مەملەكەت باسشىسىنىڭ باستاماسىمەن ۇيىمداستىرىلعان بۇل اۋقىمدى شارا ەلىمىزدە دە عىلىمنىڭ, يننوۆاتسيانىڭ دامۋىنا جاڭا سەرپىن بەرگەنى داۋسىز. XXI عاسىردا كەز كەلگەن مەملەكەتتىڭ الەۋەتى قارۋىنىڭ كۇشىمەن ەمەس, زاماناۋي تەحنولوگيالار سالاسىنداعى جەتىستىگىمەن باعالاناتىنىنا كوز جەتكىزىپ وتىرمىز. قازاقستاننىڭ قازىرگى ساياساتى شيكىزات وندىرۋمەن شەكتەلمەي, بيولوگيالىق الۋان تۇرلىگىمىزدى, ەنەرگيانىڭ جاڭا كوزدەرىن پايدالانا وتىرىپ, ينفراقۇرىلىمدى جوعارى دەڭگەيدە دامىتۋعا ەكولوگيالىق تازا ءونىم شىعارۋعا, ەكولوگيالىق قاۋىپسىز ورتا قۇرۋعا باعىتتالعان. بۇل رەتتە ساكەن سەيفۋللين اتىنداعى قازاق اگروتەحنيكالىق ۋنيۆەرسيتەتى ەلىمىزدەگى اۋىل شارۋاشىلىعى ماماندارىن دايارلايتىن ەڭ بەلدى وقۋ ورىندارىنىڭ ءبىرى رەتىندە ءبىراز جىلدان بەرى الەمدەگى بەلگىلى وقۋ ورىندارىمەن, عىلىمي ورتالىقتارمەن تىعىز ارىپتەستىكتە جۇمىس ىستەپ كەلەدى. وسىدان ءتورت جىل بۇرىن ەلباسىمىزدىڭ جىبەك جولدارى ەلدەرىنىڭ قارىم-قاتىناسىن نىعايتۋ تۋرالى باستاماسى قىتاي ەلى تاراپىنان قولداۋ تاۋىپ, كورشى ەلمەن اگرارلىق عىلىم سالاسىنداعى بايلانىستاردى نىعايتۋعا مۇمكىندىك الدىق. استانا قالاسىنىڭ اينالاسىندا جاسىل بەلدەۋ قۇرۋ, جاڭا ءونىم تۇرلەرىن سۇرىپتاۋ, جاڭا داقىلدار شىعارۋ, اۋىل شارۋاشىلىعى تەحنيكاسىن قۇراستىرۋ – بۇگىندە حالىقارالىق بايلانىستار اياسىندا قول جەتكىزگەن جۇمىستارىمىزدىڭ ازعانتاي بولىگى عانا.
جاقىندا بەيجىڭدە وتكەن ء«بىر بەلدەۋ, ءبىر جول» فورۋمىنىڭ اياسىندا قىتايلىق ارىپتەستەرىمىزدىڭ شاقىرۋىمەن قحر اۋىل شارۋاشىلىعى عىلىم اكادەمياسىنىڭ 60 جىلدىعىنا وراي ۇيىمداستىرىلعان دۇنيەجۇزىلىك سامميتكە قاتىسۋعا مۇمكىندىك تۋدى. جيىندا قازاقستاننىڭ اۋىل شارۋاشىلىعىنىڭ جەتىستىكتەرى تۋرالى بايانداما جاسادىم. الەمنىڭ 30-دان استام ەلىنىڭ عالىمدارى مەن جوعارى وقۋ ورنى جەتەكشىلەرىنىڭ باسىن قوسقان بۇل جيىندا اگرارلىق سالانىڭ جاھاندىق دامۋ ۇردىستەرى تالقىلانىپ, سالانىڭ بولاشاعى تۋرالى ورتاق ۇستانىم قالىپتاستىرۋعا بەتبۇرىس جاسالدى. ايتا كەتەرلىگى, باسقوسۋعا قاتىسۋشى كوپتەگەن اتاقتى عالىمدار, جوو باسشىلارى, كاسىپكەرلەر ەلىمىزدەگى ەكسپو-عا ۇلكەن قىزىعۋشىلىق تانىتىپ, قاتىساتىندىقتارىن ءبىلدىرىپ وتىر. وسى مۇمكىندىكتى پايدالانىپ, اعىمداعى جىلى 3-5 شىلدە اياسىندا قازاقستاندا تۇڭعىش رەت س.سەيفۋللين اتىنداعى قازاتۋ باستاماسىمەن جىبەك جولى بويى ەلدەرىنىڭ اۋىل شارۋاشىلىعىنداعى ءبىلىم جانە عىلىم جونىندەگى حالىقارالىق اليانسىنىڭ جيىنى وتكىزىلگەلى وتىر. بۇل – رەسپۋبليكامىزدىڭ اگرارلىق عىلىمى مەن ءبىلىمىنىڭ تاريحىندا تۇڭعىش رەت وتەتىن شارا. بىلتىر قىتاي اۋىل شارۋاشىلىعى اكادەمياسىنىڭ ۇيىتقىسىمەن قۇرىلعان بۇل اليانسقا 40-تان استام ەلدىڭ جوعارى وقۋ ورىندارىنىڭ رەكتورلارى, عالىمدارى كىرەدى. ماقسات – اگرارلىق سالاداعى ماسەلەلەردى بىرلەسە شەشۋ. اتالعان جيىنعا شەتەلدەردىڭ 40-قا جۋىق جوعارى وقۋ ورىندارىنىڭ رەكتورلارى, اكادەميالار مەن عىلىمي-زەرتتەۋ ينستيتۋتتارىنىڭ باسشىلارى قاتىسۋعا نيەت ءبىلدىردى. ەكسپو-مەن تۇسپا-تۇس ۇيىمداستىرىلىپ وتىرعان بۇل شاراعا كەلگەن قوناقتارىمىز حالىقارالىق كورمە جەتىستىكتەرىمەن, ەلىمىزدىڭ ەكونوميكالىق, الەۋمەتتىك, عىلىمي-يننوۆاتسيالىق, مادەني, رۋحاني الەۋەتىمەن جان-جاقتى تانىسادى. بۇل ءوز كەزەگىندە قازاقستاننىڭ جاھاندىق دامۋ كوشىنەن ءوزىنىڭ لايىقتى ورنىن الۋىنا ىقپال ەتەتىنىنە سەنەمىز.
اقىلبەك كۇرىشباەۆ,
س.سەيفۋللين اتىنداعى قازاق اگروتەحنيكالىق ۋنيۆەرسيتەتىنىڭ رەكتورى, اۋىل شارۋاشىلىعى عىلىمدارىنىڭ دوكتورى, پروفەسسور
