اقپاراتتىق قاۋىپسىزدىك – ۇلتتىق قاۋىپسىزدىك ماسەلەسىمەن پارا-پار

كەشە پارلامەنت ماجىلىسىندە پالاتا توراعاسىنىڭ ورىنباسارى گۇلميرا يسىمباەۆانىڭ جۇرگىزۋىمەن «وتاندىق بۇقارالىق اقپارات قۇرالدارىنىڭ باسەكەلەستىككە قابىلەتتىلىگى جانە دامۋى ماسەلەلەرى» تاقىرىبىندا ۇكىمەت ساعاتى بولدى. وندا اقپارات جانە كوممۋنيكاتسيالار ءمينيسترى داۋرەن اباەۆ بايانداما جاسادى. مەملەكەتتىك ساياساتتىڭ ءمىن­دەتتەرى – بارلىق اقپارات جۇيە­سىنىڭ ەركىن جۇمىس ىستەۋى ءۇشىن جاعدايلار جاساۋ. باق سانى جىل سايىن ارتىپ كەلەدى. مۇ­نىڭ ءوزى قازاقستانداعى ءسوز بوس­تاندىعىنىڭ تىكەلەي دالەلى بولىپ تابىلادى. تاۋەلسىزدىك العان 25 جىلدىڭ ىشىندە باق سانى 3002-گە جەتكەن. بۇل مەملەكەتتىڭ باق-تى جان-جاقتى قولداپ وتىرعانىن كورسەتەدى, دەي كەلىپ, وسىدان ءارى گۇلميرا يسىمباەۆا بايانداما جاساۋ ءۇشىن ءسوزدى اقپارات جانە كوممۋنيكاتسيالار ءمينيسترى داۋرەن اباەۆقا بەردى. بۇگىنگى تاڭدا اقپاراتتىق قاۋىپسىزدىك ماسەلەسى كەز كەلگەن مەملەكەتتىڭ ۇلتتىق قاۋىپسىزدىك ماسەلەسىنە اينالدى. سوندىقتان دا مەملەكەت باسشىسىنىڭ تاپسىرماسىمەن اقپارات جانە كوممۋنيكاتسيالار مينيسترلىگى قۇرىلىپ, وعان كوپتەگەن ءمىن­دەتتەر جۇكتەلدى. وسىعان ءساي­كەس مينيسترلىك وتاندىق ماسس-مەديانى جاڭعىرتۋ جانە ەلىمىزدىڭ اقپاراتتىق كەڭىس­تىگىن نىعايتۋعا قاتىستى ىرگەلى شا­رالاردى جۇزەگە اسىرۋ ءۇستىن­دە. قازىر مەدياقۇرالدار بۇرىن-سوڭدى بولماعان جاڭا تەحنو­لوگيالاردىڭ ارقاسىندا ءپىشىمى مەن مازمۇنىن جاڭعىرتىپ, اقپارات تاراتۋدىڭ تىڭ ادىستەرىن تابۋدا. بۇل – تەك ءبىزدىڭ ەلىمىزدە عانا ەمەس, جاپپاي الەمدە بولىپ جاتقان ءۇردىس, دەپ باستادى ءوزىنىڭ ءسوزىن د.اباەۆ. ودان ءارى مينيستر جاسالىپ جات­قان جۇمىستار جونىندە باياندادى. بۇگىنگى تاڭدا قازاقستاندا 3 مىڭنان ارتىق باق تىركەلگەن. وقىرمانداردىڭ بەلسەندىلىگى تومەندەدى دەپ ساناعانىمىزبەن, گازەتتەر مەن جۋرنالدار بارلىق باق-تىڭ 84 پايىزىن قۇرايدى. ەلەكتروندىق باق – 9 پايىز. بۇل – 110 تەلەكومپانيا, 60 راديوكومپانيا, 107 كابەلدىك وپەراتور جانە 8 سپۋتنيكتىك حابار تاراتۋ وپەراتورلارى. سونداي-اق, اقپارات اگەنتتىگى (41) – 7 پايىزدىق ۇلەستى قامتيدى. مينيسترلىكتىڭ وقىرماندار سۇرانىسىن زەرتتەۋ بويىنشا جۇرگىزگەن الەۋمەتتىك ساۋالداماسىنا قاراعاندا, قازاق­ستان­دىقتاردىڭ 88 پايىزى وتان­دىق ارنالاردى