وتباسى قۇندىلىعى بارىنەن قىمبات

ورتالىق كوممۋنيكاتسيا­لار قىزمەتىندە ىسكەر ايەلدەر قاۋىمداستىعىنىڭ «قازاقستانداعى گەندەرلىك ساياسات: «قازاقستان رەسپۋبليكاسىنىڭ 2006-2016 جىلدارعا ارنالعان گەندەرلىك تەڭدىك ستراتەگياسىن» ىسكە اسىرۋ ناتيجەلەرىن باعالاۋ» جوباسىنىڭ قورىتىندىسىنا ارنالعان بريفينگ ءوتتى. وعان پرەزيدەنت جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ مۇشەسى راۋشان سارسەمباەۆا, قازاقستاننىڭ ىسكەر ايەلدەر قاۋىمداستىعىنىڭ جوبا ۇيلەستىرۋشىسى گۇلزات تەمىرباەۆا, «ازاماتتىق باستامالاردى قولداۋ ورتالىعى» كوممەرتسيالىق ەمەس اق توراعاسى نۇرلان وتەشەۆ پەن استانا قالاسى تاجىريبەلىك پسيحولوگيا مەن پسيحوتەراپيا ءجونىن­دەگى ەۋرازيا ينستيتۋتى وكىلدىگى­نىڭ ديرەكتورى ليۋدميلا كۋليكوۆا قاتىستى. بۇل جوبانىڭ جۇمىسىمەن قازاق­ستاننىڭ ىسكەر ايەلدەر قاۋىم­داستىعى ازاماتتىق باستامالاردى قولداۋ ورتالىعى مەن ءدىن ىستەرى جانە ازاماتتىق قوعام مينيستر­لىگىنىڭ مەملەكەتتىك گرانتى اياسىن­دا اينالىسۋدا. ول «قازاقستان رەسپۋبليكاسىنىڭ 2006-2016 جىل­دارعا ارنالعان گەندەرلىك تەڭدىك ستراتەگياسىنىڭ» قورىتىندىسىن باعالاۋ, زورلىق-زومبىلىقسىز وتباسى مەن ەلىمىزدە ايەلدەردى ساياسي جاعىنان قولداۋ ماقساتىندا ىسكە اسىرىلۋدا. ءباسپاسوز ءماسليحاتىندا راۋشان سارسەمباەۆا قازىرگى كەزدە ەلىمىزدە ايەلدەردىڭ قۇقىن قورعاۋ ماقساتىندا اتقارىلىپ جاتقان جۇمىستار مەن قاۋىمداستىقتىڭ الداعى جوسپارلارى تۋرالى ويلارىمەن ءبولىستى. ول سوڭعى 10 جىلدا نازىك جاندىلار­دىڭ تۇرمىستىق جاعدايى جاقسارعا­نىن, ولاردىڭ قۇقىقتارىن ساقتاۋ ءۇشىن ءتيىستى جۇمىستاردىڭ جاسال­عا­­نىن اتاپ ءوتتى. دەگەنمەن, ول قوعام­دا ايەلدى الەۋمەتتىك قورعاۋ ماسەلەسى ءالى دە وزەكتى بولىپ وتىرعا­نىن, بىل­تىر تىركەلگەن قىلمىستاردىڭ سانى 65 325-كە جەتكەنىن ايتىپ, وتباسىندا ايەلدەردى قورلاۋعا قاتىستى قىلمىستار تىركەلەتىن بولسا, ولارعا زاڭ جۇزىندە كومەك بەرىلۋ كەرەكتىگىن ايتتى. «ىسكەر ايەلدەر قاۋىمداستىعى وسى باعىتتا جۇمىس ىستەۋدە. سونى­مەن بىرگە, ءبىزدىڭ ۇيىم اليمەنت تولەمەيتىن ەر ادامداردى جاۋاپ­قا تارتۋ ماسەلەسىمەن اينالىسىپ جاتىر», – دەدى ول. داستان كەنجالين, «ەگەمەن قازاقستان»