فوتو: اشىق دەرەككوز
«مەنىڭ ويىمشا, بۇگىن قول قويىلعان «بالقاش» اتوم ەلەكتر ستانتسياسىن سالۋعا قاتىستى كەلىسىمدەردىڭ ستراتەگيالىق ماڭىزى زور. وسى اۋقىمدى جوبانى باتىل قولداعانى ءۇشىن رەسەي فەدەراتسياسىنىڭ پرەزيدەنتىنە ريزاشىلىعىمدى جەتكىزەمىن. بۇل باستاما عىلىم-ءبىلىم, تەحنولوگيا سالالارىنداعى ىقپالداستىقتى ىلگەرىلەتىپ, ەنەرگەتيكا مەن يندۋسترياعا قاتىستى ارالاس باعىتتاردىڭ دامۋىن قامتاماسىز ەتەدى. قازاقستان مەن رەسەي ءۇشىن ەنەرگيا رەسۋرستارىن جانە ەلەكتر ەنەرگياسىن ءوندىرۋ, تاسىمالداۋ, ىشكى ءارى سىرتقى نارىقتارعا جەتكىزۋ ماسەلەلەرىن تابىستى شەشۋدىڭ ءمانى زور. ەۋرازياداعى كولىك بايلانىسى كوبىنە ءبىزدىڭ ەلدەرىمىزگە تاۋەلدى. قازاقستان مەن رەسەي سولتۇستىك – وڭتۇستىك, شىعىس – باتىس قۇرلىقارالىق دالىزدەرىن دامىتۋ جولىندا جەمىستى جۇمىس اتقارىپ جاتىر. تاريفتەردى وڭتايلاندىرۋ, اكىمشىلىك راسىمدەردى قىسقارتۋ, شەكارا ماڭىنداعى جانە باسقا دا ينفراقۇرىلىمدى جاڭعىرتۋ ءۇشىن جۇيەلى شارالار قابىلدانعانى قۋانتادى. سونىڭ ناتيجەسىندە جۇك تاسىمالى تۇراقتى تۇردە ارتىپ كەلەدى, بىلتىرعى قورىتىندى بويىنشا 92 ميلليون تونناعا جەتتى. بۇل شامامەن 3,4 پايىز ءوسىمدى قۇرايدى», دەدى پرەزيدەنت.
اتالعان كورسەتكىشتەردى ۇلعايتۋ جوسپارلانعان. مەملەكەت باسشىسى ول ءۇشىن وزىق تسيفرلىق شەشىمدەر مەن جاساندى ينتەللەكت تەحنولوگيالارىن ەنگىزىلەتىنىن اتاپ ءوتتى.
«مەملەكەتتەرىمىز اراسىندا جۇرگىزۋشىسىز جۇك كولىكتەرىنىڭ قوزعالىسىن ىسكە قوسۋ – وسى ءىستىڭ جارقىن مىسالى. عارىش سالاسىنداعى ىنتىماقتاستىقتىڭ كەلەشەگى زور. «بايقوڭىر» كوسمودرومى كوپ جىلدان بەرى جەمىستى عىلىمي-تەحنيكالىق سەرىكتەستىگىمىزدىڭ سيمۆولى رەتىندە قىزمەت ەتىپ كەلەدى. «بايتەرەك» بىرلەسكەن جوباسىنىڭ جۇزەگە اسىرىلۋى, سونىڭ ىشىندە جاقىندا «سۇڭقار/Cويۋز-5» جاڭا زىمىران تاسىعىشىنىڭ ءساتتى ۇشىرىلۋى عارىش قىزمەتىن ۇسىناتىن حالىقارالىق نارىقتاعى ەلدەرىمىزدىڭ پوزيتسياسىن نىعايتۋعا جول اشادى», دەدى مەملەكەت باسشىسى.
قاسىم-جومارت توقاەۆ قازاقستانعا ءتورت امۋر جولبارىسىنىڭ اكەلىنۋىن رەسەي پرەزيدەنتىنىڭ مەملەكەتتىك ساپارى اياسىنداعى ايتۋلى وقيعا دەپ اتادى.
«قۇرمەتتى ۆلاديمير ۆلاديميروۆيچ, قازاقستان اۋماعىنا جولبارىستاردى جەرسىندىرۋ جونىندەگى باستامامىزعا قولداۋ كورسەتكەنىڭىز ءۇشىن سىزگە شىنايى العىس ايتامىن. باعالى سىيىڭىز تۋرالى ەل ازاماتتارىنىڭ بارلىعى كەڭىنەن قۇلاعدار بولدى. وسى يگى ىسكە اتسالىسقان ەكى ەلدىڭ ماماندارىنا ريزاشىلىعىمدى بىلدىرەمىن», دەدى پرەزيدەنت.
ەسكە سالايىق, كەشە رەسەي پرەزيدەنتى ۆلاديمير پۋتين قازاقستانعا مەملەكەتتىك ساپارمەن كەلدى. «Egemen Qazaqstan» گازەتىندە ۆلاديمير ءپۋتيننىڭ «رەسەي – قازاقستان: ەۋرازيا تورىندەگى وداق» اتتى ماقالاسى جاريالاندى.