قارايدى, سونىڭ ىشىندە 53 پايىزى ونى كۇندە كورەدى. تەلەحابارلار قوعامدىق وزگە­رىستەردىڭ كاتاليزاتورى بولىپ قالا بەرەتىنى كورىنىپ تۇر. سون­دىقتان, ءبىزدىڭ مىندەتىمىز – ۇلت­تىق بىرتەكتىلىكتى قۇرۋداعى ءرولى زور, ەتنوسارالىق جانە كون­فەس­سياارالىق كەلىسىمدى جۇيەلى تاراتاتىن جانە الەۋمەتتىك-ساياسي تۇراقتىلىقتى ارتتىراتىن ونىڭ حابارلارىن ودان ءارى قولداۋ, دەدى مينيستر. د.اباەۆ ءاربىر ارناعا جەكە توق­تالىپ ءوتتى. سونىڭ ىشىندە «قازاق­ستان» تەلەارناسىنىڭ حابارلا­رىنا جاقسى باعا بەردى. الدا­عى ۋاقىتتا بۇل ارناعا كەلەسى ءمىن­دەتتەر جۇكتەلىپ وتىر ەكەن: 1. باعدارلامالاردىڭ رەيتينگىن ارتتىرۋ ارقىلى كورەرمەندەر اۋديتورياسىن كەڭىتۋ; 2. ونىمدەردىڭ رەيتينگىنە قاراي كونتەنتتەردى ساتىپ الۋدىڭ جاڭا ساياساتىن جاساۋ جانە كونتەنتتىڭ جەتىلدىرىلگەن ساياساتىن جاساۋ ارقىلى 2017 جىلى ونىڭ ساپاسىن ارتتىرۋ; 3. ينتەرنەتتە جاڭا يميدجدىك شىعارىلىمدار جاساۋ ارقىلى مەديا-رەسۋرستار كولەمىن ارتتىرۋ; 4. قىزمەتكەرلەردىڭ بىلىكتىلىگىن ارتتىرۋ, ولاردى كونكۋرسپەن قابىلداۋدى جەتىلدىرۋ. سونداي-اق, مينيستر وبلىستىق في­ليالداردىڭ باسقارۋدى جە­تىل­دىرۋ ارقىلى كورپورتسيانىڭ ايماقتىق ساياساتىن قايتا قاراۋ قاجەتتىگىن اتاپ ءوتتى. «حابار» اگەنت­تىگىن ترانسفورماتسيالاۋ جونىندە دە ءبىرشاما جۇمىستار جۇرگىزىلگەنى ايتىلدى. ونى قارايتىنداردىڭ ورتا جاسى 25-تەن 54-كە دەيىنگىلەر ەكەن. وسىعان قاراعاندا, «حابار» كوپ جانرلى كونتەنتى بار تەلەارنا ەكەنى انىقتالعان. قازىر وندا تاڭەرتەڭگىلىك جانە كۇندىزگى جاڭالىقتار تاراتۋ توقتاتىلعان. ەسەسىنە كەشكى جاڭالىقتار قىزمەتى جەتىلدىرىلە تۇسكەن. سونىمەن بىرگە, ارنادا ءوز ونىمدەرىن دايىنداۋ ارت­تىرىلىپ كەلەدى ەكەن. قازىر شاما­مەن جىل سايىن 110 سەريا ءتۇسى­رىلىپ, 10 وتاندىق ءونىم ومىرگە كەلىپ جاتىر. مينيستر قازىر «حابار-24» اتال­عان بۇرىنعى «24كZ» ارنا­سىنىڭ جۇمىسىنا دا توقتالىپ, ونداعى وزگەرىستەر تۋرالى ايتىپ ءوتتى. ودان ءارى مينيستر ءوزىنىڭ ءسوزىن بىلاي جالعاستىردى: «بيىلعى جىلدىڭ قازان ايىندا «ءبىلىم جانە مادەنيەت» ارناسى «قازاقتۆ» ارناسىمەن بىرىكتىرىلىپ, جاڭا پىشىمدەگى تەلەارنا رەتىندە حابار تاراتۋعا كوشتى. تەلەارنا الەم ەلدەرىنە تاۋلىگىنە 24 ساعات بويى قازاق جانە اعىلشىن ءتىل­دەرىندە حابار تاراتادى. ول ءتورت قۇر­لىقتا 118 مەملەكەتتى قامتىپ وتىر. جاڭا ارناداعى حابارلار 3 بلوكقا بولىنگەن. ولار: 1.