كورمە اياسىندا اۋقىمدى مادەني-ىسكەرلىك باعدارلامالار جۇزەگە استى. تانىمال مادەنيەت قايراتكەرلەرىمەن, اقىن-جازۋشىلارمەن كەزدەسۋلەر ۇيىمداستىرىلدى. ەتنومادەني بىرلەستىكتەردىڭ كونتسەرتتىك باعدارلامالارى دا كورەرمەن تاراپىنان ىلتيپاتقا يە بولدى.
كورمەنىڭ العاشقى كۇنىندە كينوتانۋشى ءنازيرا راحمانقىزىنىڭ «قازاق كينوسى: كەشە جانە بۇگىن» كىتابىنىڭ, تاريح عىلىمىنىڭ دوكتورى, پروفەسسور تالاس وماربەكوۆتىڭ «قازاقستان تاريحى», مەملەكەتتىك سىيلىقتىڭ لاۋرەاتى, جازۋشى قويشىعارا سالعارا ۇلىنىڭ «تۇرىكتەر», ۆيننيپەگ ۋنيۆەرسيتەتىنىڭ پروفەسسورى فرانك البونىڭ (كانادا) «استانا: ارحيتەكتۋرا, ميفى, پرەدنازناچەنيە» كىتاپتارىنىڭ تۇساۋكەسەرى وتكىزىلسە, ودان كەيىنگى كۇندەردە دە تۇساۋكەسەرلەر, كەزدەسۋلەر, فورۋمدار مەن شەبەرلىك سىنىپتارى ساتىمەن جالعاستى.
جۇرتشىلىقتىڭ رۋحاني الەمىن بايىتىپ, ءبىلىمىن ەسەلەپ ارتتىراتىن كورمە-جارمەڭكەدە اسىرەسە ءوزىمىزدىڭ قازاق اقىن-جازۋشىلارىمەن كەزدەسۋلەر, ولاردىڭ كىتاپتارىنىڭ تۇساۋكەسەر شارالارى «فەيسبۋك» الەۋمەتتىك جەلىسى ارقىلى جاقسى ناسيحاتتالدى. مىسالى, اقىن ۇلىقبەك ەسداۋلەتتىڭ «پەرىشتە قىز» كىتابىنىڭ, موڭعوليالىق قازاق اقىنى سۇراعان راحمەت ۇلىنىڭ «وسپان-چويبولسان» كىتابىنىڭ, اقىن داۋلەتكەرەي كاپ ۇلىنىڭ «تەرىسبۇراۋ» كىتابىنىڭ, اقىن مارجان ەرشۋدىڭ «دينا» كىتابىنىڭ تۇساۋكەسەرىنە وقىرماندار مولىنان جيىلدى. سونداي-اق, يسپان اقىنى حۋستو حورحە پادروننىڭ قازاق تىلىنە اۋدارىلعان «توزاق شەڭبەرلەرى» كىتابىنىڭ (اۋدارعان – اقىن تاناكوز تولقىنقىزى) تانىستىرىلىمى اۆتوردىڭ ءوزىنىڭ قاتىسۋىمەن ۇيىمداستىرىلدى. جالپى, اقىن-جازۋشىلارمەن كەزدەسۋلەرگە, ولاردىڭ كىتاپتارىنىڭ تانىستىرىلىمىنا باسىمدىق بەرىپ وتىرعان سەبەبىمىز – بيىل العاش رەت اقىن-جازۋشىلار قاۋىمى گولليۆۋد جۇلدىزدارى سىندى قىزىل كىلەم ۇستىمەن ءجۇرىپ ءوتتى. كورمە-جارمەڭكەدە قالامگەرلەرگە سولايشا قۇرمەت كورسەتىلدى.
كىتاپ كورمە-جارمەڭكەسىنىڭ اياسىندا تۇركى اكادەمياسى حالىقارالىق ۇيىمى (TWESCO) ۇيىمداستىرعان «رۋحاني جاڭعىرۋدىڭ وزەكتى ماسەلەسى: تۇركى سوزدىكتەرى مەن تىلتانىمدىق زەرتتەۋلەر» اتتى عىلىمي-پراكتيكالىق سەمينارىنىڭ دا ماڭىزى جوعارى بولدى.
