بىردە-ءبىر ارىز قاراۋسىز قالمايدى

«تاۋەلسىز قازاقستان» پويىزى شتابىنىڭ جەتەكشىسى وسىلاي دەدى استانا قالاسىنان باستاۋ العان, ەل تاۋەلسىزدىگىنىڭ 25 جىلدىعىنا ارنالعان «تاۋەلسىز قازاقستان» پويىزى وڭتۇستىكتىڭ شىعىس قاقپاسى سانالاتىن تۇلكىباس اۋدانىندا تىزگىنىن تارتتى. قۇرامىندا مينيسترلىكتەردىڭ جەتەكشى ماماندارى, ساراپشىلار, زاڭگەرلەر, مەديتسينا قىزمەتكەرلەرى بار پويىزدى اۋدان حالقى كوتەرىڭكى كوڭىل كۇيمەن قارسى الدى. تۇلكىباس تەمىرجول ستانساسى – الاشتىڭ قايراتكەر ۇلى, قازاق دالاسىنا العاش رەت تۇركسىب تەمىر جولىنىڭ تارتىلۋىنا ۇيىتقى بولعان تۇرار رىسقۇلوۆ اشقان بەكەتتىڭ ءبىرى ءارى بىرەگەيى. بىلاي ايتقاندا, سول داۋىردەن قالعان كوزى ءتىرى جادىگەر. ستانسا الاڭىندا پويىز دەلەگاتتارىنا وبلىس اكىمىنىڭ ورىنباسارى ۇلاسبەك سادىبەكوۆ وبلىس باس­شىسى جانسەيىت تۇيمەباەۆتىڭ قۇت­تىقتاۋىن جەتكىزىپ, 25 جىل ارا­لىعىندا وڭتۇستىك جەتكەن جەتىس­تىكتەردى قىسقاشا تۇيىندەدى. «تاۋەلسىز قازاقستان» پويىزى شتابى­نىڭ جەتەكشىسى ءامىرجان الپەيىسوۆ ءوز سوزىندە بۇل شارانىڭ حالىق پەن بيلىك اراسىنداعى التىن كوپىر ەكەندىگىن, شيرەك عاسىر­دا قازاقستان ءجۇرىپ وتكەن جول­دار­دىڭ جەتىستىكتەرىن ناسيحاتتاۋ­دان بولەك, ارناۋلى مامانداردىڭ حالىق­تىڭ الەۋمەتتىك, قۇقىقتىق ماسە­لەلەرىن شەشۋگە سەپتەسەتىندىگىن ايتتى. دەلەگاتتار قۇرامىندا جەتى مي­نيسترلىك پەن ءۇش ۇلتتىق كومپانيانىڭ جاۋاپتى قىزمەتكەرلەرى وسى ماقساتقا جۇمىس جاسايدى, دەدى. ايتقانداي, شاعىن كونتسەرتتىك باع­دار­لامادان كەيىن ولار ءوز جۇ­مى­سىنا شۇعىل كىرىسىپ كەتتى. الەۋ­مەتتىك, قۇقىق­تىق جانە مەديتسينالىق, اۋىل شارۋا­شىلىعى, ءبىلىم سالاسى سياقتى وزەكتى ماسەلەلەر بويىنشا ماماندار جەرگىلىكتى قىزمەتكەرلەرمەن بىرلەسە قوعامدىق قابىلداۋ وتكىزدى. بۇل پويىزدى كۇتىپ جۇرگەن حالىق كوپ ەكەن. اۋداندىق اۋرۋحانانىڭ ءىشى مەن سىرتى تولىپ-اق قالىپتى. جەرگىلىكتى مەديتسينا شەشە المايتىن ماسەلە كوپ. ءوزىن بەسكەمپىر بالعاباەۆ دەپ تانىستىرعان اقساقالدىڭ ەكى ازامات ۇلىن 2011 جىلى كوشەدە اۆتو­كولىك قاعىپ, قاشىپ كەتكەن. بۇگىندە كەشەگى اتپالداي ەكى ازامات ءى توپ مۇگەدەگى. دارەتكە وزدىگىنەن وتىرا ال­مايدى. ەكى كەلىن توركىنىنە كەتىپ قالعان. اقساقال ۇلدارىنىڭ دەرتىنە شيپا بولار ما دەگەن ۇمىتپەن كەلگەن. پويىز قۇرامىنداعىلار ايانىپ جات­قان جوق. جەرگىلىكتى جەردە ەمدەۋ مۇمكىن ەمەستەرگە رەسپۋبليكالىق كلينيكالارعا كۆوتا ماسەلەسىن شەشىپ بەرۋدە. قوعامدىق كەلىسىم كەڭەسى مەن «نۇر وتان» پارتياسىنىڭ قوعامدىق قابىل­داۋىندا بولدىق. مۇندا دا وزەك­تى ماسەلەلەر العا تارتىلۋدا. ماسەلەن, «كەلتەماشات» اۋىلى­نىڭ تۇرعىنى ءابىل كەرىمقۇلوۆ اق­سا­قالدىڭ ارىز ايتىپ, قاقپاعان قاقپاسى, اشپاعان ەسىگى قالماعانعا