ەلى­مىزدىڭ ينۆەستيتسيالىق تار­تىم­دىلىعى مەن شەتەلدىك كاپي­­تالعا قاجەتتى مۇمكىندىكتى كورسەتۋ; 2.قازاقستانداعى تۋريزمگە قاتىستى كونتەنت; 3.قازاق حالقى­نىڭ باي مادەني-تاريحي مۇراسىن ناسيحاتتاۋ», دەدى د.اباەۆ. راديوارنالارداعى وزگەرىستەر مەن جاڭالىقتار تۋرالى ايتقاندا, د.اباەۆ «قازاق راديوسىنىڭ» سيگ­نال­دارى قازىر ەلىمىزدىڭ – 90, «شالقار» راديوسى – 64, «استانا» راديو­سى – 60, «كلاسسيك» راديو-سى 17 پايىزدىق اۋماعىن قامتي­تى­نىن جەتكىزدى. ولاردىڭ تارا­لىمىن ارتتىرۋ جۇمىستارى ودان ءارى جالعاسادى. سونىمەن قاتار, ءبىز را­ديونىڭ حالىق ارا­سىن­داعى تا­نىمالدىعىن ارتتىرۋ باعى­تىنداعى جۇمىستارعا دا نازار اۋدارامىز. سونىڭ ءبىرى رەتىن­دە راديوارنالارعا بولەك كورپو­را­­تسيالىق قۇرىلىم جاسالاتىنىن جەتكىزدى. ءباسپاسوزدى زەرتتەۋ بارىسىندا وقىرمانداردىڭ بەل­سەندىلىگى رەسپوندەنتتەردىڭ جاس شاماسىنا قاراي بولاتىنى بايقالعان. سونىڭ ىشىندە رەس­پون­دەنت­تەردىڭ 40 پايىزى گازەت­تەردە قىزىقتى ماتەريالدار بولماي­تىن­دىقتان, ونى اشپايتىنىن ايتقان. وسىعان بايلانىستى مي­نيستر­­لىك «ەگەمەن قازاقستان» جانە «كازاحستانسكايا پراۆدا» گازەت­­تەرى­نىڭ جۇمىسىن جاڭعىرتۋ باعى­تىندا جۇيەلى جۇمىستار جۇرگى­زۋدە. الەمدەگى بەدەلدى باسىلىم­داردىڭ ۇلگىلەرىنە ساي ءۇستىمىز­دەگى جىلدىڭ قىركۇيەك ايىنان باستاپ اتالعان گازەتتەر بەت-بەينەسىن وزگەرتتى. بۇل قاجەتتى اقپاراتتى باسىلىمنان وڭاي تا­بۋعا مۇمكىندىك بەرەدى. سونداي-اق, گازەتتىڭ ەلەكتروندىق نۇسقاسىنا جەدەل وتۋگە مۇمكىندىك تۋدى. قىر­كۇيەك ايىنان باستاپ استانا قالاسىندا تاراتىلاتىن گازەتتەر ءتۇرلى-ءتۇستى نۇسقاعا كوشىرىلدى. ين­تەرنەت جەلىسىندەگى جۇمىسى دا كۇشەيتىلدى. ال جاڭا جىلدان باستاپ بۇل باسىلىمداردى ەۋرو­فورماتقا كوشىرۋ جوسپارلانۋدا», دەدى مينيستر. ودان ءارى مينيستر ينتەرنەت رەسۋرستارىنىڭ جۇمىسىن جەتىل­دىرۋ باعىتىنداعى جۇمىس­تارعا توقتالدى. وسىعان وراي مي­نيسترلىك «قازكونتەنت» اق-پەن بىرلەسىپ, «2016-2020 جىلدارعا ارنالعان وتاندىق باق-تاعى ين­تەرنەت رەسۋرستارىن جاڭعىرتۋ» جوسپارىن ىسكە اسىرۋدا ەكەنى بەلگىلى بولدى. سونىڭ ىشىندە «ب-نيۋس», «ادەبيەت پورتالى», ت.