وتانداسىمىز ءوزىنىڭ سوڭعى كەزدەسۋىن 27 مامىردا اقش-تىڭ فلوريدا شتاتىنداعى بوكا راتون قالاسىندا وتكىزگەن بولاتىن. مەكسيكالىق بوكسشى نوربەرتو گونسالەسپەن جۇدىرىقتاسىپ, تورەشىلەردىڭ شەشىمى بويىنشا جەڭىسكە جەتكەن ەدى.
– نوربەرتو گونسالەس وتە تاجىريبەلى بوكسشى. بوكستا ەشقاشان الدىڭدى بولجاي المايسىڭ. رينگتە ءبىر سوققى بارلىعىن شەشىپ كەتۋى مۇمكىن. مەكسيكالىق بوكسشىعا قارسى كەزدەسۋدە ماعان 12 راۋند تولىق جۇدىرىقتاسىپ, الداعى ماڭىزدى كەزدەسۋلەر الدىندا كۇشىمدى تەكسەرىپ الۋ كەرەك بولدى.
ول ەكسپو-2017 حالىقارالىق كورمەسى اياسىندا استانادا وتەتىن كەزدەسۋدە امەريكالىق تانىمال بوكسشى دجەيمس كيركلەندپەن جۇدىرىقتاسۋ مۇمكىن. قازىرگى تاڭدا بوكسشىنىڭ پروموۋتەرى نەلسون لوپەس كەلىسسوزدەر جۇرگىزىپ جاتقانىن ايتادى. «كارەرامداعى ەڭ ماڭىزدى كەزدەسۋلەرىمنىڭ ءبىرىن ءوز ەلىمدە, ءوز جانكۇيەرلەرىمنىڭ الدىندا وتكىزۋ مەن ءۇشىن ۇلكەن جەتىستىك. ماقساتىم – جانكۇيەرلەرىمە تارتىستى بوكس كەشىن ۇسىنۋ جانە ولاردىڭ سەنىمىن اقتاۋ. ەلوردامىزدا وتەتىن كەلەسى كەزدەسۋىم وڭايعا سوقپايتىنى انىق. ويتكەنى, بۇل جولعى قارسىلاسىم الەمدىك دەڭگەيدەگى بوكسشى بولماق. پروموۋتەرىم قازىرگى تاڭدا امەريكالىق بوكسشى دجەيمس كيركلەندتىڭ كومانداسىمەن كەلىسسوز جۇرگىزىپ جاتىر. جاقىن كۇندەرى رەسمي مالىمدەمە جاسايتىن بولامىز», دەيدى قانات يسلام.
ال, قاناتتىڭ پروموۋتەرى استاناداعى كەزدەسۋدە ميگەل كوتتومەن جەكپە-جەك ۇيىمداستىرعىسى كەلگەنىن ايتادى. بىراق, بوكسشىمەن گونورار جاعىنا كەلىسە الماعان. «ميگەل كوتتو جەكپە-جەك ءۇشىن بىزدەن 12 ميلليون دوللار سۇراپ جاتىر. بىزدە قازىر ونداي قارجى جانە تاڭداۋ دا جوق. بىراق, بەلبەۋىمىزدى قورعاۋ كەرەكپىز. قازىر رەيتينگ بويىنشا قاناتتان كەيىن تۇرعان كەز كەلگەن بوكسشى ونىمەن كەزدەسۋگە دايىن. دەگەنمەن, ءبىز الەمدىك تيتۋلدى يەلەنگىمىز كەلەدى», دەيدى نەلسون لوپەس.
قانات يسلام ەلوردادا وتەتىن جەكپە-جەككە استانا جانە الماتى قالالارىندا دايىندالادى. قانات بۇعان دەيىنگى جەكپە-جەكتەرىنە اقش-تا جاتتىققان بولاتىن. سونداي-اق, ول الماتىدا دا دايىندىق جۇمىستارىن جۇرگىزگەن.
– سوڭعى جەكپە-جەگىم اقش-تا وتكەن سوڭ دايىندىعىمدى سول جاقتا وتكىزدىم. قانشا دەگەنمەن, اقش – كاسىپقوي بوكستىڭ وتانى عوي. ال, بۇل جولعى كەزدەسۋىم قازاقستاندا وتەتىن بولعاندىقتان جاتتىعۋىم دا استانا جانە الماتى قالالارىندا بولادى. الداعى ۋاقىتتا اقش-تان كوماندام كەلەدى. سولارمەن دايىندالاتىن بولامىن.
سونىمەن قاتار, قانات يسلام ءوزىنىڭ قارسىلاستارى تۋرالى پىكىرىن ءبىلدىردى.
– مەنىڭ قارسىلاستارىم تۋرالى اركىم ءارتۇرلى ايتىپ جاتادى. ءوز باسىم ولاردىڭ اراسىندا مىناۋ ءالسىز, مىناۋ مىقتى دەپ ايتا المايمىن. مەن ءۇشىن بۇگىنگە دەيىن شىققان قارسىلاسىمنىڭ بارلىعى بىردەي. قازىرگى جەكپە-جەكتەرىم الداعى چەمپيوندىق اتاق ءۇشىن بولاتىن كەزدەسۋگە باسپالداق ىسپەتتى. ەگەر قارسىلاس تاڭداۋ مەنىڭ ەركىمدە بولسا, ەرتەڭ-اق چەمپيوندىق بەلبەۋ ءۇشىن شارشى الاڭعا شىعار ەدىم. گەننادي گولوۆكيننىڭ ءوزى كاسىپقوي بوكستا 15 جىل ءجۇرىپ, سوڭعى جىلدارى ۇلكەن كەزدەسۋلەر وتكىزىپ جاتىر. سوندىقتان, ءبارى ءوز ۋاقىتىمەن بولاتىنىن ايتقىم كەلەدى.
جۋرناليستەرمەن كەزدەسۋ بارىسىندا قانات يسلام 16 قىركۇيەكتە وتەتىن گەننادي گولوۆكين مەن ساۋل الۆارەس جەكپە-جەگىنە قاتىستى پىكىرىن ءبىلدىردى. قاناتتىڭ ويىنشا, كەزدەسۋ تولىق 12 راۋندقا سوزىلۋى مۇمكىن. «بۇل كەزدەسۋدى تەك قازاقستان نەمەسە مەكسيكا ەمەس, بۇكىل الەم جانكۇيەرلەرى كۇتۋدە. كەزدەسۋ گولوۆكينگە وڭاي سوقپايتىنىن ءىشىم سەزەدى. مەنىڭشە, جەكپە-جەك 12 راۋندقا سوزىلۋى مۇمكىن. گولوۆكيننىڭ جەڭىسىنە سەنىمەن جانە وعان تەك قانا ساتتىلىك تىلەيمىن», دەيدى ق.يسلام.
ءالي بيتورە,
«ەگەمەن قازاقستان»
