ايتۋلى كورمە جاڭالىقتارى قازىردىڭ وزىندە كوپشىلىكتىڭ قىزىعۋشىلىعىن تۋدىرۋدا. كەلۋشىلەردىڭ تاڭدايىن قاقتىرعان سونى تابىستاردىڭ قاتارىندا ەكو-ءۇي, تەلەفون قۋاتتايتىن قاپتاما جانە ۇشاتىن ۆەلوسيپەد بار. جۇرتتىڭ اۋزىنداعى جاڭالىقتار جايىندا ءسال كەڭىرەك توقتالعاندى ءجون كوردىك.
ەلەڭ ەتكىزگەن ەكو-ءۇي
سلوۆاكيا پاۆيلونى زاماناۋي ۇلگىدە جاسالعان «ەكو-ءۇي» ءبىر كورگەننەن ەلەڭ ەتكىزەدى. شاعىن عانا كاپسۋلانىڭ ىشىنەن ادامعا قاجەتتى دۇنيەنىڭ بارلىعى تابىلادى. بۇل ەكولوگيالىق باسپانا كۇننەن قۋات الىپ, جاڭبىر سۋىن تازارتادى ەكەن. سونىمەن قاتار, مۇنى كولىك ارتىنا تىركەپ, كەز كەلگەن ساياحاتقا الىپ جۇرۋگە بولادى.
ء«ۇيدىڭ توبەسىندە كۇن پانەلدەرى ورناتىلعان, سول ارقىلى قۋات الادى. ال جاڭبىر سۋى بەلگىلى ءبىر ورىندا ساقتالادى. ارنايى قۇرال جينالعان سۋدى تازارتادى. مۇندا تاماق ىستەۋگە بولادى, دارەتحانا, دۋش, ىڭعايلى توسەك جانە تەلەديدار دا بار. ەكو-ءۇيدىڭ سالماعى – 1200 كيلو. ەگەر ونى سۋمەن تولتىرساڭىز سالماعى 1900 كيلوعا دەيىن جەتەدى. اۋدانى – 8 شارشى مەتر. وندا ەكى ادام تۇرا الادى, قۇتقارۋشىلار, عالىمدار مەن تۋريستەر ءۇشىن تاپتىرمايتىن باسپانا», دەيدى پاۆيلون قىزمەتكەرى ليۋدميلا زاتوپتوۆا.
وكىنىشتىسى سول, زاماناۋي ۇلگىدەگى ەكو-ءۇيدى كەز كەلگەننىڭ قالتاسى كوتەرە بەرمەيدى. سەبەبى, ونىڭ باعاسى – 76 ملن ەۋرو. «راس, باعاسى قىمبات. بىراق, مۇنى جاساۋعا ارزان ماتەريالدار قولدانىلعان جوق», دەيدى ماماندار. ال سلوۆاكيا پاۆيلونىنىڭ ديرەكتورى مونيكا سوفيانىڭ ايتۋىنشا, بۇل ەرەكشە ءۇي جاڭا ەنەرگيانى قالاي قولدانۋعا بولاتىندىعىن ۇيرەتەدى.
ۇشاتىن ۆەلوسيپەدتى بىلەسىز بە؟
چەحيا پاۆيلونىندا كوپشىلىكتىڭ نازارىنا ۇسىنىلعان ۇشاتىن ۆەلوسيپەد – «Flying Bike» جوباسىن ولار گەرمانيامەن بىرلەسىپ جۇزەگە اسىرعان. اۆتورلاردىڭ ايتۋىنشا, جاڭالىقتى جۇزەگە اسىرۋعا اتاقتى فرانتسۋز جازۋشىسى جيۋل ۆەرننىڭ شىعارماشىلىعى مەن «The Flying Airship» اتتى چەح ءفيلمى سەبەپ بولعان. ينجەنەرلەر ۆەلوسيپەدتى جاساۋعا ءبىراز ۋاقىتتارىن جۇمساپتى. ولار ۆەلوسيپەدتىڭ ۆيرتۋالدى ءپروتوتيپىن جاساۋعا 4 اي, فيزيكالىق ءپروتوتيپىن دايىنداۋعا 4 اي, ونى سىناقتان وتكىزۋگە جانە جۇمىسىن جەتىلدىرۋگە تاعى ءبىراز اي جوعالتقان.