ب. سايتتاردا بولاتىن وزگەرىستەر تۋرالى باياندالدى. ال «قازاقپارات» اگەنتتىگىنە ارنايى توقتالىپ, ونداعى وزگەرىستەردى تەرەڭىرەك قاراستىردى. الدىمەن ونىڭ تەحنيكالىق ينفراقۇرىلىمدارى جاڭعىرتىلعانىن جەتكىزدى. بۇگىنگى كۇنى ونى قولداناتىنداردىڭ سانى تاۋلىگىنە 45 مىڭ ادامدى قۇرايدى. ءبىز بۇل ساندى ەكى ەسەگە دەيىن ارتتىرۋدى جوسپارلاپ وتىرمىز, دەدى داۋرەن اسكەربەك ۇلى. ستراتەگيالىق دامۋ بو­يىن­شا قانداي قاجەتتىلىكتەر الدا تۇرعانىنا توقتالعاندا, كوپتە­گەن قازاقستاندىق باق-تىڭ ەكو­نو­ميكالىق جاعدايى قيىن ەكەندىگى جەتكىزىلدى. ءبىز ولاردى قولداۋ شارالارىن قاراستىرۋدامىز. بۇگىنگى كۇنى جارنامادان تۇسەتىن قاراجات 36 ملرد تەڭگەنى قۇراپ وتىر. الايدا, بۇل سوما باق-تاردىڭ بارلىق شىعىستارىن جابا المايدى. وسىعان وراي مينيسترلىك قوعامدىق تالداۋعا شىعارىلعان زاڭ جوباسىندا ولاردى ىنتالاندىرۋدىڭ كەلەسى شارالارىن قاراستىردى: 1.جۇمىسىن توقتاتۋ نەمەسە تيراجدى تۇتقىنداۋ جونىندەگى اكىمشىلىك جازالاۋ شارالارىن بولدىرماۋ, سونداي-اق, ۋاكىلەتتى ورگانعا قاعاز بەتىندەگى نۇسقانى مىندەتتى تۇردە جەتكىزۋ ءتارتىبىن وزگەرتۋ ارقىلى ەكونوميكالىق جۇكتەمەنى جەڭىلدەتۋ; 2.جۋرناليست بولماسا دا وسى سالادا جۇمىس ىستەيتىندەردى اقپاراتتىق كەڭىستىككە تارتۋدى ارتتىرۋ; 3.كەيبىر نورمالاردى دالدىكپەن پايدالانباۋدىڭ كەسىرىنەن باق جۇمىسى مەن ولار­دىڭ دامۋىنا كەدەرگى كەل­تىرە­تىن قاتەلىكتەردى بولدىرماۋ; 4.ال­كوگولدىگى تومەن ونىمدەردىڭ ساۋدا ماركالارىن قاتاڭ بەلگىلەنگەن ۋاقىتتا جارنامالاۋعا رۇقسات ەتۋ; سونداي-اق, باق-تىڭ شىعار­ما­شىلىعى مەن تەحنيكالىق ءمۇم­­كىنشىلىگىن ارتتىرۋ ماق­ساتىندا «تەلە-ساۋدا», «تەلە-گازەت», «ين­تەر­نەتتۆ» سياقتى قوسال­قى سي­پاتتاعى تاۋارلار تۇسىنىك­تەرى ەن­گىزىلەدى. وسى شارالار­دىڭ ءبارى وتاندىق باق-تىڭ ءبا­سەكەگە قا­بىلەتتىلىگىن ارتتىرۋعا باعىتتالد­ى, دەدى مينيستر. ودان ءارى ول قا­زاقستاندىق تۆ تاراتۋ ساپاسى­نا توقتالدى. سونىڭ ىشىندە «وتاۋتۆ» مەن «قازسپورتتاعى» وزگەرىس­تەردى اتاپ ءوتتى. ال ءباسپاسوز تۋرالى ايتقاندا, ولاردىڭ جاڭالىقتار تاراتۋدا ينتەرنەت­پەن, اگەنتتىكتەرمەن, راديومەن باسەكەلەس بولا المايتىنىن كولدەنەڭ تارتتى. سوندىقتان ونىڭ ورنىن ساپالى ساراپتامالىق ماتەريالدارمەن تولىقتىرۋدى قالاپ وتىرمىز. ولار بىردەڭەنىڭ بولعانىن ەمەس, نەگە بولعانىن حالىققا تۇسىندىرۋلەرى كەرەك, دەدى مينيستر. «بۇل باعىتتا سالالىق جۋرنا­ليستەردى دامىتۋعا ارنايى كوڭىل بولەمىز. ياعني, جاڭا