وسىناۋ اۋقىمدى شارانىڭ كوزدەگەن ماقساتى جايلى كوپشىلىكتى حاباردار ەتكەن ءمينيستردىڭ ايتۋىنا قاراعاندا, بۇل جوبا ەلباسىنىڭ «بولاشاققا باعدار: رۋحاني جاڭعىرۋ» اتتى ماقالاسى اياسىندا قولعا الىنىپ وتىر. سەبەبى, قازاقستان قازىرگى تاڭدا الەم بويىنشا سىرتتاعى قانداستارىن اتاجۇرتىنا تارتۋشى ازعانا ەلدەردىڭ ءبىرى. ەكىنشىدەن, جۋىقتا وتكەن دۇنيەجۇزى قازاقتارىنىڭ V قۇرىلتايىندا مەملەكەت باسشىسى: «سىرتتاعى ەلىم دەگەن قازاققا – قازاقستاننىڭ ەسىگى ارقاشان اشىق» - دەپ اتاپ وتكەنىندەي, مينيسترلىك وسى تاپسىرمانى ويداعىداي ورىنداۋ ءۇشىن جانە سىرتتاعى اعايىننىڭ ءومىرىن اتاجۇرتتاعى تۇرعىندارعا كەڭىرەك تانىستىرۋ ماقساتىندا وسى جوبانى قولعا الىپ وتىر. بۇنىڭ سىرتىندا الىس-جاقىن شەتەلدەردەگى قازاقتاردىڭ وتانىنا ورالۋىنا بۇل فيلم جول سىلتەۋشى باعىت بولادى دەگەن ءۇمىت تە جوق ەمەس...
جوبانى ىسكە اسىراتىن قۇرىلىم – «قازكونتەنت» اق-نا قاراستى «قازاقستان تاريحى» ينتەرنەت ۇجىمى. جوبا جەتەكشىسى ولجاس بەركىنباەۆتىڭ تانىستىرعان جوسپارىنا قاراعاندا, ءفيلمنىڭ ءار سەرياسى 40 مينۋتتان تۇرادى. ۇلاسپالى تۋىندىدا – اۋەلى, شەتەلدەگى قازاقتاردىڭ تاريحى, ءومىرى, ەتنو تۇرمىسى مەن مادەنيەتىن تولىق قامتۋ كوزدەلىپ وتىر. فيلم قازاق تىلىندە جاسالىپ, تولىق مونتاجدالعان سوڭ ورىس, اعىلشىن تىلدەرىنە اۋدارىلادى. جۇمىس بارىسىندا قازاقتار ءومىر ءسۇرىپ جاتقان ەلدىڭ ارحيۆتىك قۇجاتتارىمەن دە تانىسىپ, ونى فيلم بارىسىندا پايدالانۋ, ءارى شەتتەگى تانىمال قايراتكەر تۇلعالار جايلى جەكە-جەكە سيۋجەتتەر دايىنداۋ ءىسى قولعا الىنباق. جۇمىس بارىسىندا كەيبىر ماڭىزدى سيۋجەتتەردى ينتەرنەت ارقىلى تىكەلەي حالىققا جولداپ وتىرۋ جايى دا قاراستىرىلعان. بۇل تۋىندى الدا كەلە جاتقان تاۋەلسىزدىك مەرەكەسىنە دەيىن تولىق اياقتالادى دەپ كۇتىلۋدە.
ءتۇسىرىلىم توبى جۇمىسىن – رەسەيدەگى قازاقتار شوعىر قونىستانعان استراحان, ومبى, ورىنبور, قورعان قالالارىنان باستاپ, تۇرىكمەنستاننىڭ – تۇرىكمەنباشى, تاشاۋىز, اشحاباد, چاردجوۋ وڭىرلەرىن قامتىپ, وزبەكستان ەلىنىڭ – بوستاندىق اۋدانى, تاشكەنت, شىرشىق, عازالكەنتىندە ايالداپ, ارى قاراي تاجىكستان جەرىندەگى – دۋشانبە, سوعدى, تاۋلى باداحشان, حاتلون ولكەلەرىندە جالعاستىرادى. ودان كەيىن شۇار-عا قاراستى ءۇرىمشى, قۇمىل, قاراماي, باركول, شاۋەشەك, قۇلجا, موري سياقتى ايماق-اۋدانداردى ارالاپ, موڭعولياعا وتەدى. كەلەسى كەزەكتە يران رەسپۋبليكاسىنىڭ گورگان, بەندەر-تۇرىكمەن, تەگەران, مەشحەد قالالارى مەن اۋعانستان جەرىندەگى كابۋل, قۇندىز پروۆينتسيالارىندا ءتۇسىرىلىم جۇمىسىن جۇرگىزەدى.
بەكەن قايرات ۇلى,
«ەگەمەن قازاقستان»
سۋرەتتى تۇسىرگەن
ورىنباي بالمۇرات,
«ەگەمەن قازاقستان»
