وسىنداعى جول بويىنداعى بۇلاق باسىن قۋالاپ قونعان «جىڭىشكە» اۋىلدىق وكرۋگىندەگى «نۇر-ايدار» شارۋا قوجالىعى ءۇش جىلدان بەرى اسا دارۋمەندەرگە باي تاڭقۋراي ءوسىرىپ كەلەدى. اۋەلدە ءبارى ەكسپەريمەنتتەن باستالادى عوي. ەركىن شەراليەۆ دەگەن ازامات تاڭقۋرايدىڭ پايداسى, ونىڭ تاۋلى جەرگە جاقسى وسەتىندىگىن بىلگەننەن كەيىن ءوسىرۋ جولدارىن ابدەن زەرتتەپ ءۇي ىرگەسىندەگى 7 سوتىق جەرىنە ەگىپ كورگىسى كەلەدى.
كوكونىستىڭ باسقا ءتۇرىن ءوسىرىپ جاتقاندار كوپ, ال تاڭقۋرايعا ماماندانعاندار از. پايداسىن دا ەسەپتەي بەرمەيدى. بۇل ەركىنگە قول بولعان. 7 سوتىق جەردەن ءبىرتالاي نەسىبە ايىرعان سوڭ 3 گەكتار سۋارمالى جەردى 49 جىلعا نەسيەگە الىپ, تاعى دا تاڭقۋراي ەككەن. وسىلايشا, بىتىك ونىمنەن كۇن سايىن 200 كيلوعا دەيىن جينايتىن بولعان.
– تاڭقۋرايدىڭ كيلوسىن 700 تەڭگەدەن ساتىپ جاتىرمىز. بۇل جەمىس داقىلىنىڭ ءار ءتۇبى 2-3 كيلودان ءونىم بەرەدى. ال ماۋسىمىندا 1 گەكتاردان 12 تونناعا دەيىن جەمىس جيناۋعا بولادى. جيىن-تەرىم جۇمىستارىنا 20-عا جۋىق اۋىل تۇرعىندارى تارتىلىپ, ارقايسىسىنا كۇنىنە ءبىر كيلو تەرسە 150 تەڭگەدەن اقى تولەپ جاتىرمىز. جۇمىسشىلاردىڭ تاماعى تەگىن. مۇنداعى جۇمىسشىلار كۇنىنە ورتا ەسەپپەن 2000-3000 تەڭگەنىڭ كولەمىندە اقشا تابادى, – دەيدى قوجالىق توراعاسى ەركىن شەراليەۆ.
نەگىزىنەن تاڭقۋراي بۇتالى كوپجىلدىق وسىمدىك سانالادى. جابايى تۇردە ازعانا بولسا دا كولەڭكەلى جەردە جاقسى وسەدى. وسىنى ەسكەرگەن قوجالىق اۋىل ىرگەسىندەگى قىراتتى اۋماقتى ارنايى تاڭداپتى. قوجالىق الداعى ۋاقىتتا جەمىس كولەمىن 1,5 گەكتارعا ۇلعايتامىن دەپ وتىر. شارۋانىڭ جۇمىس جوسپارىنا رازى بولعان وبلىس اكىمى جانسەيىت تۇيمەباەۆ اۋدان باسشىلىعىنا قازىعۇرت اۋدانىنداعى تاۋلى اۋىل وكرۋگتەرىندە تاڭقۋراي پلانتاتسيالارىن ۇلعايتۋدى تاپسىردى.
جاقسى جاڭالىق جۋرناليستەردىڭ جازباسى, ءتۇسىرىلىمى ارقىلى وڭتۇستىكتىڭ بارلىق اۋدان, قالالارىنا تەز تاراپ كەتتى. وڭتۇستىك ديحاندارى وزگە وڭىرلەرگە قاراعاندا, ەڭبەكقورلىعىمەن ەرەكشەلەنەدى. ەندى ولاردىڭ ءبىر توبى تاڭقۋراي ءوسىرۋدىڭ قىر-سىرىن ۇيرەنۋ ءۇشىن «نۇر-ايدار» شارۋا قوجالىعى مەن ءوزىنىڭ مەكەنىنىڭ اراسىن ايداۋ جولعا اينالدىرىپ جىبەردى.
