قازاقستان پرەزيدەنتى ن.ءا.نازارباەۆتىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى حالىققا جولداۋى ەلىمىزدەگى ءۇشىنشى جاڭعىرتۋدى جۇزەگە اسىرۋعا باعىتتالعان. وسىعان وراي ەلباسى قازاقستاننىڭ قابىلەتتىلىگىن قامتاماسىز ەتەتىن ەكونوميكالىق دامۋدىڭ جاڭا مودەلىن قۇرۋدىڭ قاجەتتىلىگى تۋرالى ماسەلە كوتەرىپ وتىر. پرەزيدەنت نەگىزگى باسىمدىقتاردى كورسەتتى, ونىڭ ويىنشا اتالعان باسىمدىقتار ەكونوميكانىڭ الەمدىك ءوسىمىنىڭ ورتا دەڭگەيدەن جوعارى قارقىنىن قامتاماسىز ەتۋگە جانە 30 وزىق ەلدىڭ قاتارىنا قاراي تۇراقتى تۇردە ىلگەرىلەۋگە مۇمكىندىك بەرۋى ءتيىس. مۇندا قامتىلاتىن نەگىزگى باعىتتار ەكونوميكانىڭ جەدەلدەتىلگەن تەحنولوگيالىق جاڭعىرتىلۋى, بيزنەس-ورتانى تۇبەگەيلى جاقسارتۋ جانە كەڭەيتۋ, ماكروەكونوميكالىق تۇراقتىلىق, ادام كاپيتالى ساپاسىن جاقسارتۋ, ينستيتۋتتىق وزگەرىستەرگە, قاۋىپسىزدىككە جانە سىبايلاس جەمقورلىقپەن كۇرەسكە باسىمدىق بەرۋ بولىپ تابىلادى. ءبىرىنشى كەزەكتە تسيفرلى تەحنولوگيالاردى قولدانۋ ارقىلى قۇرىلاتىن يندۋستريانى, باسىم سالالاردا باسەكەگە قابىلەتتى ەكسپورتتىق ءوندىرىستى, كەن مەتاللۋرگياسىن جانە مۇناي مەن گاز كەشەندەرىن دامىتۋ قولعا الىنباق. ەلباسى ەرەكشە نازاردى بيۋدجەت شىعىستارىنىڭ تيىمدىلىگىن ارتتىرۋ قاجەتتىلىگىنە, سونىمەن قاتار, مينيسترلىكتەر مەن ۆەدومستۆولاردىڭ قاراجاتتى يگەرۋىنىڭ تيىمدىلىگىن تەكسەرۋگە اۋدارادى. ەلدىڭ وڭتايلى الەۋمەتتىك-ەكونوميكالىق دامۋى ءبىرىنشى كەزەكتە جوعارى دارەجەلى كادرلاردى دايىنداۋدىڭ ساپاسىمەن انىقتالادى. پرەزيدەنت نۇرسۇلتان نازارباەۆ نەگىزگى مىندەتتەردىڭ ءبىرى قازىرگى زامانعى ەكونوميكالىق جاعدايعا بەيىمدەلە الاتىن ءبىلىم بەرۋ جۇيەسىنىڭ ءارى قاراي جاڭعىرتىلۋى دەپ ەسەپتەيدى. سوندىقتان, مەملەكەت باسشىسى ءبىلىم بەرۋدى ەكونوميكالىق ءوسۋدىڭ جاڭا مودەلىنىڭ ورتالىق بۋىنىنا اينالدىرۋدىڭ ماڭىزدىلىعىن اتاپ ءوتتى. بۇل ارادا بۇگىنگى وزەكتى ماسەلەلەردىڭ ءبىرى بولىپ تابىلاتىن ءۇش تىلدە ءبىلىم بەرۋگە ءوتۋدىڭ ماڭىزدىلىعى اتاپ كورسەتىلدى. مەملەكەت باسشىسى: «2019 جىلدان باستاپ 10-11 سىنىپتاردا كەيبىر پاندەردى اعىلشىن تىلىندە وقىتاتىن بولامىز», دەپ ناقتى ايتتى. تۇتاستاي العاندا, ەلباسى ءبىلىم بەرۋ جۇيەسىنىڭ ماسەلەلەرىن انىقتاپ بەرىپ وتىر. ول – مەكتەپتەردىڭ جانە مۇعالىمدەردىڭ دەڭگەيى, اسىرەسە, اۋىل مەن قالادا ونىڭ ءارتۇرلى بولۋى. بىلىكتى پەداگوگتاردىڭ جەتىسپەۋ ماسەلەسى. وسىناۋ اسپەكتىلەردى ەسكەرە كەلگەندە, پرەزيدەنتتىڭ تاپسىرماسىنا سايكەس, اعىلشىن ءتىلىن كەزەڭ-كەزەڭمەن قولدانىسقا ەنگىزۋىمىز ءومىر تالابىنا اينالۋى ءتيىس. پرەزيدەنت جوعارى ءبىلىم بەرۋ جۇيەسىنىڭ ساپاسىنا ەرەكشە نازار اۋداردى. بۇل جايت جاڭا فورماتسياداعى مامانداردى دايىنداۋ ءىسى وقىتۋشى قۇرامنىڭ كاسىبي بىلىكتىلىگىنە جانە ولاردىڭ قىزمەتتەرىن ۇيىمداستىرۋ دەڭگەيىنە تىكەلەي تاۋەلدى دەگەندى بىلدىرەدى. پرەزيدەنتىمىز نۇرسۇلتان نازارباەۆ جوعارى وقۋ ورىندارىنىڭ كادرلىق قۇرامىنا, ماتەريالدىق-تەحنيكالىق جابدىقتالۋ دەڭگەيىنە, ءبىلىم بەرۋ باعدارلامالارىنا قاتىستى باقىلاۋ مەن تالاپتىڭ كۇشەيتىلۋى قاجەتتىلىگىن اتاپ كورسەتتى. ءال-فارابي اتىنداعى قازاق ۇلتتىق ۋنيۆەرسيتەتىندە وقۋ ۇدەرىستەرى, بىتىرۋشىلەردىڭ بىلىكتىلىگى مەن داعدىلارى ەڭبەك نارىعىندا كەز كەلگەن وزگەرىستەرگە بەيىمدەلۋگە مۇمكىندىك بەرۋدە جانە ولاردىڭ جوعارى دەڭگەيلى كاسىبي مامان مەن باسەكەگە قابىلەتتى بولۋىنا باعىتتالعان. ۋنيۆەرسيتەتىمىزدە الەمدىك ستاندارتقا ساي كەلەتىن جاڭا وقۋ باعدارلامالارى دا جاسالدى. جولداۋدا پرەزيدەنت ۇلتتىق قاۋىپسىزدىك ماسەلەسىنە ەرەكشە نازار اۋدارىپ, قاۋىپسىزدىك احۋالىن قۋاتتى جانە ارەكەت ەتە الاتىن مەملەكەتتىڭ ولشەمى رەتىندە قاراستىرادى. ءدىني ەكسترەميزمنىڭ الدىن الۋ جۇمىستارىن جۇرگىزۋ, سونىڭ ىشىندە عالامتور مەن الەۋمەتتىك جەلىلەر دە نازارعا الىندى. ال ۇلتتىق قاۋىپسىزدىككە قاتەر توندىرەتىن ماسەلەلەردىڭ ءبىرى – سىبايلاس جەمقورلىق. سىبايلاس جەمقورلىق كوپ جاعدايدا كورسەتىلگەن ستراتەگيالىق جوسپارلارعا كەدەرگى جاسايدى. سوندىقتان دا ونىڭ سەبەپتەرى مەن العىشارتتارىن انىقتاۋ بويىنشا جۇمىستاردىڭ كۇشەيتىلىپ جۇرگىزىلۋى ماسەلەسى كۇن تارتىبىنە قويىلدى. ەلباسى ءوزىنىڭ حالىققا جولداۋىندا ەلدىڭ تەك جەتىستىگىن عانا ەمەس, سونىمەن قاتار, جۇيەلىك ماسەلەلەردى دەر كەزىندە ورنىقتى شەشۋ جايىنا دا كەڭىنەن توقتالدى. سوندىقتان, ۇكىمەت الدىندا تۇرعان مىندەتتەردى ءتيىمدى جۇزەگە اسىرۋ وتە ماڭىزدى شارا بولىپ تابىلادى.
گۇلنار ناسيموۆا,
ساياسي عىلىمدار دوكتورى الماتى
