جيىندى اشقان ورتالىق سايلاۋ كوميسسياسىنىڭ توراعاسى بەرىك يماشەۆ سەنات دەپۋتاتتىعىنا تىركەلگەن ۇمىتكەرلەردىڭ سوڭعى ءتىزىمى ايقىندالعانىن ايتا كەلە, ءسوزدى وسك سايلاۋ پروتسەسىن ۇيىمداستىرۋ جانە وسك مۇشەلەرىنىڭ قىزمەتىن قامتاماسىز ەتۋ ءبولىمىنىڭ مەڭگەرۋشىسى ماقساتحان اناپينگە بەردى.
ونىڭ دەرەگىنشە, سەنات دەپۋتاتتىعىنان ۇمىتكەرلەردىڭ قاتارى – 38. اتىراۋ, قوستاناي, قىزىلوردا, پاۆلودار, سولتۇستىك قازاقستان وبلىستارى مەن الماتى قالاسىندا ءبىر ورىنعا – ءۇش, ال اقمولا, اقتوبە, جامبىل, شىعىس قازاقستان, باتىس قازاقستان, قاراعاندى, ماڭعىستاۋ, وڭتۇستىك قازاقستاندا ەكى كانديداتتان تىركەلىپتى.
– سايلاۋ ناۋقانى ەلىمىزدىڭ «سايلاۋ تۋرالى» زاڭىنا جانە ورتالىق سايلاۋ كوميسسياسىنىڭ قاۋلىسىندا بەكىتىلگەن پارلامەنت سەناتى دەپۋتاتتارىنىڭ كەزەكتى سايلاۋىن ازىرلەۋ جانە وتكىزۋ جونىندەگى ءىس-شارالاردىڭ كۇنتىزبەلىك جوسپارىنا سايكەس كەلەدى. دايىندىق بارىسىندا ورتالىق سايلاۋ كوميسسياسىنىڭ مۇشەلەرى وڭىرلەرگە قىزمەتتىك ساپارمەن بارىپ, داۋىس بەرۋ كۇنىنە ازىرلىك بارىسىمەن تانىسىپ قايتتى. سايلاۋ ناۋقانىن ۇيىمداستىرۋشىلار مەن قاتىسۋشىلارعا كومەك رەتىندە ادىستەمەلىك قۇرىلعىلار ازىرلەنىپ, ونىڭ ءماتىنى ورتالىق سايلاۋ كوميسسياسىنىڭ سايتىندا جاريالاندى, – دەدى ماقساتحان اناپيا ۇلى.
بيىلعى سەنات دەپۋتاتتارىن سايلاۋدىڭ ەرەكشەلىگى – تاڭداۋشىلاردىڭ ەلەكتروندىق تىركەۋدى دە پايدالانا الاتىندىعى. بۇل جايىندا دا تاڭداۋشىلارعا تولىققاندى اقپارات بەرىلگەن.
بۇگىندە وبلىستىق جانە استانا مەن الماتى قالالىق سايلاۋ كوميسسيالارى حالىقارالىق جانە جەرگىلىكتى بايقاۋشىلاردىڭ ءتىزىمىن العان. ولاردى تىركەۋ جۋرنالدارى دا دايىن تۇر.
ماقساتحان ءاناپيننىڭ ايتۋىنشا, داۋىس بەرۋ پۋنكتتەرى تالاپقا ساي جابدىقتالدى. داۋىس بەرۋ جۇرگىزىلەتىن عيماراتتاردا ءورت قاۋىپسىزدىگى شارالارى قاتاڭ ساقتالۋىنا, جارىقپەن, سۋمەن قامتاماسىز ەتىلۋىنە باسا ءمان بەرىلىپ, سايلاۋ بيۋللەتەندەرى قويىلعان نىساندارعا ارنايى كۇزەت ۇيىمداستىرىلعان.
سونىمەن, 28 ماۋسىمعا تاعايىندالعان پارلامەنت سەناتى دەپۋتاتتارىن سايلاۋعا داۋىس بەرۋ استانا ۋاقىتى بويىنشا ساعات 10.00-دە باستالادى. بارلىق اۋماقتاعى داۋىس بەرۋ پۋنكتتەرى داۋىس بەرۋگە ءبىر ساعات قالعاندا اشىلۋعا ءتيىس.
قىمبات توقتامۇرات,
«ەگەمەن قازاقستان»
