– كورنەكتى مەملەكەت قايراتكەرى جانە الەمدىك اۋقىمداعى ساياساتكەر رەتىندە ءسىز ۇلى دەرجاۆا سانالاتىن رەسەيدىڭ مارتەبەسىن نىعايتۋ جولىندا دايەكتى ساياسات جۇرگىزىپ كەلەسىز. رەسەي تىكەلەي ارالاسپاسا, بىردە ءبىر ءىرى جانە ەلەۋلى حالىقارالىق ماسەلە شەشىمىن تاپپايدى. ءسىز جاھاندىق ءتارتىپ تۇبەگەيلى وزگەرىپ جاتقان قيىن كەزەڭدە ەل باسقارىپ, ورىس حالقى مەن رەسەي مەملەكەتتىلىگى ءۇشىن تاعدىرشەشتى مانگە يە ميسسيانى ابىرويمەن جانە لايىقتى دەڭگەيدە اتقارىپ كەلەسىز. قازاقستان رەسەي ەكونوميكاسىنىڭ دامۋىنا جانە حالىقارالىق ارەنادا تابىسقا جەتۋىنە شىن مانىندە تىلەكتەس. ءبىزدىڭ مەملەكەتتەرىمىز الىپ ەۋرازيا كەڭىستىگىنىڭ نەگىزىن قۇرايدى. بەرىك ءارى ءبىرتۇتاس ەۋرازيا قاۋىپسىزدىگىن ساقتاۋ ءۇشىن بىرلەسە جۇمىس اتقارىپ جاتىرمىز. ەكى ەلدى تاريحي تامىرلاستىق, مادەني داستۇرلەر, ۇقساس مەنتاليتەت, باستىسى, الەمدەگى ەڭ ۇزىن شەكارا بىرىكتىرەدى. سوندىقتان ماڭگى دوستىق, تاتۋ كورشىلىك جانە ءوزارا سەنىم دەگەنىمىز – جاي عانا ۇگىت-ناسيحات ۇرانى ەمەس, حالىقتارىمىزدىڭ بەيبىت تىرشىلىگىنىڭ ءمانى جانە قوعامدىق ءومىردىڭ بارلىق سالاسىنداعى تابىستىڭ مىزعىماس كەپىلى. ءبىز قازاقستاندا مۇنى جاقسى تۇسىنەمىز جانە رەسەيمەن جان-جاقتى ىنتىماقتاستىقتى باستى باعىت رەتىندە قاراستىرامىز. سونىمەن قاتار بۇل ءىستى جالعاستىرۋ ەلدەرىمىزدىڭ قازىرگى جانە كەلەشەك باسشىلارىنىڭ قاسيەتتى مىندەتى دەپ سانايمىز. ويتكەنى ەكى ەلدىڭ دوستىعى مەن ىنتىماعىن ەشتەڭە الماستىرا المايدى, – دەدى پرەزيدەنت.
قاسىم-جومارت توقاەۆتىڭ ايتۋىنشا, كەلىسسوزدەر دەلەگاتسيا مۇشەلەرىنىڭ قاتىسۋىمەن ىسكەرلىك جانە كونسترۋكتيۆتى سيپاتتا ءوتتى.
قازاقستان مەن رەسەي پرەزيدەنتتەرى بىرلەسكەن مالىمدەمە جاسادى
تاراپتار كۇن تارتىبىندەگى بارلىق ماسەلە بويىنشا ناتيجەلى پىكىر الماستى. ەۋرازياداعى قاۋىپسىزدىككە باسا نازار اۋدارىلدى.
– الەمدىك ساياساتتا تۇراقسىزدىق بەلەڭ العان شاقتا مەملەكەتارالىق سەرىكتەستىكتىڭ ورنىقتى ءارى تۇسىنىكتى ۇلگىسى ايرىقشا قۇندىلىققا اينالدى. قازاقستان مەن رەسەيدىڭ قارىم-قاتىناسى بۇل ماقساتقا تولىق ساي كەلەدى. ويتكەنى ول ۋاقىت تەزىنەن وتكەن جانە جاڭا ءداۋىردىڭ سىن-قاتەرلەرىنە توتەپ بەرىپ وتىر. سان قىرلى سەرىكتەستىگىمىز قوس حالىققا ناقتى پايدا اكەلەتىن اۋقىمدى جوبالارعا نەگىزدەلەدى. ساۋدا-ەكونوميكالىق بايلانىستاردىڭ ورنىقتىلىعى, كاسىپكەرلەردىڭ بەلسەندىلىگى ەكى ەل ەكونوميكاسىنىڭ نەگىزگى سالالارىنداعى ءوسىمدى قامتاماسىز ەتىپ وتىر. سوڭعى بەس جىلدا تەك اگروونەركاسىپ سالاسىنداعى ەكىجاقتى ساۋدا-ساتتىق كولەمى 1 ميلليارد دوللارعا ۇلعايدى. ينۆەستيتسيالىق ىنتىماقتاستىق قارقىندى تۇردە دامىپ كەلەدى. وسىعان دەيىن ايتىلعانداي, رەسەي قازاقستان ەكونوميكاسىنا قۇيعان تىكەلەي ينۆەستيتسيا بويىنشا كوش باستاپ تۇر. جالپى ينۆەستيتسيا كولەمى 29 ميلليارد دوللاردان استى. ال قازاقستاننىڭ رەسەي ەكونوميكاسىنا سالعان ينۆەستيتسياسى 9 ميلليارد دوللارعا جەتتى. بۇل دا جاقسى كورسەتكىش. قازاقستاندا رەسەيلىكتەردىڭ ۇلەسى بار 20 مىڭنان اسا كومپانيا تابىستى جۇمىس ىستەيدى. بيىل 20 تامىزدا وتەتىن قازاقستان-رەسەي وڭىرارالىق ىنتىماقتاستىق فورۋمى ساۋدا-ەكونوميكالىق, ينۆەستيتسيالىق سالالارداعى ارىپتەستىك الەۋەتىن ارتتىرۋعا تىڭ سەرپىن بەرەتىنىنە سەنىمدىمىز, – دەدى قازاقستان پرەزيدەنتى.
قازاقستاننىڭ رەسەي ەكونوميكاسىنا سالعان قارجىسى 9 ميلليارد دوللاردان استى