تەح­نو­لو­گيالارعا جانە وقىرمانداردىڭ كۇندەلىكتى سۇرانىسىنا يكەمدى جۋر­ناليستەردى دايىنداۋ مىندەتىن العا قويىپ وتىرمىز. سونىڭ ءىشىن­دە ساياسات, ەكونوميكا جانە قۇقىق بويىنشا جۋرناليستەردىڭ بىلىكتىلىگىن ءتۇرلى اۋديتورياعا باع­دارلاي وتىرىپ ارتتىرۋىمىز كە­رەك» دەدى داۋرەن اسكەربەك ۇلى. سون­داي-اق, ول جۋرناليستەردىڭ بىلىكتىلىگىن ارتتىرۋ سالاسى بو­يىنشا ورتالىقتاندىرىلعان جۇيە جاساۋدىڭ قاجەتتىلىگىن ايتتى. بۇل باعىتتا جۋرناليستىك سەمينارلار, ترەنينگتەر جاسالاتىنى جەتكىزىلدى. ءسوزىنىڭ سوڭىندا داۋرەن اباەۆ الدىمىزدا كوپتەگەن ءىس-شارا­لاردى ىسكە اسىرۋ مىندەتى تۇر. ەڭ باستىسى – بۇگىنگى كۇنى ماقساتتار مەن مىندەتتەر ايقىندالىپ, جۇ­مىس جۇيەلى جولعا قويىلدى, دەدى. ءمينيستردىڭ بايانداماسى تولىق ءارى جان-جاقتى ەكەندىگىن سويلەگەن دەپۋتاتتاردىڭ ءبارى دە قاناعاتپەن اتاپ ءوتتى. قوسىمشا باياندامانى ءماجىلىستىڭ الەۋمەتتىك-مادەني دامۋ كوميتەتىنىڭ ءتورايىمى گۇلنار ىقسانوۆا جاسادى. ونىڭ بايانداماسىنىڭ ونە بويىنان باق سالاسىنداعى كەمشىن تۇستار مولىنان كورىندى. ساراپشىلاردىڭ ايتۋىنا قاراعاندا, قازاقستاندىق مەملەكەتتىك باق-تىڭ جاڭا قاتەر­لەرگە قارسى تۇرۋ قابىلەتى السىزدەۋ. جاڭا جاعدايعا لايىق­تى ۇلتتىق مۇددەلەردى قورعاۋ تەتىكتەرى جەتىلدىرىلمەگەن. حالىقپەن بايلانىس دارەجەسى تومەن. شەتەلدىك اقپا­راتتىق كونتەنتتىڭ ىقپالى كۇشتى. كيبەرشابۋىل سياقتى وسى زامانعى قاۋىپ-قاتەرگە قارسى تۇرۋ الەۋەتى ءالسىز. حالىقتىڭ مەملەكەتتىك باق-تارعا دەگەن سەنىمى تومەن. جۋرناليستىك زەرتتەۋلەردىڭ تارتىمدىلىعى ناشار. مەملەكەتتىك تاپسىرىس تەتىكتەرى ءتيىمدى ەمەس. مەملەكەتتىك ورگانداردىڭ كوممۋنيكاتسيانىڭ جاڭا فورماتىمەن جۇمىس ىستەۋ قابىلەتى دامىماي وتىر. ءجۇر­­گىزىلگەن ساۋالدامالارعا قارا­عاندا, حالىقتىڭ ۇشتەن ءبىرى اقپا­راتتى رەسەيلىك تەلەارنالاردان الادى. جارنامانىڭ 70 پايىزعا جۋىعى شەتەلدىك ارنالاردا جاسالىپ, قاراجات رەسۋرستارى شەتەلگە كەتىپ جاتىر, دەگەن سياقتى دەرەكتەردى العا تارتتى دەپۋتات. باياندامالار اياقتالعان سوڭ داۋرەن اباەۆ دەپۋتاتتاردىڭ كوپ­تە­گەن سۇراقتارىنا جاۋاپ بەردى. سونىڭ ىشىندە دەپۋتات ساۋىتبەك ابدراحمانوۆ ەفيرلىك تەلەراديوحابارلارىن تاراتۋدى 2017 جىلدان باستاپ تسيفرلىق ستاندارتقا كوشىرۋدى باستاۋىمىز كەرەك ەدى. سول مىندەت ورىندالا ما دەپ سۇرادى. قارجى