سەميناردا ءبىر توپ عالىمدار تۇركى الەمىندەگى بەلگىلى تۇلعالاردىڭ شىعارماشىلىعى ارقاۋ بولعان باياندامالار جاسادى. مىسالى, تۇركىتانۋشى عالىم ءاجىباي كەرىم ۇلى «ايگىلى تۇركولوگ ءامىر ءناجىپتىڭ تۇركى سوزدىگىن جاساۋداعى تۇجىرىمدارى» دەگەن تاقىرىپتا بايانداما جاساسا, ا.بايتۇرسىنوۆ اتىنداعى ءتىل ءبىلىمى ينستيتۋتىنىڭ ديرەكتورى, پروفەسسور ەردەن قاجىبەك «ورتاق لاتىن ءالىپبيى – رۋحاني ەركىندىكتىڭ ءرامىزى» اتتى بايانداماسىن كوپشىلىككە ۇسىندى. ال, بەلگىلى فيلولوگ عالىم, پروفەسسور ءالىمحان جۇنىسبەك «لاتىن ءالىپبيىن جاڭعىرتۋدىڭ وزەكتى ماسەلەلەرى» تاقىرىبىندا بايانداما جاساپ, لاتىن الىپبيىنە ورالۋدىڭ كۇن تارتىبىندەگى كەلەلى ماسەلەلەرىن قوزعادى. سونداي-اق, تۇركى كەڭەسى اقساقالدار كەڭەسىنىڭ مۇشەسى, پروفەسسور ءادىل احمەتوۆتىڭ «اكادەميك ءابدۋالي قايداردىڭ تىلتانىمدىق زەرتتەۋلەرىنىڭ قۇندىلىعى» اتتى بايانداماسى اكادەميك مۇراسىنىڭ تۇركولوگيا عىلىمىنداعى ماڭىزىن كورسەتتى.
جيىن بارىسىندا TWESCO تاراپىنان ازىرلەنگەن جاڭا عىلىمي ەڭبەكتەر تانىستىرىلدى. اتاپ ايتقاندا, ايگىلى تۇركولوگ ءامىر ءناجىپتىڭ ء«حىV عاسىر تۇركى تىلدەرىنىڭ تاريحي-سالىستىرمالى سوزدىگى. قۇتىپتىڭ قۇسراۋ-شىرىن ەڭبەگى نەگىزىندە» اتتى ءتورت تومدىعىنىڭ, اكادەميك ءابدۋالي قايداردىڭ «ۇيعىر ءتىلى لەكسيكاسىنىڭ دامۋى» اتتى ەكى تومدىق عىلىمي ەڭبەگىنىڭ, كورنەكتى مەملەكەت جانە قوعام قايراتكەرى مىرزاتاي جولداسبەكوۆتىڭ «كونە تۇرك جازبا ەسكەرتكىشتەرى» كىتابىنىڭ, ءالىمحان جۇنىسبەكتىڭ «تۇركى ورتاق لاتىن ءالىپبيى» مونوگرافياسىنىڭ, سونداي-اق, موڭعول تىلىندە جاريالانعان «ماحامبەتتىڭ جىرلارى» (موڭعول تىلىنە اۋدارعان – اقىن جۇكەل حاماي) كىتابىنىڭ تۇساۋى كەسىلدى.
جالپى العاندا اقىن-جازۋشىلاردىڭ, تاريحشىلار مەن تۇركولوگتاردىڭ كىتاپتارىنان بولەك, بەلگىلى ساياساتتانۋشىلاردىڭ, قوعامتانۋشىلاردىڭ, جاراتىلىستانۋ عىلىمدارى سالاسىنداعى عالىمداردىڭ كىتاپتارىنىڭ تانىستىرىلىمدارى ءساتتى ۇيىمداستىرىلدى.
ايتا كەتەيىك, مادەنيەت جانە سپورت مينيسترلىگىنىڭ قولداۋىمەن «فوليانت» باسپاسى بيىل ەكىنشى رەت ۇيىمداستىرعان «Eurasian Book Fair – 2017» كىتاپ كورمە-جارمەڭكەسىندە ءتۇرلى سالاداعى كىتاپتارعا بايقاۋ جاريالانعان بولاتىن. «ۇزدىك وقۋ كىتابى» اتالىمى بويىنشا جوعارىدا اتالعان, تۇركى اكادەمياسى شىعارعان ءامىر ءناجىپتىڭ ءتورت تومدىق سوزدىگى كورمە-جارمەڭكەنىڭ باس جۇلدەسىنە, ياعني, گران-پري ديپلومىنا يە بولدى.
ايگۇل سەيىلوۆا,
«ەگەمەن قازاقستان»
