىگى وتە جوعارى ەكەنىنە كوز جەتىپ وتىر. ويتكەنى وسى ارقىلى ساپالى ماماندارعا قول جەتە باستادى. قازىر وڭتۇستىك قازاقستان وبلىسىنىڭ ءوندىرىس جانە قۇرىلىس ورىندارىندا قاجەتتى ماماندار جەتكىلىكتى. جاستار كوللەدجدە وقىپ ءجۇرىپ-اق بولاشاق جۇمىس ورىندارىنىڭ قىر-سىرىنا قانىعا باستايدى. بۇل رەتتە مودۋلدىك تەحنولوگيا ءادىسى بويىنشا ءبىلىم الۋدىڭ دا پايداسى زور. تۇسىنىكتى تىلمەن ايتقاندا, ستۋدەنتتەر ءدارىستىڭ 65 پايىزىن الەۋمەتتىك سەرىكتەستەردىڭ وندىرىستىك بازاسىندا الادى. ولار جوعارى كوللەدج قابىرعاسىندا ءبىلىم الا ءجۇرىپ ۋاقىتىنىڭ كوپ بولىگىن ءوندىرىس ورىندارىندا نەمەسە قۇرىلىس الاڭىندا وتكىزەدى دەگەن ءسوز. وڭتۇستىك قازاقستان جوعارى جاڭا تەحنولوگيالار كوللەدجىنىڭ سەنىمدى سەرىكتەسى – «وتاۋستروي» كومپانياسى وڭتۇستىك وڭىردە عانا ەمەس, قازاقستانعا بەلگىلى. وندىرىستىك بازاسى وتە جاقسى. تەك قۇرىلىسپەن عانا اينالىسپايدى, سونىمەن بىرگە وسى سالاعا قاجەتتى گاز-بلوك پەن پليتانىڭ, قۇبىردىڭ ءتۇر-ءتۇرىن شىعاراتىن ءوندىرىس ورىندارى دا جەتكىلىكتى. وسىنىڭ ءبارىن ستۋدەنتتەردىڭ كوزبەن كورىپ, قولمەن ۇستاپ, وقۋ-تاجىريبە بارىسىندا كەڭىرەك قانىعۋىنا مۇمكىندىك بەرگەندىكتەن, ولاردىڭ قىزىعۋشىلىعى مەن ىنتا-جىگەرى وتە جوعارى. ەڭ باستىسى, كوللەدجدى بىتىرگەن تۇلەكتەر ءۇشىن جۇمىس ورنى دايىن.
ءبىلىمدى دە بىلىكتى ماماندارعا قول جەتكىزۋ ءۇشىن وسىنداي تاجىريبەلەرگە دە ءتيىستى ورىنداردىڭ جەتكىلىكتى ءمان بەرگەنى ءجون بولار ەدى.
