الماتىلىق كيىم وندىرۋشىلەر استانا نارىعىن يگەرۋدە

الماتى كيىم جانە اياق كيىم ءوندىرۋشى «قازجەڭىلونەركاسىپ-الماتى» جشس ءوزىنىڭ ءونىمىن «Mega Silk Way» ساۋدا ويىن-ساۋىق ورتالىعىنداعى جەكە بۋتيگىنىڭ سورەلەرىندە ۇسىنا وتىرىپ استانا نارىعىنا شىقتى, دەپ حابارلادى الماتى قالاسىنىڭ اكىمدىگى. بۇل كاسىپورىننىڭ استاناداعى ەكىنشى بۋتيگى, ءبىرىنشى بۋتيك «سامعاۋ» ساۋدا ورتالىعىندا ورنالاسقان. بۇدان باسقا, كومپانيا «Mega Alma-Ata» ساۋدا ويىن-ساۋىق ورتالىعىنداعى بۋتيگىمەن قوسا «Mega Park» ساۋدا ويىن-ساۋىق ورتالىعىندا جاڭا ساۋدا ورنىن اشۋدى جوسپارلاپ وتىر. جالپى, كاسىپورىننىڭ قازاقستان بويىنشا بارلىعى 4 بۋتيگى جۇمىس ىستەيتىن بولادى. بارلىق بۋتيكتەردە ەرلەر كيىمى مەن اياق كيىمى جانە مەكتەپ فورماسى ساتىلادى. وتكەن جىلدىڭ جەلتوقسان ايىندا كاسىپورىننىڭ يتالياندىق تەحنولوگيا بويىنشا 75-تەن استام ۇلگىدەگى ەرلەر اياق كيىمىنىڭ ءوندىرىسىن ىسكە قوسىلدى. جەلىنىڭ وندىرىستىك قۋاتى 2,5 ملرد. تەڭگە تاۋار اينالىمىمەن جىلىنا 150 000 جۇپ اياق كيىمگە جەتەدى دەپ بولجانۋدا. بۇدان باسقا, تىگىن بۇيىمدارىنىڭ وندىرىستىك قۋاتى جىلىنا 1,5 ملن. بىرلىكتى قۇرايدى. كومپانيا ءونىمىنىڭ قازاقستاندىق قامتۋداعى ۇلەسى 84%-عا دەيىن جەتتى. قازىرگى ۋاقىتتا فابريكا ءوڭىردىڭ ەڭ ءىرى جۇمىس بەرۋشىلەرىنىڭ ءبىرى بولىپ تابىلادى. كاسىپورىن اشىلعان ساتتەن بەرى جۇمىسشىلاردىڭ سانى 15 ەسەگە ءوسىپ, 30 ادامنان 450 ادامعا دەيىن ارتتى, ال ءوندىرىس كولەمى 7 ەسەگە ارتتى. سونداي-اق, كاسىپورىن جانىندا 2014 جىلدان بەرى «شەبەر» وقىتۋ ورتالىعى  جۇمىس ىستەيدى.