ساياسي قۇجاتتىڭ ءاربىر باسىمدىعى بويىنشا جەكە-جەكە توقتالعان اۋدان اكىمى وتىراردا «ەكونوميكانىڭ جەدەلدەتىلگەن تەحنولوگيالىق جاڭعىرتىلۋى» باسىمدىعى اياسىندا بيىل ۇدەمەلى يندۋستريالدى – يننوۆاتسيالىق دامۋ باعدارلاماسى بويىنشا قۇرىلىسقا قاجەتتى قامىس پليتاسى جوباسى ىسكە قوسىلاتىنىن ايتتى. جەرگىلىكتى «پسك «اق مەرگەن» جشس-ءى ۇيىتقى بولىپ وتىرعان جوبا جۇزەگە اسقاندا 30-دان استام جۇمىس ورنى قۇرىلاتىن بولادى. جىلىنا 750 مىڭ شارشى مەتر قامىس پليتاسىن جاساۋعا قاۋقارلى جوبا وبلىستاعى ەرەكشە ءارى جالعىز جوبا بولىپ وتىر.
«وتىرار اۋدانىندا بيىل ەگىستىك كولەمى 25 مىڭ گا بولادى دەپ ەسەپتەسەك, قاجەتتى تۇگەندەۋ (ينۆەنتاريزاتسيا) جۇمىستارىنىڭ ناتيجەسىندە ونىڭ كولەمى 3 مىڭ گا ۇلعايىپ, 28 گا جەتپەك. وعان قوسا, وسى جىلى سىرداريا مەن ارىس وزەندەرىندە سۋدىڭ مول بولۋىنا بايلانىستى, «قىزىل سۋدى» ەگىس القاپتارى مەن جايىلىمدىق جانە شابىندىق جەرلەرگە بۇردىق. ناتيجەسىندە 10 مىڭ گەكتار جەر تەگىن سۋارىلدى. مۇنان بولەك, جاز ايلارىندا پايدا بولاتىن سۋ تاپشىلىعىنىڭ الدىن الۋ ماقساتىندا ارتىق سۋدى جينايتىن تابيعي ويپاتتى سايلاردى انىقتاپ, تىرشىلىك ءنارىن جيناپ قويدىق. ناتيجەسىندە, جاز مەزگىلىندە ماياقۇم مەن كوكساراي اۋىلىنداعى 2 مىڭ گا جۋىق ەگىستىك القاپتار وسى تاسقىنسۋدىڭ ەسەبىنەن سۋارىلماق. سونىمەن قاتار, كوكساراي سايى ماڭىن دەمالىس ايماعىنا اينالدىرىپ, بالىق شارۋاشىلىعىن قولعا الۋ جوسپاردا بار», - دەدى ە.ايتاحانوۆ.
مۇنان بولەك, جۇگەرى وسىرۋمەن اتى شىققان وتىرارلىقتار بىلتىر 5428 گا ەگىستىككە جۇگەرى ەكسە, بيىل ونىڭ كولەمى 2,5 مىڭ گا ارتىپ, اتالعان ءداندى داقىل ءتۇرى 8500 گا ەگىلمەك. وتىرار اۋدانىنىڭ كليماتى قارقىندى باۋ وسىرۋگە قولايسىز بولسا دا جوسپارداعى 65 گا ورنىنا 77 گا باۋ وتىرىعىزىلىپ, جوسپار 118,4 % ورىندالعان. جولداۋدا ايتىلعان نەگىزگى باعىت - كووپەراتيۆتەر ۇيىمداستىرۋ جۇمىستارى شەڭبەرىندە اۋداندا وتكەن جىلى 123 شارۋا بىرىگىپ 20 اۋىل شارۋاشىلىعى كووپەراتيۆى قۇرىلسا, بيىل 121 شارۋا بىرىگىپ, 13 اۋىل شارۋاشىلىعى كووپەراتيۆى قۇرىلىپ, جالپى سانى 33-كە جەتىپتى.
تىلشىلەرمەن كەزدەسۋدە ە.ايتاحانوۆ اۋداننىڭ اۋىز سۋ, تابيعي گازبەن قامتاماسىز ەتۋ, اباتتاندىرۋ, جول, كارىز جۇيەسى, ءبىلىم بەرۋ, دەنساۋلىق ساقتاۋ, تۋريزم سىندى سالالارىنداعى جاڭالىقتاردى دا ايتىپ بەردى. مالىمەتىنشە, ءتيىستى جۇمىستار جوسپار اياسىندا اتقارىلۋدا.
