قىس قىزىعىنا كەنەلتكەن ءىس-شاراعا اۋداننىڭ 11 اۋىلدىق وكرۋگىنىڭ تۇرعىندارى لايىقتى دايىندىقپەن كەلىپ, ويىنداردىڭ جوعارى دەڭگەيدە وتۋىنە بەلسەنە اتسالىستى. ءداستۇرلى دەنساۋلىق فەستيۆالىنىڭ اشىلۋ سالتاناتىندا رايىمبەك اۋدانىنىڭ اكىمى داستان قۇداباەۆ جۇرتشىلىقتى ايتۋلى مەرەكەمەن قۇتتىقتاپ, اق قاردا ايشىقتى ءىز قالدىراتىن تارتىستى جارىستاردا جەڭىمپاز بولۋعا تىلەكتەستىگىن ءبىلدىردى.
«سالاماتتى ءومىر سالتىن قالىپتاستىرىپ, سپورتپەن اينالىسۋدىڭ ماڭىزى زور. اۋىل تۇرعىندارى مەن مەملەكەتتىك قىزمەتكەرلەردىڭ باسىن بىرىكتىرىپ وتىرعان بۇگىنگى شارانىڭ نەگىزگى ماقساتى – قىسقى سپورت تۇرلەرىن دارىپتەي وتىرىپ, ەلدى ىنتىماق-بىرلىككە ۇيىتۋ. سونداي-اق جاستاردى بويىن جات ارەكەتتەردەن اۋلاق ۇستاپ, دەنساۋلىقتىڭ قادىرىن بىلۋگە باۋلۋ», دەدى اۋدان باسشىسى.
قىستىڭ قىتىمىر ايازىنا قاراماستان, اق قار كەشىپ ارقان تارتقان, دوپ قۋالاپ, شانامەن سىرعاناپ, شاڭعىمەن جارىسقان دودادا توپ ىشىنەن وق بويى وزا شىققان كوماندالار جەڭىمپاز اتاندى. بارلىق اۋىلدىق وكرۋگتەن جالپى سانى 110 سپورتشى قاتىسقان جارىس قورىتىندىسىندا 1-ورىندى سارىجاز اۋىلىنىڭ, 2-ورىندى قاراساز اۋىلىنىڭ, 3-ورىندى نارىنقول اۋىلدىق وكرۋگىنىڭ ويىنشىلارى قانجىعالادى. جارىس جەڭىمپازدارى مەن جۇلدەگەرلەرىنە ارنايى ديپلومدار مەن مەدالدار تابىستالدى.
الماتى وبلىسى
