فوتو: قر مادەنيەت جانە اقپارات مينيسترلىگى
سالا وكىلدەرىن كاسىبي مەرەكەمەن قۇتتىقتاعان ۇكىمەت باسشىسىنىڭ ورىنباسارى ايدا بالاەۆا مادەنيەتتىڭ قوعامنىڭ رۋحاني دامۋىندا جانە ۇلتتىق بىرەگەيلىكتى قالىپتاستىرۋدا ايرىقشا ورىن الاتىنىن اتاپ ءوتتى.
بۇگىندە قازاقستاننىڭ مادەنيەت جانە ونەر سالاسىندا 60 مىڭعا جۋىق ادام ەڭبەك ەتەدى. كەيىنگى ءۇش جىلدا مادەنيەت سالاسىنىڭ 592 وكىلى مەملەكەتتىك ناگرادالارمەن ماراپاتتالدى. سونىمەن قاتار مەملەكەت باسشىسىنىڭ اتىنان مادەنيەت جانە بۇقارالىق اقپارات قۇرالدارى قىزمەتكەرلەرىنە 331 پاتەر سەرتيفيكاتى تابىستالدى.
پرەزيدەنت ءانشى ماقپال ءجۇنىسوۆا مەن دومبىراشى تاتيانا بۋرميستروۆانى ماراپاتتادى
وسى ورايدا ايدا بالاەۆا سالا وكىلدەرىنىڭ اتىنان مەملەكەت باسشىسىنا وتاندىق مادەنيەتتى دامىتۋعا كورسەتىپ كەلە جاتقان تۇراقتى قولداۋى, ەرەكشە نازارى مەن قامقورلىعى ءۇشىن العىس ريزاشىلىعىن ءبىلدىردى.
«مەملەكەت باسشىسىنىڭ مادەنيەت سالاسىنا ايرىقشا كوڭىل ءبولۋى بارشامىز ءۇشىن ەرەكشە مانگە يە. پرەزيدەنتىمىز جىل سايىن مادەنيەت جانە ونەر قىزمەتكەرلەرىن كاسىبي مەرەكەمەن قۇتتىقتاپ, سالانىڭ ۇزدىك وكىلدەرىن مەملەكەتتىك ناگرادالارمەن ماراپاتتاپ كەلەدى. بۇگىن مەملەكەت باسشىسى م. گوركي اتىنداعى مەملەكەتتىك اكادەميالىق ورىس دراما تەاترى مەن راحماديەۆ اتىنداعى مەملەكەتتىك اكادەميالىق فيلارمونياعا «ۇلتتىق» مارتەبە بەرۋ تۋرالى باستاما كوتەردى. بۇل – سىزدەردىڭ ونەر مەن مادەنيەت جولىنداعى تىنىمسىز ەڭبەكتەرىڭىزگە, بيىك تالعامىڭىز بەن شىعارماشىلىق ىزدەنىستەرىڭىزگە بەرىلگەن اسا جوعارى باعا, ەل رۋحانياتىنا قوسقان ولشەۋسىز ۇلەستىڭ جارقىن مويىندالۋى. وسى تاريحي ءارى مارتەبەلى شەشىممەن ۇجىمداردى شىن جۇرەكتەن قۇتتىقتايمىن», دەدى پرەمەر-ءمينيستردىڭ ورىنباسارى.
سونداي-اق ءىس-شارا بارىسىندا سالادا كاسىبي ەڭبەكتى مويىنداۋ جۇيەسى دايەكتى تۇردە دامىپ كەلە جاتقانى اتاپ ءوتىلدى. «حالىق ءارتىسى» قۇرمەتتى اتاعى قايتا بەكىتىلڭپ, «اسىل مۇرا» جاڭا سىيلىعى ەنگىزىلدى. مەملەكەتتىك ستيپەنديالاردىڭ مولشەرى ۇلعايتىلدى. بۇعان قوسا, كوپ جىلدان بەرى العاش رەت مۋزىكالىق ءبىلىم بەرۋ ۇيىمدارى مەن مەملەكەتتىك كونتسەرتتىك ۇيىمدارعا مۋزىكالىق اسپاپتار ساتىپ الۋعا قاراجات ءبولىندى.
سالتاناتتى جيىندا مادەنيەت جانە ونەر سالاسىنىڭ 32 وكىلى ماراپاتقا يە بولدى. قازاقستان رەسپۋبليكاسى پرەزيدەنتىنىڭ جارلىعىمەن 17 ادام مەملەكەتتىك ناگرادالارعا يە بولدى. اتاپ ايتقاندا, ءىىى دارەجەلى «بارىس» وردەنىمەن تەاتر جانە كينو اكتريساسى, تەاتر پەداگوگى, پروفەسسور جۇماگۇل ومىرزاققىزى مەيراموۆا, «پاراسات» وردەنىمەن ءانشى, كومپوزيتور, جۇسىپبەك ەلەبەكوۆ اتىنداعى رەسپۋبليكالىق ەسترادا-تسيرك كوللەدجىنىڭ ديرەكتورى جەڭىس سەيدۋللا ۇلى ماراپاتتالدى. سونداي-اق تەاتر, مۋزىكا, مۋزەي, عىلىم, رەستاۆراتسيا جانە كونتسەرت سالالارىنىڭ وكىلدەرىنە ماراپاتتار تابىستالدى.
ايدا بالاەۆا: مادەنيەت – حالقىمىزدىڭ ۇلتتىق بولمىسىنىڭ ايقىن كورىنىسى
تاعى 15 سالا قىزمەتكەرى ۆەدومستۆولىق ناگرادالارمەن ماراپاتتالدى. ولاردىڭ قاتارىندا اقمولا وبلىسى زەرەندى اۋداندىق مادەنيەت ءۇيىنىڭ «ارقا اۋەندەرى» حالىقتىق فولكلورلىق ءانسامبلىنىڭ جەتەكشىسى تالعات يبراەۆ, بىرلەسكەن مۇراجايلار ديرەكتسياسىنىڭ ساقتاۋ جانە كونسەرۆاتسيالاۋ ءبولىمىنىڭ ادىسكەرى راحيما جاقسىباەۆا, سونداي-اق وڭىرلىك مادەنيەت ۇيلەرى, مۋزەيلەر, تەاترلار, فيلارمونيالار, شىعارماشىلىق وقۋ ورىندارى مەن كونتسەرتتىك ۇيىمداردىڭ قىزمەتكەرلەرى بار.
ايتا كەتەيىك, استانادا «مادەنيەت جانە يننوۆاتسيا» رەسپۋبليكالىق فورۋمى ءوتتى.
