بۇرىن داريا جاعالاۋىنداعى جۇرت كوكتەم تۋا قاربالاسىپ جاتاتىن. ارنانى شىرەگەن مۇز ەرىگەن ساتتە تالاي بوگەتتى جىرىپ كەتىپ, مىڭداعان ادام تالاي مارتە قاۋىپسىز ايماققا كوشىرىلگەن. كەيىنگى جىلدارى داريانىڭ دەڭگەيى قىستا دا كوتەرىلمەي, مۇنداي دۇربەلەڭدى بايقاعانىمىز جوق. دەگەنمەن توتەنشە جاعداي سالاسى وكىلدەرى تەحنيكالارىن سايلاپ, قاۋىپتى ايماقتاردى باقىلاۋدا ۇستاپ وتىر.
«قازگيدرومەت» مەكەمەسىنىڭ مالىمەتىنە سۇيەنسەك, اقپاننىڭ اياعى مەن ناۋرىزدىڭ باسىندا سەڭ تولىق جۇرە باستايدى. سۋ تاسقىنىنا قارسى ماتەريالدىق-تەحنيكالىق قور جەتكىلىكتى, قابىلداۋ, ەۆاكۋاتسيالاۋ پۋنكتتەرى دايىن. جاعدايدى قالت جىبەرمەي قاداعالاپ وتىرعان وبلىستىق توتەنشە جاعدايلار دەپارتامەنتى ماماندارىنىڭ دەرەگىنشە, قازىر شاردارا سۋ قويماسىنان داريا ارناسىنا سەكۋندىنا 300 تەكشە مەتر سۋ ءتۇسىپ جاتىر. ونىڭ باسىم بولىگىن كوكساراي سۋ رەتتەگىشى قابىلداپ, وبلىس اۋماعىنا 106 تەكشە مەترى كەلىپ تۇر. توتەنشەلىكتەر بىلتىر سۋ كولەمى بۇدان ءۇش ەسە كوپ بولعانىن ايتادى.
– ارينە, سۋ كولەمى ازدىعىن مالدانىپ قاراپ وتىرمايمىز. سۋ تاسقىنى بولا قالعان جاعدايدا قاجەتتى 117,9 توننا جانار-جاعارماي, 139 902 قاپ, 17 710 باۋ قامىس, 5 865 پاشىن, 239 توننا قويتاس, 2 381 قارابۋرا سەكىلدى ينەرتتى ماتەريال جيناقتالدى. قاۋىپ تونە قالعان جاعدايدا كومەككە وبلىستا 135 مەكەمە, 410 تەحنيكا, 1 234 ادام بەكىتىلگەن. ءبىزدىڭ تاراپىمىزدان 123 ادام, 23 تەحنيكا, 6 ءجۇزۋ قۇرالى, 33 موتوپومپا, 2 تىكۇشاق دايىن, – دەيدى دەپارتامەنتتىڭ باسقارما باستىعى اسحات ورازبەكوۆ.
سۋ تاسقىنى بولا قالعان جاعدايعا لايىقتالىپ 51 جيناقتاۋ, 70 قابىلداۋ پۋنكتتەرى دايىندالدى. مۇز جارۋ جۇمىسىمەن اينالىساتىن مامانداندىرىلعان ۇيىم دا ساقاداي ساي تۇر.
وڭىردە 2025–2026 جىلدارى جازعى-كۇزگى مەزگىلدەردە سۋ تاسقىنىنىڭ الدىن الۋ باعىتىندا اتقارىلاتىن ءىس-شارالاردىڭ ينجەنەرلىك جوسپارى بەكىتىلگەن. بىلتىر جوسپارعا ەنگەن 9 نىساندا جۇمىس ءجۇرىپ, جەرگىلىكتى اتقارۋشى ورگان مەن سۋ شارۋاشىلىعى مەكەمەسىنىڭ ماماندارىنان قۇرىلعان جۇمىسشى توپ گيدروتەحنيكالىق قۇرىلعىلاردى زەرتتەدى.
وبلىستىق جۇمىلدىرۋ دايىندىعى, اۋماقتىق جانە ازاماتتىق قورعانىس باسقارماسى دا قامسىز ەمەس. باسقارما وكىلدەرى وزەن ارناسىنان اسا قالسا مونيتورينگ جۇمىستارىن جۇرگىزۋ ماقساتىندا تىكۇشاق قىزمەتىن پايدالانۋعا, مۇز جارۋ جۇمىستارىنا, وزگە دە قاجەتتى ماتەريالدارعا بيۋدجەتتەن قارجى بولىنگەندىگىن ايتادى.
جاقىندا بۇل ماسەلە «Amanat» پارتياسىنىڭ وبلىستىق فيليالىندا دا قارالدى. پارتيالىق باقىلاۋ كوميسسياسىنىڭ وتىرىسىنا جينالعاندار ايماقتىڭ كوكتەمگى سۋ تاسقىنى كەزەڭىنە دايىندىق تەك ماۋسىمدىق سيپاتتاعى جۇمىس ەمەس, ايماق قاۋىپسىزدىگىنە تىكەلەي قاتىستى ستراتەگيالىق باعىت ەكەنىن اتاپ ءوتتى. سول تۇرعىدا وزەن ارناسىنداعى گيدروتەحنيكالىق قۇرىلىستاردىڭ جاعدايى, قورعانىس بوگەتتەرىنىڭ بەرىكتىگى, حالىقتى ۋاقتىلى حاباردار ەتۋ جۇيەسىنىڭ دايىندىعى اركەز قاتاڭ باقىلاۋدا بولۋعا ءتيىس.
قىزىلوردا
