جاس ونەرتاپقىشتار ماراپاتتالدى

«نۇر وتان» پارتياسى ونەرتاپقىش جاستار اراسىندا وتكىزگەن رەسپۋبليكالىق «NURINTECH» يننوۆاتسيالىق جوبالار بايقاۋىنىڭ قورىتىندىسىن جاريالادى. سوعان بايلانىستى كەشە پارتيا توراعاسىنىڭ ءبىرىنشى ورىنباسارى مۇحتار قۇل-مۇحاممەد جەڭىمپازداردى ماراپاتتادى. اتالعان بايقاۋدى مەملەكەت باسشىسىنىڭ تاپسىرماسىمەن بيىل «نۇر وتان» پارتياسى جاريالاعان بولاتىن. ونىڭ باستى ماقساتى – جاستاردىڭ عىلىم مەن بىلىمگە جانە يننوۆاتسياعا دەگەن قىزىعۋشىلىقتارىن ارتتىرۋ. ال «NURINTECH» بايقاۋى 5 اتالىم بويىنشا وتكىزىلدى. ولار: «الەۋمەتتىك ماڭىزى بار يننوۆاتسيا», «تەحنوستارت», «ۇزدىك جاس عالىم», «جاس­تار يننوۆاتسيالىق جوباسى» جانە «پەرسپەكتيۆا». ءار اتالىمدا ۇزدىك ۇشتىكتەر انىقتالدى. سونداي-اق, بايقاۋ بارىسىندا بەلسەندى قاتىسۋشىلارعا ارنايى سىيلىقتار تاعايىندالعانىن اتاپ وتكەن ءجون. جالپى, ەلىمىزدىڭ ءار تۇكپىرىنەن بايقاۋعا قاتىسۋعا نيەت بىلدىرگەن مىڭعا جۋىق ءوتىنىش كەلىپ تۇسكەن. ولار نەگىزىنەن جاسىل ەنەرگەتيكا, حيميا, بيولوگيا, ءوندىرىس, قۇرىلىس, اۋىل شارۋاشىلىعى, مەديتسينا, روبوت تەحنيكاسىن جاساۋ, كولىك جانە IT-يندۋستريا سالاسىنداعى يننوۆاتسيالىق جوبالار. سولاردىڭ اراسىنان شەشۋشى كەزەڭگە, ياعني فينالعا بۇگىندە سۇرانىسقا يە, ەكونوميكالىق جاعىنان ءتيىمدى جانە مەيلىنشە جەتىلدىرىلگەن 30 جوبا ىرىكتەلىنىپ الىندى. جەڭىمپازداردى انىقتاۋ ءۇشىن ارنايى تاۋەلسىز كوميسسيا قۇرىلدى. ونىڭ قۇرامىندا بەلگىلى وتاندىق عالىمدار, قوعام قايراتكەرلەرى, حالىق قالاۋلىلارى, مەملەكەتتىك ورگان جانە بيزنەس-قوعامداستىق وكىلدەرى بولدى. بايقاۋ جەڭىمپازدارىن ماراپاتتاۋ راسىمىندەگى سوزىندە «نۇر وتان» پارتياسى توراعاسىنىڭ ءبىرىنشى ورىنباسارى يننوۆاتسياعا سالىنعان 1 دوللاردىڭ كەيىن ەسەلەپ قايتاتىنىنا ەرەكشە نازار اۋداردى. «جۋىردا عانا ءبىز پرەزيدەنتتىك يندۋستريالىق-يننوۆاتسيالىق دامۋ باعدارلاماسىنىڭ كەزەكتى بەلەسىنە كۋا بولدىق. ەلباسى ءبىر مەزەتتە 23 جاڭا اۋقىمدى ءوندىرىس وشاعىن ىسكە قوستى. ولاردىڭ بالاماسى قازاقستاندا عانا ەمەس, بۇكىل ورتالىق ازيادا جوق. نۇرسۇلتان ءابىش ۇلىنىڭ بۇل مەگا-جوباسى قازىردىڭ وزىندە ەلىمىزدە مىڭنان استام ءىرى كاسىپورىننىڭ اشىلۋىنا مۇمكىندىك بەردى. ولاردىڭ جالپى قۇنى 4,5 ترلن تەڭگەدەن استام قاراجاتتى قۇرايدى. 