ۇقسايدى. جەكە باسىنىڭ ەمەس, اۋىلدىڭ ماسەلەسى. «باتىس ەۋروپا – باتىس قىتاي» اۆتوماگيسترالى 27 وتباسى تۇراتىن اۋىلدىڭ جانىنان وتكەندە, كولىك كىرىپ-شىعاتىن جول تاس­تاماي كەتكەن. اۋىل سىرتىندا كوپىر استى مال وتەتىن وتكەل بار, ادام جولى ۇمىت قالعان. سونىڭ سالدارىنان كەرشە­تاستاعى قاشىقتىعى 3,5 شاقىرىم مەكتەپكە وقۋشىلار مەن اتا-انالارى جانىن شۇبەرەككە ءتۇيىپ بارىپ ءجۇر. جەكە كولىكتەرى جوقتار تاكسي توقتاتىپ امالدايدى. پويىزداعىلاردىڭ قاتىسۋىمەن ەل تاۋەلسىزدىگىنىڭ 25 جىلدىعىنا ارنالعان «25 جىلدىڭ بەلەستەرى» اتتى ءدارىس-تانىستىرۋ, «تاۋەلسىزدىك تاريحى – ۇلت رۋحىنىڭ ولشەمى» تاقىرىبىندا زيالى قاۋىم جانە ارداگەرلەرمەن كەزدەسۋ وتكىزىلدى. «بەيبىتشىلىك جانە كەلىسىم» ۇلگىسى قازاقستان برەندى, «قازاقستاندىق بىرتەكتىلىك – قازاقستاندىقتاردىڭ جەكە جاۋاپكەرشىلىك فاكتورى» تاقىرىبىندا ەتنومادەني بىرلەس­تىكتەر مەن ۇكىمەتتىك ەمەس ۇيىمداردىڭ قاتىسۋىمەن كەزدەسۋلەر وتكىزىلىپ, تاۋەلسىزدىك جەتىستىكتەرى ايتىلدى. اۋداندىق اكىمدىكتىڭ ءماجىلىس زالىندا «تاۋەلسىز قازاقستان» پويىزى شتابىنىڭ جەتەكشىسى ءا.الپەيىسوۆ, استانا قالاسىنىڭ قوعامدىق كەلىسىم كەڭە­سىنىڭ مۇشەسى, پروفەسسور, قحا مۇشەسى ق.قازكەنوۆ, پارلامەنت ءماجىلىسىنىڭ V شاقىرىلىم دەپۋتاتى, قحا مۇشەسى ە.كاپپەل سياقتى قازاقستان حالقى اسسامبلەياسى وكىلدەرى تۇرعىنداردى قابىلدادى. اكتسيانىڭ ماقساتى بويىنشا بۇقارالىق اقپارات قۇرالدارىمەن وتكىزىلگەن بريفينگتە دەلەگاتتار جۋرناليستەر قويعان سۇراقتارعا جاۋاپ بەردى. «تاۋەلسىز قازاقستان» پويىزى شتابىنىڭ جەتەكشىسى بۇگىنگى قابىل­داۋ بويىنشا بىردە-ءبىر ماسەلەنىڭ جەردە قالمايتىندىعىنا سەندىردى. ونىڭ ايتۋىنشا, جەرگىلىكتى جەردە شەشىلۋى قيىن ماسەلەلەر حاتتالىپ, قازاقستان پرەزيدەنتى اكىمشىلىگىنە جولدانادى. ارقايسىنىڭ ورىن­دالۋ مەرزىمى بەلگىلەنگەندىكتەن, ءوتى­نىش, ارىز يەلەرىنە ەكى جاقتان دا جاۋاپ قايتارىلادى. سالالىق مي­نيستر­لىك­تەر مەن ۇلتتىق كومپانيا­لار كومەك­تەسەدى. ال تۇرعىن ءۇي كەزەگىن سەبەپ­سىز العا جىلجىتۋ, كەزەكتەن تىس دەما­لىس ۇيىنە جولداما اپەرۋ سياق­تى ءوتىنىش­تەر قابىلدانبايدى. سول سياقتى, سوت شەشەتىن ماسەلەلەر دە دەلە­گات­تاردىڭ قۇزىرىندا ەمەس. اۋدان بويىنشا وسى ۋاقىتتاردا 1,5 مىڭ­نان اسا ادام قابىلداۋدا بولىپ, كوپشىلىگى قاناعاتتانارلىق كوڭىل كۇيمەن شىقتى. كەشقۇرىم اۋىل جاستارى ورتا­لىق الاڭدا «مەنىڭ ەلىم – قازاقستان» تاقى­رىبىندا فلەشموب وتكىزىپ, سوڭى اۋداندىق مادەنيەت سارايىندا تاۋەل­سىزدىكتىڭ 25 جىلدىعىنا ارنالعان كونتسەرتكە ۇلاستى. كەش تۇنگە اۋىسقان تۇستا «تاۋەل­سىزدىك پويىزى» تۇلكىباس تەمىر جولىنان كيەلى قالا تۇركىستانعا اتتانىپ كەتتى. باقتيار تايجان, «ەگەمەن قازاقستان» وڭتۇستىك قازاقستان وبلىسى