گازەتتىڭ مەرەيتويىنا ارنالعان شارا قالاداعى «قاينار» ءبىلىم بەرۋ جانە بوس ۋاقىتتى قامتۋ كەشەنىندە ءوتتى. قالا اكىمدىگى, ىشكى ساياسات ءبولىمى گازەتتىڭ مەرەيتويىنا جاقسى دايىندىقپەن كەلىپتى. اكىمنىڭ ورىنباسارى ەرلان مىرزابەكوۆ: «وتارقا» – تاۋەلسىزدىكتىڭ جارشىسى. ەكىباستۇزدىقتاردىڭ رۋحىن وياتىپ, رۋحاني تۇرعىدان بايىتتى. امانكەلدى اعامىز سالعان سارا جولىن بۇگىنگى تىلشىلەر, رەداكتسيا ۇجىمى جالعاستىرۋدا» دەگەن جاقسى تىلەك ايتتى. وبلىستىق «سارىارقا سامالى» گازەتىنىڭ رەداكتورى نۇربول جايىقباەۆ ارىپتەستەرىنە شىعارماشىلىق شابىت تىلەدى. «وتارقا» گازەتىن امانكەلدى اعامىزدان كەيىن 2006 جىلدان باستاپ 9 جىل باسقارعان جۋرناليست جاسسەرىك سادۋاقاسوۆتى «قالا الدىندا سىڭىرگەن ەڭبەگى ءۇشىن» بەلگىسىمەن ماراپاتتالدى.
– «وتارقا» مەن امانكەلدى اعا مەن ءۇشىن ەگىز ۇعىم. اعانى قاتتى ساعىنىپ ءجۇرمىز, – دەپ اعىنان جارىلدى جاسسەرىك سادۋاقاسوۆ.
سونداي-اق, گازەتتىڭ قازىرگى رەداكتورى جانارگۇل قادىروۆا حالىقارالىق «قازاق ءتىلى» قوعامىنىڭ «قازاق ءتىلىنىڭ جاناشىرى» توسبەلگىسىنە يە بولدى.
– «وتارقا» ءوز وقىرماندارىمەن بىرگە ەكىباستۇزدا ناۋرىز مەيرامىنىڭ قايتا ورالۋىنا, قازاق بالاباقشالارى مەن مەكتەپتەرىنىڭ كوبەيۋىنە, قالا كوشەلەرىنىڭ قازاقىلانۋىنا ۇلەس قوستى. ءالى دە رۋحاني جاڭعىرۋ سالاسىندا بىرگە قىزمەت جاسايمىز, – دەدى جانارگۇل ارىپتەسىمىز.
مەرەيتويعا ارنالعان سالتاناتتى جيىندا باسىلىمنىڭ ەڭ ءبىرىنشى باسشىسى بولعان امانكەلدى قاڭتارباەۆ اعامىزدىڭ جارى ماكتاي اپاي ايتقانداي, مارقۇم ارىپتەسىمىزدىڭ قازاق تىلىندە گازەت اشۋ ءۇشىن بارماعان جەرى, اشپاعان ەسىگى قالماعان ەدى. سوندا دا قايسار مىنەزدى جۋرناليست العان بەتىنەن قايتپايدى.
ول ۋاقىتتا اۋداندىق «العا-ۆپەرەد» گازەتى قازاق جانە ورىس تىلدەرىندە شىعادى. ماقالالار ورىس تىلىندە جازىلىپ, قازاق تىلىنە اۋدارىلادى. اقىرى, قولىنا قالام الىپ, وزبەكالى جانىبەكوۆ اعامىزعا حات جازادى. امانكەلدى اعامىز نەگىزىن سالعان, تاۋەلسىزدىك تۇساۋىن كەسكەن «وتارقا» 1992 جىلدىڭ 1 قاڭتارىندا وسىلاي ومىرگە كەلدى.
گازەتتىڭ №1 سانىندا امانگەلدى قاڭتارباەۆتىڭ «اعايىنعا ارناۋ ءسوز» دەگەن ماقالاسى, جازۋشى قالمۇقان يساباەۆتىڭ «وتكىر بول, «وتارقا!» دەگەن تىلەگى جاريالاندى. گازەتكە «وتارقا» دەگەن ەرەكشە اتاۋدى كومىرلى, ءدۇبىرلى, باسقان جەرى كەنگە تولى بولعان سوڭ با, ەكىباستۇزدىق عالىم سەرىك جاقسىباەۆ اعامىز ۇسىنسا كەرەك. كەن يگەرىپ, لاۋلاي جانعان ءوندىرىستى دالانىڭ رۋحاني ومىرىنە دە وت بەرسىن دەگەن بولار. سول-اق ەكەن, قازاق گازەتىنىڭ جەكە شاڭىراق كوتەرگەنىن قولداپ, اۋىل-اۋدانداردان قاينىلقايات ەڭسەباەۆا, رايا نۇروۆا, رۋحيا دالەلوۆا, ەركەش مۇساباەۆا, كۇلاندا سۇيرىكباەۆا سىندى تىلشىلەر جان-جاقتان ءۇن قوستى.
قازىرگى كۇنى وڭىردەگى رۋحاني ءومىردىڭ تىنىس-تىرشىلىگىنە قالامىمەن قان جۇگىرتىپ جۇرگەن جاسسەرىك سادۋاقاس, سايا مولدايىپ, راۋزا مۇساباەۆا, انار قابدوللا, اسەم ءجۇنىس, داريا ەرعازينا, گۇلسانا مەدەۋباي, جانار قادىروۆا, اينۇر مەيراموۆا سىندى جۋرناليستەر الدىڭعى بۋىننىڭ مەكتەبىنەن ءوتىپ, قابىرعالارىن قاتايتقان-دى. باسقا دا ارىپتەستەرىمىزدىڭ بارشاسى باسىلىمنىڭ بەدەلىن بيىكتەتىپ, وقىرمانىن ارتتىرۋ ءۇشىن ۇلەستەرىن قوسىپ كەلەدى.
شيرەك عاسىرلىق بەلەستى باعىندىرعان باسىلىمنىڭ مەرەيتويىندا «اتامۇرا» ورتالىعىنىڭ, مۋزىكا مەكتەبىنىڭ ونەرپازدارى ونەر كورسەتتى. ءوڭىردىڭ اۋدان-قالالارىنان جينالعان جۋرناليستەر اراسىندا دويبى, شاحمات جانە توعىزقۇمالاقتان جارىستار وتكىزىلدى. تاريحي-ولكەتانۋ مۋزەيىندە «وت قالانىڭ جىلناماسى – «وتارقا» اتتى كورمە اشىلدى.
فاريدا بىقاي,
«ەگەمەن قازاقستان»
پاۆلودار وبلىسى,
ەكىباستۇز قالاسى
سۋرەتتەردە: مارقۇم امانكەلدى قاڭتارباەۆ; بۇگىنگى رەداكتسيا