100 مىڭنان استام جاڭا جۇمىس ورنى اشىلدى. سول سەبەپتى دە مەملەكەت باسشىسى يندۋستريالاندىرۋ قازاقستاننىڭ ەڭ باستى مىندەتى ەكەنىن ۇنەمى ايتىپ جۇرەدى. سوندىقتان دا پارتيا كوشباسشىسى «NURINTECH» بايقاۋىن جاريالاعان بولاتىن. ەندى جاس عالىمدار مەن ونەرتاپقىشتار پرەزيدەنتىمىزدىڭ يننوۆاتسيانى دامىتۋعا باعىتتالعان ساياساتىنىڭ باستى قولداۋشىلارى بولۋى ءتيىس», – دەدى مۇحتار قۇل-مۇحاممەد. بايقاۋ قورىتىندىسى بويىنشا 20 قاتىسۋشى جۇلدەگەرلەر قاتارىنان كورىندى. ناتيجەسىندە گران-پري مەن باس جۇلدە – 2 ملن تەڭگەنى قاراعاندىلىق جاس عالىم, العاشقى وتاندىق دروندى قۇراستىرۋشى نۇرجان ەسماعامبەت ەنشىلەدى. سونىمەن قاتار, 1-ورىن يەگەرىنە – 1 ملن, 2-ورىنعا – 500 000, ال 3-ورىن العان قاتىسۋشىعا 250 000 تەڭگە سىياقى بەرىلدى. بۇدان بولەك, «پەرسپەكتيۆا» اتالىمى بويىنشا جەڭىمپاز اتانعان قاتىسۋشىعا قازاقستاننىڭ الدىڭعى قاتارلى جوعارى وقۋ ورىندارىنىڭ بىرىندە وقۋعا مۇمكىندىك بەرەتىن ءبىلىم گرانتى قاراستىرىلعان. سونداي-اق, 2-ءشى جانە 3-ءشى ورىن العان جاس عالىمدارعا نوۋتبۋك, پلانشەت سياقتى باعالى سىيلىقتار تابىس ەتىلدى. ماراپاتتاۋ راسىمىنەن سوڭ, بايقاۋ جەڭىم­پاز­دارىنىڭ بىرەۋىن اڭگىمەگە تارتقان ەدىك. «وسكەمەن سۋ ارناسى» مەملەكەتتىك مەكەمەسىنىڭ ينجەنەر-لابورانتى, «NURINTECH» رەسپۋبليكالىق يننوۆاتسيالىق جوبالار بايقاۋىنىڭ «ەڭ ۇزدىك جاس عالىم» اتالىمى بويىنشا 1-ءشى ورىن يەگەرى ايگۇل سادۋاقاسوۆا: «عىلىم سالاسىندا جۇرگەن جاس ماماندار ءۇشىن «نۇر وتان» پارتياسى وتكىزىپ وتىرعان «NURINTECH» بايقاۋىنىڭ ماڭىزى زور. مەن ءوز جوبامدا فوسفور, كرەمني سىندى بۇرىن قولدانىلماعان قولجەتىمدى ءارى ارزان ماتەريالداردىڭ كومەگىمەن ءوندىرىس قالدىقتارىنان ۋراندى ءتيىمدى ايىرۋ مۇمكىندىگىن زەرتتەدىم. قازاقستانعا بۇل ءتاسىلدى مەتاللۋرگيا سالاسىندا جەمىستى قولدانۋعا بولادى. مىنەكي, وسى جوبام ارقىلى بۇگىن جەڭىسكە جەتىپ وتىرمىن. بۇل باعاسى ماعان ارتىلعان جاۋاپكەرشىلىك دەپ بىلەمىن. جەڭىپ العان جۇلدەمدى عىلىمي جۇمىسىمدى ودان ءارى جەتىلدىرۋگە جۇمسايمىن. وتاندىق جاس ونەرتاپقىشتارعا وسىنداي زور مۇمكىندىك تۋعىزعان ەلباسىنا جانە «نۇر وتان» پارتياسىنا ەرەكشە العىسىمدى بىلدىرەمىن», – دەدى. ءاليسۇلتان قۇلانباي, «ەگەمەن قازاقستان»