«قۇرىلىس بيىل باستالىپ, 2020 جىلى اياقتالادى», دەيدى وبلىستىق جولاۋشىلار كولىگى جانە اۆتوكولىك جولدارى باسقارماسىنىڭ باسشىسى قايرات نۇرتاەۆ. وڭىرلىك كوممۋنيكاتسيالار قىزمەتىندە وتكەن بريفينگتە اتىراۋ مەن استراحاننىڭ اراسىنداعى جولدى قايتا جاڭعىرتۋ جۇمىستارى التى بولىككە بولىنگەنى, قازىر سونىڭ 4 بولىگىنىڭ جوبالىق-سمەتالىق قۇجاتتارى دايىن ەكەنى ايتىلدى. قالعان ەكى بولىگىنىڭ قۇجاتتارى جاقىن كۇندەرى مەملەكەتتىك ساراپتاما قورىتىندىسىن الادى. ايماق تۇرعىندارىن الاڭداتىپ وتىرعان جول جۇمىستارىنىڭ بۇرىن بەلگىلەنگەن مەرزىمدە باستالماۋىنا بانكتىڭ تالاپتارى سەبەپ بولعان. بۇل قۇرىلىستى يسلام دامۋ بانكى قارجىلاندىرادى. اقتوبە – اتىراۋ – استراحان اۆتوكولىك جولىنىڭ اتىراۋ وبلىسىنىڭ اۋماعىنان وتەتىن 552 شاقىرىمىن جاڭعىرتۋ جۇمىستارىنا بيۋدجەتتەن اقشا ءبولىندى. قازىر وبلىس اۋماعىمەن شەكتەسەتىن جولدىڭ 432 شاقىرىمى قاناعاتتانارلىقسىز كۇيدە.
باسقارما باسشىسى وبلىس ورتالىعىنىڭ كەڭەيۋىنە بايلانىستى «اتىراۋ – استراحان» تاس جولىنىڭ ءبىر بولىگى قالا ىشىندە قالىپ وتىرعانىن دا ايتتى. «وسى باعىتتا قازىر اتىراۋ قالاسىنىڭ سىرتىنان سولتۇستىك اينالما اۆتوكولىك جولىنىڭ قۇرىلىسىن جۇرگىزۋ ءۇشىن تەحنيكالىق-ەكونوميكالىق نەگىزدەمەسىن جاساقتاۋعا قارجى بولىنۋدە. باس جوسپارعا سايكەس اينالما جولدىڭ ۇزىندىعى 26 شاقىرىمدى قۇرايدى. جوسپاردا 4 جول ايرىعى مەن جايىق وزەنى ارقىلى وتەتىن 400 مەترلىك كوپىر سالۋ قاراستىرىلعان», دەدى قايرات نۇرتاەۆ.
2014 جىلى ماحامبەت اۋدانىندا جايىق وزەنى ارقىلى وتەتىن كوپىر قۇرىلىسى باستالعان ەدى. يندەر – قاراباۋ – ميالى – ساعىز جولى دا جاڭعىرتىلىپ جاتىر. بيىل قىزىلقوعا اۋدانىنا قاراستى تاسشاعىل, قاراباۋ, قاراكول, ماحامبەت اۋدانىنداعى سارايشىق, المالى, بەيبارىس اۋىلدارىنىڭ كىرمە جولدارى مەن اۋىلىشىلىك جولدارى جوندەلە باستادى. الداعى ۋاقىتتا وبلىستاعى دوسسور, ماقات, بايگەتوبە, ساعىز, مۇقىر, اققالا, ىنتىماق, ەلتاي, كوكتوعاي, زينەدەن, تومان, ەسبول اۋىلدارىنداعى جولدار كۇردەلى جوندەۋدەن وتەدى. قازىر اتىراۋ قالاسىنداعى 79 كوشەدە تاسجول توسەۋ جۇمىستارى ءجۇرىپ جاتىر. وبلىس ورتالىعىنداعى 1593 شاقىرىمدىق 1781 كوشەنىڭ 948-ءى اسفالتتالدى.
ءباسپاسوز ءماسليحاتىندا قوعامدىق كولىك توڭىرەگىندەگى ماسەلەلەر دە ءسوز بولدى. باسقارما باسشىسىنىڭ ايتۋىنشا, وبلىس ورتالىعىندا قوعامدىق كولىكتىڭ قالىپتى قىزمەتىن قامتاماسىز ەتۋ ءۇشىن 160 اۆتوبۋس جەتىسپەيدى. ال ەرەكشە جاڭالىق – مۇنايلى ايماقتىڭ ءۇش اۋدانىندا شاعىن اۆياتسيا ءۇشىن جاڭا اۋەجاي سالىنادى. «كولىك ينفراقۇرىلىمىن دامىتۋ مەن ىقپالداستىرۋ-2020» باعدارلاماسى بويىنشا قۇرمانعازى اۋدانىنىڭ سۇيىندىك سەلوسىنا, قىزىلقوعا اۋدانىنىڭ ميالى سەلوسىنا جانە جىلوي اۋدانىنىڭ قۇلسارى قالاسىنا اۋەجاي سالۋ جوسپارلانعان. «بيىل قارجىنىڭ بولىنۋىنە بايلانىستى قۇرىلىس جۇمىستارى ميالىدا باستالادى. ال, سۇيىندىك پەن قۇلسارى قالاسىندا سالىناتىن اۋەجاي قۇرىلىسى ءۇشىن قاجەتتى قۇجات جاساقتالادى», دەدى قايرات نۇرتاەۆ.
باقىتگۇل باباش,
«ەگەمەن قازاقستان»
اتىراۋ
