ساعىنتاەۆ سەمەيدەگى نازارباەۆ زياتكەرلىك مەكتەبىندە بولدى

قر پرەمەر-ءمينيسترى باقىتجان ساعىنتاەۆ شىعىس قازاقستان وبلىسىنا جۇمىس ساپارى بارىسىندا نازارباەۆ زياتكەرلىك مەكتەبىنىڭ سەمەي قالاسىنداعى بولىمشەسىنىڭ جۇمىسىمەن تانىستى, دەپ حابارلايدى primeminister.kz. 2016 جىلدىڭ سوڭىندا پايدالانۋعا بەرىلگەن, دارىندى بالالارعا ارنالعان مەكتەپتىڭ جاڭا عيماراتىن ارالاۋ بارىسىندا باقىتجان ساعىنتاەۆ ءوزىن-ءوزى تانۋ, نانوتەحنولوگيالار, بيوتەحنولوگيالار كابينەتتەرىن, قىش قۇمىرا شەبەرحاناسىن, اسحانا مەن كىتاپحانانى ارالادى. مەكتەپ ديرەكتورى ب. قايىرجانوۆ وقۋ ورنىنىڭ جەتىستىكتەرى تۋرالى ايتتى. نىساننىڭ بىرەگەيلىگى - 720 وقۋشىعا ارنالعان نەگىزگى وقۋ كورپۋسىنىڭ 120 ورىنعا ارنالعان جاتاقحانا كورپۋسى بار. مەكتەپتى جەتى جىل ىشىندە 466 تۇلەك بىتىرگەن, ولاردىڭ 34-ءى «التىن بەلگى» يەگەرى, 22-ءسى ۇزدىك اتتەستات يەگەرى. مەكتەپ تۇلەكتەرى ءوز وقۋلارىن ەلىمىزدىڭ جانە شەتەلدىك جوو-لارىندا جالعاستىرۋدا. نازارباەۆ ۋنيۆەرسيتەتىندە 156 تۇلەك, قر جوعارعى وقۋ ورىندارىندا – 283, شەتەلدە – 26 تۇلەك ءبىلىم الۋدا.