دەپارتامەنت ديرەكتورىنىڭ ايتۋىنشا, ۆيزاسىز جۇيە قوسىلعالى بەرى كورەياعا زاڭسىز جۇمىس ىزدەپ كەتكەندەردىڭ سانى 15 ەسەگە وسكەن. ماسەلەن, 2014 جىلى كورەيانىڭ كوشى-قون قىزمەتى ەلىمىزدەن اتتانعان 359 زاڭسىز ميگرانتتى انىقتاسا, بيىل بۇل سان 5700-گە جەتكەن.
ء«بىزدىڭ وتانداستارىمىز كورەياعا تۋريستىك ماقساتتا ەمەس, جۇمىس ىستەۋگە جانە سوندا تۇراقتاپ قالۋعا اتتانادى. ونداي ادامداردىڭ كوبەيۋى ۆيزاسىز جۇيەنى ۇزارتۋعا كەدەرگى كەلتىرىپ وتىر. سونىمەن قاتار, ونداي زاڭسىز ميگرانتتار ەمدەلۋگە, جۇمىس بابىمەن جانە قىدىرىپ بارۋعا نيەتتەنگەن وتانداستارىنا دا زيانىن تيگىزەدى», ‒ دەيدى ارداق ماديەۆ.
قازاقستاننان كەلەتىن زاڭسىز ميگرانتتار ارتقاندىقتان, كورەيا كوشى-قون قىزمەتى ەلىمىزدىڭ ازاماتتارىن تەكسەرۋدى كۇشەيتكەن. ءتىپتى, كەيبىرىن دەپورتاتسيالاعان جاعدايلار دا كەزدەستى. سىرتقى ىستەر مينيسترلىگىنىڭ حابارلاۋىنشا, زاڭسىز ميگرانتتاردىڭ ارتۋىنا «كولەڭكەلى بروكەرلەردىڭ» ۇيىمداسقان قىزمەتى سەبەپ بولىپ وتىرعان كورىنەدى. بۇل تۋرالى كورەيا تاراپى قازاقستاندىق ارىپتەستەرىن حاباردار ەتكەن. قازىرگى تاڭدا ونداي توپتاردى قۇرىقتاۋ شارالارى جۇرگىزىلىپ جاتىر.
ء«بىز «كولەڭكەلى بروكەرلەردى» انىقتاۋ جۇمىستارىنا كىرىسىپ كەتتىك. الايدا ولاردى قۇرىقتاۋ قيىن. ويتكەنى, ىزىنە تۇسكەن كەزدە ونداي توپتار ءتاسىلىن وزگەرتەدى. ماسەلەن, ولار زاڭسىز ميگرانتتاردى سپورتتىق كوماندالار سەكىلدى كيىندىرىپ قويادى», ‒ دەيدى كونسۋلدىق قىزمەت دەپارتامەنتىنىڭ ديرەكتورى ارداق ماديەۆ.
كەيىنگى كەزدە قازاقستان ازاماتتارىنا كورەياعا بارۋعا رۇقسات بەرمەۋ وقيعالارى ءجيى كەزدەسىپ ءجۇر. كورەيانىڭ قازاقستانداعى ەلشىسى كيم دە سيك مۇنىڭ بىرنەشە سەبەبىن ءتۇسىندىرىپ بەردى.
«ەمدەلۋدى سىلتاۋراتىپ كورەياعا كەلگەندەردىڭ اۋرۋحانامەن كەلىسىمدەرى جوق نەمەسە قايدا بارىپ ەم قابىلدايتىندارىن بىلمەيدى. سونىمەن قاتار, شىن مانىندە ەمدەلۋ ءۇشىن كەلگەنىن دالەلدەيتىن قۇجات بولمايدى. ال تۋريستىك ساپاردى جەلەۋ ەتكەندەر ساياحاتتىڭ جوسپارى, ەلدەگى كورىكتى جەرلەر تۋرالى اقپارات سەكىلدى اقپاراتتاردان حابارى جوق. جۇمىس بابىمەن بارامىن دەيتىندەردە شاقىرۋشى تاراپتىڭ ناقتى دەرەگى تابىلمايدى. وسىلاردى نەگىزگە الىپ, كەيبىر قازاقستاندىقتارعا كورەيا اۋماعىنا كىرۋگە تىيىم سالىندى», ‒ دەيدى كورەيا كونسۋلى كيم دە سيك.
كيم مىرزا كورەياعا ساياحاتتاۋدى جوسپارلاعان بارشا قازاقستاندىقتارعا ەلگە اتتانار كەزدە جوعارىدا اتالعاندار سەكىلدى ماڭىزدى اقپاراتتاردى الدىن-الا ءبىلىپ الۋعا كەڭەس بەرەدى.
بريفينگ بارىسىندا كونسۋلدىق قىزمەت دەپارتامەنتىنىڭ ديرەكتورى ارداق ماديەۆ قازاقستاندىقتاردىڭ كورەيادا زاڭسىز جۇمىس ىستەۋىنىڭ سەبەبىن دە تۇسىندىرە كەتتى.
«مەنىڭشە, مۇنىڭ ءبىرىنشى سەبەبى مىنادا. بۇرىن ەلىمىز باسقالاردىڭ كومەگىن قاجەت ەتەتىن ەدى. كەيىنىرەك بۇل مەجەنى باسىپ وتكەن سوڭ, ءبىز وزگەلەرگە كاسىبي ماماندار ۇسىناتىن «دونور» ەلگە اينالدىق. سونىمەن قاتار, بۇرىن ەكى ەل اراسىندا جۇمىسقا ورنالاستىرۋ تۋرالى كەلىسىم بولعان. قازىر ونداي كەلىسىم جوق. ەكىنشى سەبەپ ‒ اۋىلدىق جەرلەردەگى جالاقى مولشەرىنىڭ ازدىعى بولسا كەرەك. ەڭ وكىنىشتىسى, ۆيزاسىز جۇيەنى پايدالانىپ, كورەياعا زاڭسىز جۇمىس ىستەۋگە اتتانعاندار سانى ارتىپ كەتتى», ‒ دەيدى ارداق ماديەۆ.
ايتا كەتۋ كەرەك, قازاقستان مەن كورەيا اراسىنداعى ۆيزاسىز جۇيە 2014 جىلى قابىلدانعان بولاتىن. اتالعان جۇيەگە سايكەس وتانداستارىمىز 1 اي مەرزىمگە كورەياعا تۋريستىك ساپارمەن, ەمدەلۋگە جانە جۇمىس بابىمەن بارا الادى.
اباي اسانكەلدى ۇلى
«ەگەمەن قازاقستان»
