انىعىراق ايتساق, كەشەندە قۋاتى 80 مۆت كۇن ەلەكتر ستانساسى, جىلىجاي, 2000 اسىل تۇقىمدى سيىرعا لايىقتالعان تاۋارلى ءسۇت فەرماسى, اقسەركە مەن بەكىرە تۇقىمداس بالىق ءوسىرۋ زاۋىتى, قوقىس وڭدەۋ زاۋىتى بولادى. سونداي-اق, ەت ءوندىرىسى باعىتىندا بيزون, كوسمەتولوگيا سالاسىنا كەرەك لاۆاندا ءوسىرۋ, بال ارالارىن اكەلۋ دە جوسپاردا بار. جىلىنا 20 مىڭ توننا كوكونىس وندىرىلەدى. جۇمىستىڭ ءبارى تابيعي, قاۋىپسىز جاعدايدا جاسالادى. ونىمدەر حيميكاتسىز, جوعارى ساپالى جانە بالعىن كۇيىندە تۇتىنۋشىلارعا جەتكىزىلەدى.
– ەل يگىلىگىنە ارنالىپ وتىرعان جوبانىڭ جەمىستى بولارىنا سەنىمىمىز كامىل, – دەيدى وبلىس اكىمىنىڭ ورىنباسارى الىبەك ناۋتيەۆ, – «ISSMAT» كومپانيالار توبىمەن ىنتىماقتاستىق مەموراندۋمىنا وتكەن جىلى «اتىراۋينۆەست» فورۋمىندا قول قويىلعان ەدى». ال يندەر اۋدانىنىڭ اكىمى سەرىك ارىستان ەلباسىنىڭ قازاقستانعا ينۆەستورلار تارتۋ تۋرالى تاپسىرماسى الىس اۋىلداردا دا قولعا الىنا باستاعانىنا قۋانىشتى ەكەنىن جاسىرمادى. «ەڭ باستىسى – جوبا اياسىندا بىرنەشە مىڭ جاڭا جۇمىس ورنى اشىلادى. جاڭا كەشەندە عىلىمي-زەرتتەۋ ورتالىعى بولادى, سول ارقىلى جەرگىلىكتى تۇرعىندار كەشەن جۇمىسىنا قاجەت ماماندىقتار بويىنشا ءبىلىم مەن تاجىريبە الادى, كەيىن قىزمەتكە ورنالاسادى», – دەدى اۋدان اكىمى. «ISSMAT» كومپانيالار توبىنىڭ نەگىزىن قالاۋشى فرانتسيا ازاماتى مەسسادي سايد جوباعا ينۆەستيتسيا سالۋعا شەشىم قابىلداۋ وڭايعا سوقپاعانىن, بىراق تاۋەكەلگە بەل بۋعانىن ايتادى. «ەگەر قازاقستاندا باستاۋ العان وسى كەشەن ءساتتى جۇزەگە اسىپ كەتسە, باسقا ەلدەردە دە اشۋعا جۇمىس جۇرگىزۋدەمىز. بۇل جوبا ساياساتپەن دە, بيزنەسىمىزدى دامىتۋمەن دە بايلانىستى ەمەس, جەرگىلىكتى حالىقتىڭ قاجەتىنە جارايتىن, الەۋمەتتىك-ەكونوميكالىق احۋالىن جاقسارتا تۇسۋگە ىقپال ەتەتىن يگى ءىس بولسا دەيمىز. الەمنىڭ 60-تان استام ەلىندە بولدىم, بىراق ءدال قازاقتارداي ءبىر-بىرىنە دەگەن جاناشىرلىقتى كورمەدىم. ءارى قازاقستاندا مەملەكەتتىڭ قولداۋى زور», – دەيدى ينۆەستور.
ازىرگە جوبانىڭ العاشقى ىرگەتاسى عانا قالاندى. كەزەڭ-كەزەڭمەن جۇزەگە اساتىن باستامانىڭ ءبىرىنشى ساتىسى ءۇش جىلدان كەيىن پايدالانۋعا بەرىلەدى. ال شىققان ونىمدەر قازاقستان مەن رەسەي, بەلورۋسسيا نارىعىنا باعىتتالادى. «يندەردىڭ لاۆانداسى قىتايعا ەكسپورتتالادى, جاقىن بولاشاقتا قۇرامىندا قازاقستاندا وسىرىلگەن لاۆاندا بار فرانتسۋز اتىرلەرى شىقسا, تاڭ قالماڭىزدار. فرانتسيادا لاۆاندانى «جاسىل التىن» دەپ اتايدى, قارا التىندى وڭىردە جاسىل التىننىڭ وسپەۋى مۇمكىن ەمەس», – دەيدى مەسسادي سايد.
باقىتگۇل باباش,
«ەگەمەن قازاقستان»
اتىراۋ
سۋرەتتى تۇسىرگەن
ءانۋار ابىلعازيەۆ
