اتالمىش شارا حالىقارالىق تۋريزم جىلى اياسىندا بۇۇ بۇكىلالەمدىك تۋريستىك ۇيىمنىڭ قولداۋىمەن وتكىزىلۋدە.
كونفەرەنتسيانىڭ پلەنارلىق وتىرىسىنا قر پرەمەر-ءمينيسترىنىڭ ءبىرىنشى ورىنباسارى اسقار ءمامين, «استانا ەكسپو-2017» ۇق» اق باسقارما توراعاسى احمەتجان ەسىموۆ, بتۇ باس حاتشىسى تالەب ريفاي, قر مادەنيەت جانە سپورت ءمينيسترى ارىستانبەك مۇحامەدي ۇلى جانە استانا قالاسىنىڭ اكىمى اسەت يسەكەشەۆ قاتىستى.
2 كۇنگە جالعاساتىن كونفەرەنتسيانىڭ جۇمىسىندا قاتىسۋشىلار كومىرسۋتەك قالدىقتارىن ازايتۋ, تۋريزم سالاسىنىڭ دامۋى مەن باسەكەگە قابىلەتتىلىگىن ارتتىرۋ سياقتى ماسەلەردى, سونداي-اق بۇۇ-نىڭ كۇن تارتىبىندە قاراستىرىلعان 2030 جىلعا ارنالعان ءتۋريزمدى دامىتۋدىڭ باستى تەتىكتەرىن تالقىلايدى.
قالا باسشىسى ءا. يسەكەشەۆ ءوز سوزىندە اتاپ وتكەندەي, شاھاردا Forward كومپانياسىمەن ءتۋريزمدى دامىتۋ بويىنشا مەديا-جوسپار ازىرلەنگەن. قۇجاتتا ءتۋريزمدى دامىتۋدىڭ 3 نەگىزگى باعىتى ايقىندالعان: MICE (ىسكەرلىك) تۋريزم, قالالىق رەكرەاتسيالىق (ۇزىلىستىك) جانە مەديتسينالىق تۋريزم.
- 2020 جىلعا قاراي استانا قالاسىن ەۋرازيا كەڭىستىگىندەگى تۋريستەر ءۇشىن ەڭ تارتىمدى قالا ەتۋ ءبىزدىڭ جوسپارىمىزدا بار. استانا شاھارى ءارتۇرلى فورۋمدار مەن سامميت, ىسكەرلىك كەزدەسۋلەر مەن مادەني-سپورتتىق شارالاردى وتكىزەتىن باستى ورتالىقتىڭ بىرىنە اينالۋى ءتيىس. بۇل ماقساتتا قالادا اۋەجاي, تەمىرجول ۆوكزالى, قوناقۇيلەر مەن باسقا نىساندار, ءبىز سوزبەن ايتقاندا ينفراقۇرىلىم ساپالى ءارى جان-جاقتى جەتىلدىرىلىپ, دامۋدا, - دەدى قالا باسشىسى.
ەلوردادا 10 سپورتتىق, 20 زاماناۋي مەديتسينالىق جانە بىرقاتار بىرەگەي ساۋلەت نىسىندارى سالىنعان. بۇل نىسىنداردىڭ جوباسىن ازىرلەۋگە نورمان فوستەر, مانفرەدي نيكولەتتي سىندى الەمدىك ساۋلەتشىلەر تارتىلعان. ءبىز سپورت جانە مادەنيەت نىسىندارىنىڭ كاسىبي باسقارۋ ۇلگىسىن ەنگىزۋدى قولعا الدىق. بۇل نىسىنداردى جىلىنا ميلليونداعان تۋريستەر باراتىن مەكەنگە اينالدىرۋ قاجەت.
- سوندىقتان ءبىز ەلىمىزگە تۋريستەردى بارىنشا كوپ تارتۋعا, سپورتتىق, مادەني شارالاردى كوپتەپ وتكىزۋ ءۇشىن اتالعان نىسىنداردىڭ كاسىبي باسقارۋ ۇلگىسىن ەنگىزۋدى قولعا الدىق, - دەدى ءا. يسەكەشەۆ.
اتاپ وتكەن ءجون, بۇگىندە بريتاندىق تانىمال تەلەگراف (The Telegraph) باسىلىمىندا استانا قالاسى تۋرالى ماقالا جارىق كورگەن. وندا ەلوردامىز الداعى ۋاقىتتا تۋريستەر ءۇشىن ەڭ تارتىمدى شاھار بولا الادى دەپ جازىلعان.
