بۇل فەستيۆالگە قىتاي حالىق رەسپۋبليكاسىنان, رەسەي فەدەراتسياسىنىڭ استراحان قالاسىنان, ءوز ەلىمىزدىڭ شىمكەنت, قاراعاندى, قوستاناي, قىزىلوردا, اقتوبە, اتىراۋ وبلىستارىنان جانە باتىس قازاقستان وبلىسىنان 21 ۇمىتكەر قاتىسىپ جاتىر. فەستيۆالدىڭ ماقساتى – ەسكەندىر اعامىزدىڭ اندەرىن ناسيحاتتاۋمەن بىرگە قازاق ۇلتتىق ەسترادا ورىنداۋشىلارىنىڭ شەبەرلىك دەڭگەيىن كوتەرۋ, تالانتتى جاستاردىڭ ونەرىنە جول اشۋ. ءان فەستيۆالىنىڭ قازىلار القاسى توراعاسى ەسكەندىر حاسانعاليەۆ اعامىزدىڭ ءوزى بولسا, القا قۇرامىندا قر ەڭبەك سىڭىرگەن قايراتكەرى, قر تۇڭعىش پرەزيدەنت قورى سىيلىعىنىڭ لاۋرەاتى, ءانشى-كومپوزيتور, چايكوۆسكي اتىنداعى الماتى مۋزىكالىق كوللەدجىنىڭ ديرەكتورى ءبىرجان حاسانعاليەۆ, قر ەڭبەك سىڭىرگەن ءارتيسى, ع.قۇرمانعاليەۆ اتىنداعى باتىس قازاقستان وبلىستىق فيلارمونيا ءانشىسى قاناتقالي قوجاقوۆ, «ەرەن ەڭبەگى ءۇشىن» مەدالىنىڭ يەگەرى, حالىقارالىق, رەسپۋبليكالىق بايقاۋلاردىڭ ع.قۇرمانعاليەۆ اتىنداعى باتىس قازاقستان وبلىستىق فيلارمونيا ءانشىسى مارات ساربوپەەۆ, ەسكەندىر حاسانعاليەۆ اتىنداعى حالىقارالىق «اتامەكەن» ءان فەستيۆالىنىڭ جانە حالىقارالىق, رەسپۋبليكالىق بايقاۋلاردىڭ لاۋرەاتى نۇرجان تاسبولاتوۆ, «ەرەن ەڭبەگى ءۇشىن» مەدالىنىڭ يەگەرى, ەسكەندىر حاسانعاليەۆ اتىنداعى حالىقارالىق «اتامەكەن» ءان فەستيۆالىنىڭ لاۋرەاتى, ع.قۇرمانعاليەۆ اتىنداعى باتىس قازاقستان وبلىستىق فيلارمونيا ءانشىسى جاڭىلسىن حاسانوۆا, قر مادەنيەت سالاسىنىڭ ۇزدىگى, قازاقستان جۋرناليستەر وداعىنىڭ مۇشەسى, باتىس قازاقستان وبلىستىق مادەنيەت, ارحيۆتەر جانە قۇجاتتاما باسقارماسىنىڭ ءبولىم باسشىسى ساۋلە كارابالينا بار. فەستيۆالدىڭ اشىلۋ سالتاناتى ورال قالالىق ساياباقتا ءوتتى. بارابانشىلاردىڭ باستاۋىمەن ۇمىتكەرلەر ساحنا تورىنە كوتەرىلدى. «اتامەكەن» انىمەن اشىلعان جەرەبە تاستاۋ راسىمىندە قازىلار القاسىنىڭ مۇشەسى ءبىرجان حاسانعاليەۆ قۇتتىقتاۋ ءسوز سويلەپ, ۇمىتكەرلەرگە ساتتىلىك تىلەدى. ودان ءارى ۇمىتكەرلەر «قىزعالداقتار» بي انسامبلىمەن بىرگە فلەش-موب بيلەپ, «اتامەكەن» ەمبلەماسىنا ءوز قولتاڭباسىن قالدىرىپ, ءتۇرلى-ءتۇستى شارلار ۇشىرىلدى.
ءان الامانىنىڭ اشىلۋ سالتاناتى مەن ءى كەزەڭى وبلىستىق قازاق دراما تەاترىندا 21 ماۋسىم كۇنى ساعات 14.00-دە باستالدى. كەشتە فەستيۆال يەسى ەسكەندىر حاسانعاليەۆ پەن ۇلى ءبىرجاننىڭ «اۋىلىم - ءانىم» شىعارماشىلىق كونتسەرتى وتۋدە.
ال 22 ماۋسىم كۇنى فەستيۆالدىڭ ءىى كەزەڭى قورىتىندىلانىپ, ءىح حالىقارالىق «اتامەكەن» ءان فەستيۆالىنىڭ جەڭىمپازدارىن ماراپاتتاۋ ءراسىمى جانە گالا كونتسەرت وتەدى.
قازبەك قۇتتىمۇرات ۇلى,
"ەگەمەن قازاقستان"
ورال
