ونەگەلى ءومىرىنىڭ ەلۋ جىلى كەڭەس زامانىندا وتسە, كەيىنگى 25 جىلى – تاۋەلسىزدىكپەن تۇستاس ءارى تاعدىرلاس. اتا جاسىندا اتتان تۇسپەگەن جاسامپاز جاننىڭ ىزگى جاراتىلىسى, پاراساتتى بولمىسى جانىڭا شۋاق تاراتاتىنى انىق. مەن بىلەتىن رىمبەك – سەزىمتال, پايىمدى, بولجامدى ادام. سەگىز قىرلى, ءبىر سىرلى, جوعىن تاباتىن, بارىن ۇقساتاتىن, شاپشاڭ شەشىم قابىلدايتىن, توقمەيىلسۋدى بىلمەيتىن, كولگىرلىكتەن ادا, ىشكى دۇنيەسى باي, تالعامپاز, ىزدەنىمپاز, تالاپشىل كىسى. بۇل قاسيەتتەر وعان انا سۇتىمەن سىڭگەن. اناسى توقىراۋىن بويىنداعى اتاقتى تۇماباي بايدىڭ اسىنا الپىس اتان تۇيە بايلاعان وماش دەگەن بولىس بالاسىنىڭ قىزى ەكەن. ال سول وماشتىڭ بالالارى كەڭەستىك ءداۋىردىڭ العاشقى كەزەڭدەرىندە بايدىڭ تۇقىمى رەتىندە ءبىراز قىسپاق كورگەنىمەن, كەيىن الماتىدا وقىعان تاۋىرلەردىڭ ساناتىندا بولىپ, جاقسى قىزمەتتەر اتقارىپ, اۋقاتتى تۇرمىس-تىرشىلىك كەشكەن. سولاردىڭ ءبىرى – شەشەسىنىڭ تۋعان ءىنىسى عازيز دۇنيەدەن وتەر الدىندا رىمبەككە ءوزىنىڭ اقشا سالاتىن ءاميانىن اتاپ, ىرىمعا قالدىرىپتى. سوندىقتان بولار, رىمبەك ناعاشى جۇرتىنىڭ ارۋاعىن قاتتى سىيلايدى, ارقاشاندا ءوزىنىڭ تاعدىرىنا ولاردىڭ اتاق-ايبارىنىڭ, ىرىسىنىڭ جۇعىستى بولعانىن ايتىپ وتىرادى. سۇراپىل سوعىس باستالعان جىلى تۋعان رىمبەكتىڭ بالداۋرەن بالالىعى قيىن-قىستاۋ زامانعا تاپ كەلدى. تاۋقىمەت پەن تاپشىلىق ونى, ءوز تۇرعىلاستارى سەكىلدى, ەرتە ەسەيتتى. جىگەرىن جانىپ, بيىك مۇراتتارعا تالپىندىردى. مەكتەپ بىتىرگەسىن كەڭشاردىڭ قاتارداعى جۇمىسشىسى بولىپ جۇرگەن ۇلدارىنىڭ تاۋداي تالابى مەن قابىلەت-قارىمىن اڭعارعان اتا-اناسى اق باتاسىن بەرىپ, رىمبەكتى الماتىعا وقۋعا اتتاندىردى. اۋەلى تەحنيكۋمدا, ودان سوڭ ينستيتۋتتا اگرونوم ماماندىعىنىڭ قىر-سىرىن تۇگەل مەڭگەرىپ شىققان جىگىت كىندىك قانى تامعان وڭىرگە ورالىپ, شيرەك عاسىر تابان اۋدارماي قىزمەت ىستەدى. تارىداي بولىپ كىرگەن جەرىندە تاۋداي بولىپ جەتىلدى. وسى مەرزىم ىشىندە كەڭشاردىڭ باس اگرونومدىعىنان اۋداندىق پارتيا كوميتەتىنىڭ ءبىرىنشى حاتشىلىعىنا دەيىنگى ساتىلاردان ابىرويلى ءوتتى. شيراق ىسكەرلىگى, ۇيىمداستىرۋشىلىق دارىنى, مىندەتىنە ادالدىعى, ەلگە جاقىندىعى ارقاسىندا ەش قيىندىققا مويىماستان, ارقاشان كوزدەگەن مەجەدەن كورىندى. قاي جاۋاپتى جۇمىستا دا توڭىرەگىن تۇگەندەپ, قاراۋىنداعى قىزمەتكەرلەرىن قولداپ-قورعاپ ءجۇردى. قادامدارىن شالىس باستىرمادى, ەشبىرىنە زيان شەكتىرمەدى, بارشاسىنا شاراپاتىن تيگىزدى. «جاقسىمەن جولداس