ءوڭىردىڭ بولاشاعى تەك ءبىر عانا مۇناي مەن گاز سەكىلدى ستراتەگيالىق شيكىزات كوزدەرىمەن شەكتەلمەيدى. ياعني وبلىستىڭ دامۋ يندەكسى تەك وعان تىرەلىپ تۇرعان جوق. بۇعان تاۋەلدى دە ەمەس. ويتكەنى ايماقتىڭ جەر قويناۋى باسقا دا تابيعي بايلىقتارعا تولى. بۇعان زەرتتەۋلەر جۇرگىزگەن وتاندىق عالىمدار وڭىردە مەندەلەەۆ كەستەسىندەگى حيميالىق ەلەمەنتتەردىڭ ءبارى دە كەزدەسەدى دەگەن بايلامعا تابان تىرەۋى دە تەكتەن-تەك ەمەس.
تالداۋلار مەن ساراپتامالار ەلىمىزدىڭ ىشكى جالپى ونىمىنە قوساتىن ۇلەستى كوتەرۋدىڭ بەتاشار تۇسى – بيىلعى تاۋىق جىلى ەكەنىن كورسەتەدى. سوندىقتان دا بيىل وڭىردەگى ەكونوميكالىق ءوسىمنىڭ كولەمىن 103 پايىزدان كەم تۇسىرمەۋ جونىندە كەشەندى شارالار شوعىرى ىسكە اسا باستادى. بۇل بيىك ماقساتقا قول جەتكىزۋدىڭ باستى جولى –جەرگىلىكتى بيلىك پەن بيزنەستىڭ ءوزارا ۇيلەسىمدى ءىس-قيمىلىن ودان ءارى تەرەڭدەتۋگە باعىتتالعان.
– كورسەتىلىپ وتىرعان مەجە اسا اۋقىمدى. الايدا ءبىز اتالعان ساندى اسپاننان الىپ وتىرعانىمىز جوق. بۇل ءۇشىن وسى ارالىقتا ارنايى تالداۋلار مەن ساراپتامالار جاسالدى. ءبىز ونىڭ جان-جاقتى, تەرەڭ, ناقتى ءارى ادىلەتتى تۇرعىدا جاساقتالۋىنا باسا كوڭىل بولدىك. مۇنداي ىستە ۇساق-تۇيەك دەگەن ۇعىم اتىمەن بولماۋعا ءتيىس. ءار كاسىپورىننىڭ مۇمكىندىگى قانداي بولاتىنىنا دا مۇقيات قاراي بىلدىك. سونداعى كوزىمىزدىڭ انىق جەتكەنى – پايدالانىلماي, قوسىلماي تۇرعان تەتىكتەردىڭ بار ەكەندىگى. ەڭ باستىسى, مەملەكەت تاراپىنان كورسەتىلىپ وتىرعان جان-جاقتى قولداۋدى ايتساڭىزشى. سونىڭ ءبارىن ەسكەرە, ەسەپتەي كەلىپ جوعارىدا كورسەتىلگەن ەكونوميكالىق وسىمگە توقتادىق, – دەدى گازەت تىلشىسىنە اقتوبە وبلىسىنىڭ اكىمى بەردىبەك ساپارباەۆ.
ءبىز بۇل ءوسىم الداعى ۇلكەن ءىستىڭ العاشقى قارلىعاشى عانا ەكەنىنە كوز جەتكىزە تۇستىك. وسى تارتىپكە جانە بەلگىلەنگەن كەستە مەن جۇيەگە سايكەس اتالعان ءىس الداعى ۋاقىتتا دا ءوز جالعاسىن تابا بەرمەك. وبلىستاعى ءىرى جانە ورتاشا ونەركاسىپ كاسىپورىندارىنا تۇراقتى تۇردە مونيتورينگتىك زەرتتەۋلەر جۇرگىزۋ ءتارتىبى وسى باستاۋدان تامىر تارتادى. ال وسى كەزدە قانداي دا ءبىر بولماسىن ءتۇيىندى ءارى تۇيتكىلدى ماسەلەلەر تۋىنداي قالسا, ونى دەر كەزىندە شەشۋ مەن تۇراقتاندىرۋدىڭ جولدارى دا قوسا قاراستىرىلعانى ۇلكەن سەنىم تۋعىزادى. سەزىك بولماسا, سەنىم ادامدى ەش ۋاقىتتا الدامايتىنى ايتپاسا دا بەلگىلى عوي.
ءوڭىر ەكونوميكاسىندا ونەركاسىپتىڭ ۇلەسى جەتەكشى ءرول اتقارعانىمەن مۇندا بيىلعى جىلى اۋىلشارۋاشىلىعى ءوندىرىسى بويىنشا دا ىرگەلى دە, ىلكىمدى ىستەردى اتقارۋ كوزدەلگەن. سالاداعى ءوسىمنىڭ باسىن – جەر رەسۋرستارىن ءتيىمدى تۇردە پايدالانۋ, سۋارمالى القاپتاردىڭ كولەمىن كوتەرۋ جانە اسىل تۇقىمدى مال شارۋاشىلىعى قۇرايدى دەپ كۇتىلۋدە. وڭىردە اگرارلىق سەكتوردى ءارتاراپتاندىرۋ جونىندە اتقارىلعان جۇمىستار قازىردىڭ وزىندە ءتيىستى ناتيجەلەر بەرۋدە. اسىرەسە ءداستۇرلى ەمەس اۋىل شارۋاشىلىعى وندىرىسىنەن الىناتىن ءونىم مولشەرىن كوبەيتۋ باستى ماقساتتىڭ بىرىنە اينالىپ كەلەدى.
ايماقتا قۇرىلعان اۋىل شارۋاشىلىعى كووپەراتيۆتەرى دە ءوڭىر ەكونوميكاسىن وركەندەتۋگە وڭ سەپتىگىن تيگىزە الاتىن فاكتور رەتىندە قاراستىرىلۋدا. بيىل بۇل ومىرشەڭ قۇرىلىمداردى تەحنيكالىق تۇرعىدان تولىق جاراقتاندىرۋ جۇمىستارى جۇزەگە اسپاق. كوپ نارسەنىڭ شەشىمى ءبىرىنشى كەزەكتە قاراجاتقا بايلانىستى ەكەنى تالاس تۋعىزبايدى. وسى ورايدا وبلىستاعى اۋىلشارۋاشىلىعى كووپەراتيۆتەرىنىڭ ءتورت اياقتارىنان تەڭ باسۋىنا ءتيىستى قاراجات بولىنگەنى دە ءسۇيىنىشتى ءجايت. تۇتاستاي العاندا قازىرگى كەزدە اۋىلشارۋاشىلىعى وندىرىسشىلەرىنە مەملەكەت تاراپىنان كورسەتىلىپ جۇرگەن قارجىلاي كومەك تۇرلەرى جەتكىلىكتى. ونى ءتيىمدى ءارى ۇنەمدى تۇردە پايدالانا بىلگەن سالا وكىلدەرى تەك ۇتارى انىق.
