قاتەرگە قارسى ءتاستۇيىن ءىس

تجد ماماندارى تاسقىن قاۋپى بار 20 اۋدانعا قاراستى 100 ەلدى مەكەندى باقىلاۋعا الدى. بۇل اۋماقتاعى
2 مىڭنان استام ۇيدە 7 658 ادام تۇرادى. باستى مىندەت – قاۋىپتى ايماق­تى نازاردا ۇستاپ, قۇتقارۋ كۇشتەرىن دەر كەزىندە جۇمىلدىرۋ. وبلىستىق تجد باسقارما باستىعى, ازاماتتىق قورعانىس پولكوۆنيگى ايدوس احمەتوۆتىڭ ايتۋىنشا, دايىندىق اياسىندا وڭىردە توقسانعا جۋىق ءىس-شارا اتقارىلعان.

– قاۋىپتى اۋماقتاردا جالپى ۇزىندىعى 53,7 شاقىرىمدى قۇرايتىن 32 قورعانىس بوگەتى سالىندى. ەسكىلەرى قايتا بەكىتىلىپ, توبىل وزەنىنىڭ جاعالاۋى نىعايتىلدى. سونداي-اق اۆتوجولداردىڭ استىنداعى 2 مىڭنان اسا ارىق پەن 78 شاقىرىمنان استام كارىز جۇيەسى تازارتىلىپ, سۋاعار قۇبىرلار ورناتىلدى. تاسقىن قاۋپى بار اۋىلداردا 39 رەيد ۇيىمداس­تىرى­لىپ, تۇرعىندارعا ءتۇسىندىرۋ جۇمىس­تارى جۇرگىزىلدى, – دەيدى ا.احمەتوۆ.

كوكتەمدە مۇز كەپتەلىسىن بولدىرماۋ ماقساتىندا الدىن الا جارىلىس جۇمىستارىنا 209 ملن تەڭگە, اۋەدەن باقىلاۋ مەن مونيتورينگكە 119 ملن تەڭگە قارالعان. 144 توننادان استام جانار-جاعارماي, 5,5 مىڭ توننا ينەرتتى ماتەريال, 264 مىڭ دانا قۇمقاپ ساقاداي ساي تۇر.

قازىردىڭ وزىندە ەلدى مەكەندەردەن 1,3 ملن تەكشە مەتر قار شىعارىلعان. توتەنشە جاعداي تۋىنداي قالسا, 12 مىڭنان استام ادامدى قابىلدايتىن 111 ۋاقىتشا پانا جۇمىس ىستەيتىن بولادى. بۇل قوسىندار قاجەتتى شاتىر, توسەكتىك ورىنمەن تولىق قامتىلعان. سۋ قۇرساۋىندا قالعان تۇرعىندارعا ازىق-ت ۇلىك جەتكىزۋ ماسەلەسى دە نازاردا. بۇل باعىتتاعى جۇمىستاردى قارجىلاندىرۋ دا تۇراقتى. جەرگىلىكتى بيلىكتىڭ توتەنشە, شۇعىل شىعىندار رەزەرۆىندە 5,5 ملرد تەڭگەدەن استام قارجى قاراستىرىلعان (توتەنشە رەزەرۆتە – 3,9 ملرد, شۇعىل شىعىندارعا – 1,5 ملرد تەڭگە).

جالپى, كوكتەمگى سۋ تاسقىنى كەزەڭىندە 2 مىڭنان استام قۇتقارۋشى, 415 تەحنيكا, 76 قايىق, 625 موتوپومپامەن كەزەكشىلىك اتقارادى. ارقالىق قالاسى مەن جانگەلدين, امانگەلدى, قاراسۋ, اۋليەكول, ناۋىرزىم, سارى­كول, التىنسارين اۋداندارىنا ءموبيل­دى قۇتقارۋ جاساقتارى الدىن الا ورنا­لاستىرىلادى.