كەش شىمىلدىعى الەمدىك وپەرا جاۋھارلارىمەن ءتۇرىلدى. دجۋزەپپە ۆەردي, انتونين دۆورجاك, پەتر چايكوۆسكي, سىدىق مۇحامەدجانوۆ وپەرالارىنان ورىندالعان اريالار مەن دۋەتتەر زال ءىشىن تاماشا كوڭىل كۇيگە بولەپ, تىڭدارمانىن بىردە تولقىتسا, بىردە تەبىرەنتتى. ماحاببات تاقىرىبىن ارقاۋ ەتكەن شىعارمالار كەشتىڭ مازمۇندىق وزەگىنە اينالىپ, ءاربىر اۋەن جۇرەك قىلىن شەرتتى.
باتىسەۋروپالىق, قازاق, ورىس ۆوكالدىق كلاسسيكاسىنان شىرقالعان رومانستار مەن مينياتيۋرالار كەشتىڭ بوياۋىن قانىقتىرا ءتۇستى. ءار تۋىندى ساحنادا شاعىن درامالىق كورىنىسكە اينالىپ, كورەرمەندى وپەرا الەمىنىڭ تىلسىم كەڭىستىگىنە جەتەلەدى.
كەشكە قازاقستاننىڭ ەڭبەك سىڭىرگەن قايراتكەرلەرى – پيانيست دولورەس ۋمبەتاليەۆا مەن تەنور مەدەت شوتاباەۆ قاتىستى. سونداي-اق «دارىن» مەملەكەتتىك جاستار سىيلىعىنىڭ لاۋرەاتى, باريتون راسۋل جارماعامبەتوۆ پەن رەسپۋبليكالىق, حالىقارالىق بايقاۋلاردىڭ لاۋرەاتى ۇلپان اۋباكىروۆا ءوز ونەرلەرىن ورتاعا سالدى. ورىنداۋشىلاردىڭ ساحناداعى شىنايى ەموتسياسى مەن ۆوكالدىق شەبەرلىگى كەشتىڭ كوركەمدىك دەڭگەيىن ايرىقشا بيىككە كوتەردى.
كونتسەرتتىڭ باستى ەرەكشەلىگى – ساحنا مەن زال اراسىنداعى ۇيلەسىم بولدى. كورەرمەندەر ساحنا تورىنەن ورىن الىپ, ورىنداۋشىلارمەن ءبىر كەڭىستىكتە تىنىستادى. مۇنداي فورمات ءاربىر دىبىس پەن دەمدى جاقىننان سەزىنۋگە مۇمكىندىك بەرىپ, ونەر مەن كورەرمەن اراسىنداعى بايلانىستى بۇرىنعىدان دا بەكەمدەي ءتۇستى.
«وپەرامەن ۇندەس ماحاببات» كەشى تىڭدارمانىن سۇلۋلىق پەن سەزىمنىڭ الەمىنە جەتەلەپ, كلاسسيكالىق مۋزىكانىڭ ماڭگىلىك قۇدىرەتىن تاعى ءبىر مارتە دالەلدەدى. بۇل كەشتە ساحنادا اۋەن عانا ەمەس, ادام جانىنىڭ ەڭ نازىك يىرىمدەرى سويلەگەندەي اسەر قالدىردى.