ۆەلوسيپەدتىڭ ۇزىندىعى – 3,8 مەتر, ەنى – 2,5 مەتر, ۇزىندىعى – 1,2 مەتر, سالماعى – 95 كەلى. سونداي-اق, ول 170 كيلوعا دەيىن كوتەرىپ ۇشا الادى. قوزعالتقىشتار سانى – 4, قۋاتى – 10 كيلوۆاتت جانە قۋاتى 7 كيلوۆاتت بولاتىن 2 قوزعالتقىش بار. جالپى قوزعالتقىش قۋاتى – 54 كيلوۆاتت. ۇشاتىن ۆەلوسيپەدكە ورناتىلعان اۋا ۆينتتەرىنىڭ ديامەترى – 1 200 مم (نەگىزگى), 650 مم (تۇراقتاندىرۋ ءۇشىن). ۆەلوسيپەد قۋاتتى «Li-Po» اككۋمۋلياتورىنان الادى. ونىڭ جالپى سىيىمدىلىعى 50 امپەر-ساعات. سونىمەن قاتار, ۆەلوسيپەد تەك 3-5 مينۋت قانا ۇشا الادى. ەڭ جوعارعى جىلدامدىعى – 50 كم/ساعات.
«ۆەلوسيپەدتى توقپەن زاريادتاۋعا بولادى. سونداي-اق, پەدالدى اينالدىرىپ, اككۋمۋلياتورعا ەنەرگيا جيناۋعا مۇمكىندىك بار», دەيدى پاۆيلون قىزمەتكەرى.
قۋاتتى قاپتاما جانە بىرەگەي پانەل
مالايزيالىق عالىمدار بايلانىس قۇرالىن قۋاتتايتىن تەلەفون قاپتاماسىن ويلاپ تاۋىپتى. كۇن ەنەرگياسىنان كۇش الاتىن قۇرىلعىنىڭ يگىلىگىن كوپ ۇزاماي كورەتىن بولامىز. «Nanopac Innovation» كومپانياسىنىڭ ديرەكتورى چەن كوك لەوننىڭ ايتۋىنشا, كۇندىزگى ۋاقىتتا تەلەفوندى قاپتاماسىنا سالىپ, كۇن كوزىنە قويسا جەتكىلىكتى. قۋاتى ۇزاققا جەتەدى ەكەن.
مالايزيا پاۆيلونىنداعى تاعى ءبىر تەحنولوگيا – كۇن ساۋلەسىنەن قۋات وندىرەتىن پانەل. ونىڭ باستى ەرەكشەلىگى دالادا عانا ەمەس, عيمارات ىشىندە دە قۋات وندىرە بەرەدى. ول كۇن ساۋلەسىمەن قاتار, عيماراتتاعى كۇندىزگى جارىقتان, ەلەكتر جارىعىنان كۇش الىپ, قۋات بولەتىن الەمدەگى جالعىز تەحنولوگيا. پانەلدى جاساۋعا 10 جىل ۋاقىت كەتكەن. مالايزيادا كەڭسە, مەكتەپ جانە باسقا دا عيماراتتاردا ەكى جىلدان بەرى پايدالانىلىپ كەلەدى. بۇل تەحنولوگياعا كوپتەگەن ەل قىزىعۋشىلىق تانىتىپ وتىر. تايلاند ءوز ەلىندە پايدالانۋ ءۇشىن وسى جوبانى 1 ملن دوللارعا ساتىپ العان كورىنەدى. بىرقاتار ەلمەن بىرلەسكەن جوبالار دا جۇزەگە اسپاق.
«عيمارات تولىعىمەن وسى پانەلدەردەن جاسالسا, ول ەلەكتر قۋاتىن ءبىرشاما ۇنەمدەۋگە مۇمكىندىك بەرەدى. پانەلدىڭ 1,5 شارشى مەترى 600 ۆاتت ەنەرگيا بەرەدى. ال ونىمەن 2-3 ساعات سالقىنداتقىشتى جانە كۇنى بويى كومپيۋتەرلەردى قوسۋعا بولادى», دەيدى چەن كوك لەون.