جاعدايىنا بايلانىستى بۇل جۇمىستى اتقارۋ 2 جىلعا كەيىنگە شەگەرىلدى. بيىلعى جەلتوقسان ايىنان باستاپ ونى ماڭعىستاۋ وبلىسىندا باستايمىز, دەدى مينيستر. دەپۋتات يرينا ارونوۆا مەم­لەكەتتىك ءتىلدىڭ قارىمىن ارتتىرۋ ماسەلەسى تۋرالى سۇرادى. ونى با­رىنشا قاراپايىمداتىپ, تۇر­مىس­تىق دەڭگەيگە ءتۇسىرىپ جىبەرگەن جوقپىز با, دەدى ول. بۇل سۇراق وتە اۋقىمدى, ونى ۇزاق ۋاقىت تال­­­قى­لاۋعا تۋرا كەلەدى. ءتىلدىڭ ساۋات­­­تىلىعى جۋرناليسكە دە, ونى قابىلدايتىن اۋديتورياعا دا باي­­­لانىستى, دەي كەلىپ, مينيستر ونى جەڭىلدەتۋدىڭ دە زيانى جوق­تى­عىن اتاپ ءوتتى. بۇل سۇراقتى تولىق­­تىرعان گۇلميرا يسىمباەۆا قازاق ءتىلىنىڭ جەتىك ۇلگىسىن بۇرىن تەلە­ار­نالاردىڭ ديكتورلارى كور­سە­تەتىن ەدى, قازىر سول ماسەلە ەسكە­­رىل­مەيتىن سياقتى, دەدى. وعان مي­­نيستر شەتەلدىك ارنالاردىڭ ءتىل­دەردى جەڭىلدەتۋ مىسالىن العا تارتتى. ارينە, ءتىلدى جەڭىلدەتۋ ونى جۇ­تاڭداتۋ ەمەس, دەگەنمەن, ونى تەز قابىلداتۋ ماسەلەسىن دە ەس­كەرگەن ءجون, دەدى ول. بۇل سۇ­راقتى دەپۋتات بەكبولات تىلەۋحان دا جالعاستىرىپ, وسى ماسەلەگە الاڭداۋشىلىق بىلدىرەتىنىن جەت­كىزدى. بىرەۋلەرگە كوزسىز ەلىكتەۋگە بولمايدى. قازىر ديكتورلاردىڭ ءسوز ەكپىندەرىن دۇرىس قولدانباۋى ۇلكەن پروبلەماعا اينالدى, دەي كەلىپ, وتاندىق تەلە-راديو­ارنالارداعى مەملەكەتتىك ءتىلدىڭ ۇلەسى قانشا ەكەندىگىن سۇرادى. وعان مينيستر قازىر قازاق ءتىلىنىڭ ۇلەسى 53 پايىزدان جوعارى ەكەنىن ايتتى. ءبىز وعان كۇندەلىكتى مونيتورينگ جۇرگىزەمىز, دەدى ول. كوپتەگەن وسىنداي سۇراقتاردان كەيىن تالقىلاۋ بولىپ, وعان دەپۋتاتتار و.وكسىكباەۆ, ق.سۇلتانوۆ, ز.باليەۆا, س.ابدراحمانوۆ ءجا­نە ت.ب. قاتىسىپ, اقپاراتتىق قاۋىپ­سىزدىك, قازاقستاندىق باق-تى زامان تالابىنا ساي دامىتۋ جانە ت.ب. ماسەلەلەرگە الاڭداۋشىلىق ءبىلدىر­گەن ويلارىن جەتكىزدى. وتىرىستى قورىتىندىلاعان گ.يسىمباەۆا «ارىپتەستەرىمىزدىڭ بارلىق ۇسىنىستارى مەن ەسكەرت­پەلەرى مينيسترلىكتىڭ قىزمەتىندە ەسكەرىلىپ, ال پروبلەمالار مەن العا قويىلعان مىندەتتەر شەشىلەدى دەپ ۇمىتتەنەمىز», دەدى. ۇكىمەت ساعاتىنا ورتالىق مەم­لەكەتتىك ورگانداردىڭ, جەرگىلىكتى اتقارۋشى بيلىكتىڭ جاۋاپتى قىزمەتكەرلەرى, رەسپۋبليكالىق باق, قازمەديا ورتالىعىنىڭ, ور­تالىق كوممۋنيكاتسيالار قىزمە­تىنىڭ باسشىلارى قاتىستى. جاقسىباي سامرات, «ەگەمەن قازاقستان»