قوستانايداعى «مەدەۋ» مەيرامحاناسىندا «جاستاردىڭ التىن كىتابى» لاۋرەاتتارىن ماراپاتتاۋ ءراسىمى ءوتتى. 2005 جىلى باستالعان ءداستۇر ون ءبىر جىلدان بەرى جالعاسىپ كەلەدى. بيىل «التىن كىتاپقا» لاۋرەات بولعان 12 جاسقا وبلىس اكىمى ارحيمەد مۇحامبەتوۆتىڭ ءوزى سەرتيفيكاتتار تابىس ەتتى.
«جاستاردىڭ التىن كىتابى» ءبىزدىڭ وبلىستاعى جاقسى ءداستۇردىڭ ءبىرى. اتاقتى سپورتشى جەرلەستەرىمىز وليمپيادا چەمپيوندارى, بوكشىلار ۆاسيلي لەۆيت, يۆان دىچكو جانە كونكيمەن سىرعاناۋدان الەم چەمپيونى دەنيس كۋزين «التىن كىتاپ» لاۋرەاتتارى بولاتىن. ال «جاستاردىڭ التىن كىتابى» لاۋرەاتتارىنىڭ ءبىرى ءاليا ساپاروۆا بۇگىندە رەسپۋبليكا پارلامەنتى ءماجىلىسىنىڭ دەپۋتاتى. «التىن كىتاپقا» ەسىمى ەنگەن وبلىس جاستارى قازىر كاسىپكەرلىكتە, عىلىمدا, مەملەكەتتىك قىزمەتتە, تاعى باسقا سالالاردا جەمىستى ەڭبەك ەتىپ ءجۇر. سولاردىڭ ءبىرى ەرلان قالماقوۆ وبلىسىمىزدىڭ مادەنيەت سالاسىن باسقارۋدى قولعا الدى. لاۋرەات جاستار بارلىق جاعىنان زامانداستارىنا ۇلگى», دەدى ارحيمەد بەگەجان ۇلى.
«التىن كىتاپتىڭ» جاڭا لاۋرەاتتارى دا ءومىردىڭ ءار سالاسىندا ۇزدىك اتانىپ جۇرگەن جاستار. مىسالى, ماليكا مۇحتاروۆا اربادا وتىرىپ سپورتتىق-بال ءبيىن بيلەۋدەن ازيا چەمپيونى اتاندى. ماليكا تالانتىن ۇشتاي ءتۇسۋى ءۇشىن وبلىس اكىمى ارحيمەد مۇحامبەتوۆ وعان 1 ميلليون 200 مىڭ تەڭگە تۇراتىن بيگە ارنالعان ارنايى اربا الىپ بەردى. ينديرا يۆانوۆا وبلىستاعى «ءتىل دارىن» كلۋبىن باسقارادى. ول وزگە ۇلت وكىلدەرىنە مەملەكەتتىك ءتىل ۇيرەتىپ, قازاق تىلىندە تازا سويلەيتىن جاستاردىڭ قاتارىن كوبەيتۋگە اتسالىسادى. ءار لاۋرەاتتىڭ وسىنداي ەرەكشە جەتىستىگى, تابىسى اتاپ ايتىلدى.
ون ءبىر جىلدىڭ ىشىندە وبلىستا «التىن كىتاپقا» 172 جاستىڭ ەسىمى التىن ارىپتەرمەن ويىلىپ جازىلدى. ولاردىڭ ىشىندە 44 لاۋرەات سپورتتاعى, 23 لاۋرەات مادەنيەت پەن ونەر سالاسىنداعى, 20 جاس ەرلىك كورسەتكەنى ءۇشىن, (ولاردىڭ بىرەۋى قايتىس بولعان سوڭ), 7 جاس دەنساۋلىق ساقتاۋ سالاسىنداعى, 16 لاۋرەات ءبىلىم سالاسىنداعى ۇزدىك جەتىستىكتەرى ءۇشىن ماراپاتتالعان ەدى. ولاردىڭ بارلىعى دا قوستاناي جاستارىنىڭ جارقىن وكىلدەرى.
ءنازيرا جارىمبەتوۆا, «ەگەمەن قازاقستان».
قوستاناي
