باسقوسۋدى مەملەكەت جانە قوعام قايراتكەرى ساۋىتبەك ابدراحمانوۆ جۇرگىزىپ وتىردى. العاش ءسوز العان كورنەكتى جازۋشى تولەن ابدىك امانگەلدى كەڭشىلىك ۇلىنىڭ قازاق ادەبيەتىندەگى ورنى مەن شىعارماشىلىق ىزدەنىسىنە توقتالسا, قىرعىز جازۋشىسى, تۇركسوي ۇيىمىنىڭ باس حاتشىسى سۇلتان راەۆ ونلاين جۇيەسى ارقىلى اۆتوردى جاڭا ەڭبەكتەرىنىڭ جارىق كورۋىمەن قۇتتىقتادى.
«اتامۇرا» كورپوراتسياسىنىڭ پرەزيدەنتى راقىمعالي قۇل-مۇحاممەد ءۇش كىتاپتىڭ دا «اتامۇرا» باسپاسىنان جارىق كورگەنىن العا تارتىپ, كىتاپتاردان اۆتوردىڭ ءسوز ونەرىنە دەگەن تالعامى مەن تانىم تەرەڭدىگى بايقالاتىنىن اتاپ ءوتتى. ال ۇلتتىق اكادەميالىق كىتاپحانا ديرەكتورى كۇمىس سەيىتوۆا امانگەلدى كەڭشىلىك ۇلىنىڭ قازاق جانە الەم ادەبيەتىن كەڭ اۋديتورياعا ناسيحاتتاۋ ماقساتىندا 2022 جىلدان بەرى كىتاپحانانىڭ «YouTube» ارناسى ارقىلى «اشىق ادەبي لەكتسيا» جوباسىن جۇرگىزىپ كەلە جاتقانىن ەسكە سالدى.
جيىنعا قاتىسۋشىلار قالامگەردىڭ ء«سوز پاتشاسى» كىتابىنداعى ادەبي-سىن ماقالالار مەن «جۇرەك ءسوزى» كىتابىنا ەنگەن ەسسەلەر ءھام ادەبي زەرتتەۋلەرگە جان-جاقتى تالداۋ جاسادى. جيىندا امانگەلدى كەڭشىلىك ۇلىنىڭ كاسىبي سىنشىلىق بولمىسى, ادەبي ۇدەرىستى زەردەلەۋدەگى تەرەڭ پايىمى دا ءسوز بولدى. سونداي-اق باسقوسۋدا الەم ادەبيەتىنىڭ كورنەكتى وكىلى رومەن روللاننىڭ «تولستويدىڭ ءومىرى» كىتابىنىڭ قازاق تىلىندەگى اۋدارماسى دا تالقىعا سالىنىپ, تانىمدى كەڭەيتەتىن تاماشا ءتارجىما دەگەن باعا بەرىلدى.
