سۋرەت: inbusiness.kz/
ماحامبەت اۋدانىنىڭ اكىمى قايرات نۇرلىباەۆتىڭ دەرەگىنە قاراعاندا, جايىق وزەنىنىڭ جاعالاۋىندا 17 ەلدى مەكەن ورنالاسقان. بۇرناعى جىلى جايىق وزەنىندەگى تاسقىن سۋ 11 اۋىلعا قاۋىپ توندىرگەن ەدى. ونىڭ ىشىندە ماحامبەت, جالعانساي, بەيبارىس, سارايشىق, تالدىكول سەكىلدى اۋىلدار بار. سودان بەرى سۋ ارناسىنان تونەتىن قاۋىپتى سەيىلتۋگە 7 اۋىلدا قورعانىس بوگەتىن سالۋ جوسپارلانىپتى. ماسەلەن, ماحامبەت اۋىلىندا 4,5 شاقىرىمدىق جاعالاۋدى بەكىتۋ جۇمىسىنىڭ 90%-ى اياقتالىپتى. وزەن جاعالاۋىندا جاياۋ جۇرگىنشىلەر جولى سالىنىپ, كوشە شامى ورناتىلىپ جاتىر. بۇل جۇمىستى شىلدەگە دەيىن تولىق اياقتاۋ كوزدەلىپ وتىر.
– تالدىكول اۋىلىنداعى 1,7 rم بوگەتتى نىعايتۋ جۇمىسى باستالدى. ءدال وسىنداي جۇمىس بەيبارىس اۋىلىندا دا قولعا الىنادى. بۇعان قوسىمشا سارايشىق, ەسبول, سارىتوعاي اۋىلدارىنىڭ ماڭىندا سۋ ارناسىنىڭ جاعالاۋىن بەكىتۋ جۇمىسى جۇرگىزىلەدى, – دەيدى ق.نۇرلىباەۆ.
العا اۋىلىنداعى جاعالاۋدى نىعايتۋ جۇمىسى سوزىلىپ كەلەدى. بەس جىل بۇرىن 3,2 كم جاعالاۋدى بەكىتۋ جۇمىسى قولعا الىنعانىمەن, ءالى اياقتالماپتى. باستاپقىدا اتالعان جۇمىسقا 4,9 ملرد تەڭگە قارالىپتى. الايدا قازىر جوبا قۇنى 7,1 ملرد تەڭگەنى قۇراپ وتىر.
– جوباعا وزگەرىس ەنگىزۋ جۇمىسى ءبىر جىلعا جۋىق مەرزىمگە سوزىلدى. بۇعان جايىق وزەنىنە سۋ كەلگەن كەزدە قۇرىلىس كوورديناتى وزگەرەتىنى سەبەپ بولدى. ەندى جوباعا وزگەرىس ەنگىزىلمەيدى. جاعالاۋدىڭ سۋ استىنداعى بولىگىندەگى جۇمىستىڭ كوبى ورىندالدى. مەردىگەر جۇمىستىڭ قالعان بولىگىن سۋ كەلگەنگە دەيىن بىتىرسە, پليتا سالۋ سىندى جۇمىستارعا كىرىسەدى, – دەيدى اۋدان اكىمى.
جىلىوي اۋدانىندا سۋ تاسقىنى جەم وزەنى ارناسىنان اسقان كەزدە قاۋىپ تونەدى. سۋ ارناسىنىڭ جالپى ۇزىندىعى – 212 كم. اۋدان اكىمىنىڭ ورىنباسارى گۇلنافيس ايشۋاقوۆانىڭ ايتۋىنشا, تۇرعىزبا, شوقپارتوعاي اۋىلى مەن قۇلسارى قالاسى سۋ باسۋ قاۋپى بار اۋماققا كىرەدى. وسىعان بايلانىستى قاۋىپتىڭ الدىن الۋ قامى جاسالىپ جاتىر. جەم وزەنى مەن قۇرساي وزەگىنىڭ ءتۇبىن تەرەڭدەتۋ, جاعالاۋدى بەكىتۋ جۇمىستارىن جۇرگىزۋ قولعا الىندى. جوباعا سايكەس بۇل جۇمىس اۋقىمى 95,3 شاقىرىمعا سوزىلادى.
– جالپى ۇزىندىعى 68,6 شاقىرىمدى قۇرايتىن قورعانىس بوگەتىن نىعايتۋ جۇمىسىن اتقارۋ جوسپارلانعان. قازىردە جۇمىستىڭ 79%-ى اياقتالدى. بۇعان قوسا باقاشى, قاراعاي ەلدى مەكەندەرىنىڭ ماڭىندا گيدروتەحنيكالىق قۇرىلىس نىسانى سالىنىپ جاتىر. 2024 جىلى باستالعان جۇمىسقا بۇگىندە 266 ارنايى تەحنيكا مەن 300 ادام تارتىلىپ وتىر. جۇمىسشىلار ەكى اۋىسىممەن جۇمىس ىستەپ جاتىر, – دەدى گ.ايشۋاقوۆا.
اتىراۋ وبلىسى