بولساڭ – جەتەرسىڭ مۇراتقا, جامانمەن جولداس بولساڭ – قالارسىڭ ۇياتقا» دەگەن ۇلاعاتتى ءسوز وسىندايدا ايتىلسا كەرەك. رىمبەك ءجۇنىسوۆتىڭ ەلگە جاساعان ەڭبەگى لايىقتى باعالاندى. ءحىى سايلانعان قازاق كسر جوعارى كەڭەسىنىڭ دەپۋتاتى, ەكى مارتە «قۇرمەت بەلگىسى» وردەنىنىڭ يەگەرى بولۋىمەن قاتار, وسى كۇنى قازاقستاننىڭ ەڭبەك سىڭىرگەن قايراتكەرى. ءوزى تۋىپ-وسكەن اۋداننىڭ قۇرمەتتى ازاماتى. جەتپىستىڭ جۋان ورتاسىنا جەتسە دە, قوعامدىق جۇمىستان قول ۇزگەن ەمەس. ىلگەرىدە «نۇر وتان» پارتياسى ساياسي كەڭەسىنىڭ مۇشەسى رەتىندە بەلسەندى ومىرلىك ۇستانىمىن تانىتسا, قازىر قازاقستان حالقى اسسامبلەياسىنىڭ مۇشەسى رەتىندە ەل ىنتىماعىن جاراستىرۋدىڭ بەل ورتاسىندا ءجۇرۋى دە ءبىر عانيبەت. نارىق زامانىنىڭ كىلتىن تاۋىپ, تىندىرعان شارۋاسىنىڭ ءوزى ءبىر توبە. استاناداعى «اقمولا-بەتون» جشس كومپانياسى» ديرەكتورلار كەڭەسىنىڭ توراعاسى رەتىندە 100-120 ادامدى جۇمىسپەن قامتاماسىز ەتىپ, ەل ەكونوميكاسىنا ۇلەس قوسىپ كەلەدى. ء«بىلىم مەن اقىل ءبارىن جەڭەدى. اقشا بايلىعىمەن رۋحاني بايلىقتى الماستىرا المايسىڭ» دەي وتىرىپ, «كوڭىلگە تۇيگەندەرىم», «توقىراۋىن توقىراماسىن» اتتى كىتاپتار جازۋ ارقىلى عۇمىرلىق تاعىلىمى مەن تاجىريبەسىن كوپپەن بولىسكەن رەكەڭ – قۇتتى شاڭىراقتىڭ يەسى. ونىڭ بۇگىندە ەل اعاسى, قوعام قايراتكەرى دارەجەسىنە كوتەرىلۋىنە جۇبايى – شۋاقتى وتباسىنىڭ اناسى ءبازيلا قاليقىزىنىڭ سىڭىرگەن ەڭبەگى جونىندە ايتپاي كەتۋ اعاتتىق بولار ەدى. ولاردىڭ باس قوسىپ, ورتاق شاڭىراق كوتەرگەندەرىنە جارتى عاسىر ۋاقىت ءوتىپتى. ءبازيلا دا حالىق قۇرمەتىنە بولەنگەن, ەل اراسىندا ەرەكشە ورنى بار, سۇلۋ دا سۇيكىمدى, كەلبەتتى دە كەرىمسال جان. ماماندىعى – دارىگەر. وتە مادەنيەتتى, ادامگەرشىلىگى جوعارى, ورتاسىنىڭ ءسانىن كەلتىرىپ, ءمانىن ارتتىرىپ وتىراتىن اقجارقىن, تازا نيەتتى, كەڭ جۇرەكتى اسىل ادام. قالجىڭ مەن ءازىلدى كەلىستىرىپ ايتقاندا, اينالاسىن كۇلكىگە كومىپ تاستايدى. ءدامدى تاعامدارعا تولى بەرەكەلى داستارقانى قاشان دا جايۋلى, قولى اشىق, قوناقتارىن قۋانا كۇتەتىن اسا كوركەم مىنەزدى وشاق يەسى. جولى بولار, باعى اشىلار ەر-ازاماتتىڭ جارى وسىنداي بولار. جۇبى جاراسقان رىمبەك پەن ءبازيلا – قازىر ۇلدارىن ۇياعا, قىزدارىن قياعا قوندىرىپ, 9 نەمەرەسى مەن 4 شوبەرەسىنىڭ قىزىعىنا كەنەلىپ وتىرعان ارداقتى اتا, ءاز اجە. قۇت قونعان اۋلەتتەرىنىڭ باقىتى مەن بەرەكەسى باياندى بولسىن دەيمىن.
تيشبەك تياجين,
حالىق اعارتۋ ءىسىنىڭ ۇزدىگى, دەربەس زەينەتكەر
