ەلباسى نۇرسۇلتان نازارباەۆ «ەمبىمۇنايگاز» اق قىزمەتكەرلەرىنىڭ ەڭبەكتەرىن جوعارى باعالادى. مەملەكەت باسشىسى اتىراۋعا ساپارى بارىسىندا بايىرعى مۇناي كومپانياسىنىڭ ءۇش وكىلىن مەملەكەتتىك ناگرادالارمەن ماراپاتتادى.
– قازاقستان رەسپۋبليكاسى تاۋەلسىزدىگىنىڭ 25 جىلدىعى قارساڭىندا وبلىس پەن ەلىمىزدىڭ يگىلىگى ءۇشىن ەڭبەك ەتىپ جاتقان جانداردى اتاپ وتكىم كەلەدى, – دەدى ماراپاتتاردى تابىستاعان ەلباسى.
ماراپاتقا «ەمبىمۇنايگاز» اق باس ديرەكتورىنىڭ ءبىرىنشى ورىنباسارى قۇرمانعازى ەسقازيەۆ, «دوسسورمۇنايگاز» مگوب مۇناي جانە گاز ءوندىرۋ ءجونىندەگى وپەراتورى جاقسىگەرەي قۇباشەۆ, «دوسسورمۇنايگاز» مگوب قابات قىسىمىن ۇستاۋ شەبەرى قارلىعا التىناليەۆا يە بولدى.
مۇناي-گاز سالاسىن دامىتۋعا قوسقان زور ۇلەسى ءۇشىن كومپانيا باسشىسىنىڭ ءبىرىنشى ورىنباسارى قۇرمانعازى ەسقازيەۆ «قۇرمەت» وردەنىمەن ماراپاتتالدى. گەولوگيا-مينەرالوگيا عىلىمدارىنىڭ كانديداتى, عىلىم مەن تەحنيكا سالاسىنداعى ءال-فارابي اتىنداعى قازاقستان رەسپۋبليكاسى مەملەكەتتىك سىيلىعىنىڭ لاۋرەاتى قۇرمانعازى ەسقازيەۆ مۇناي سالاسىندا 30 جىلدان بەرى قىزمەت اتقارىپ كەلەدى. ەڭبەك جولىن بالىقشى بارلاۋ بۇرعىلاۋ باسقارماسىندا ۇڭعىمانى تسەمەنتتەۋ جونىندەگى وپەراتورلىقتان باستاپ, سودان كەيىن گەولوگ بولىپ جالعاستىردى. ارادا بەس جىل ءوتكەن سوڭ اتىراۋ ۇڭعىمالاردى كۇردەلى جوندەۋ جانە مۇناي قاباتتارىنىڭ ونىمدىلىگىن ارتتىرۋ باسقارماسىنىڭ باس گەولوگى بولىپ تاعايىندالدى. ءار جىلدارى «ەمبىمۇنايگاز» ااق, «قازمۇنايگاز» ءبو» اق جانە «قازمۇنايگاز» ۇك» اق قۇرىلىمدارىندا باسشى لاۋازىمدارىن اتقاردى. «قازمۇنايگاز» ءبو» اق باس ديرەكتورى, «ەمبىمۇنايگاز» اق باسقارما ءتوراعاسىنىڭ قىزمەتىن اتقاراتىن باس ديرەكتوردىڭ ءبىرىنشى ورىنباسارى.
ق.ەسقازيەۆتىڭ جاڭا تەحنولوگيالاردى ەنگىزۋ جانە ءوندىرىس ءتيىمدىلىگىن ارتتىرۋ بويىنشا مول تاجىريبەسى بار. ونىڭ باسشىلىق ەتۋىمەن كومپانيادا 2015 جىلى جاڭا جوبالار: ۋاز كەنىشىندە «ينتەللەكتۋالدى كەن ورنى», دۋالدى وقىتۋ جۇيەسىن ەنگىزۋ جونىندەگى قاناتقاقتى جوبا ويداعىداي جۇزەگە استى. قۇرمانعازى ورىنعازى ۇلى قازاقستان كەن ورىندارى, ونىڭ ءىشىندە تەڭىز, جەتىباي, جاڭاجول, قالامقاس, يساتاي جانە باسقا كەنىشتەر بويىنشا گەولوگيالىق-تەحنيكالىق تالداۋ جاساۋ جونىندە دۇنيە ءجۇزىنىڭ ءىرى مۇناي-گاز كومپانيالارىمەن جاسالعان كەلىسسوزدەرگە بەلسەنە قاتىستى. ايتا كەتۋ كەرەك, قاشاعان كەنىشى بويىنشا دا ەڭبەگى زور.
ول سونىمەن قاتار, قازاقستان رەسپۋبليكاسى جەر قويناۋىن قۇرمەتتى بارلاۋشىسى, اتىراۋ وبلىسىنىڭ قۇرمەتتى ازاماتى اتاندى.
مەملەكەتىمىز سونداي-اق, «دوسسورمۇنايگاز» مگوب مۇناي جانە گاز ءوندىرۋ ءجونىندەگى وپەراتورى جاقسىگەرەي قۇباشەۆتىڭ ەڭبەگىن جوعارى باعالاپ, 3-دارەجەلى «ەڭبەك داڭقى» وردەنىمەن ماراپاتتادى. ج.قۇباشەۆ مۇناي سالاسىندا 40 جىلدان بەرى جۇمىس ىستەپ كەلەدى. ەڭبەك جولىن 1973 جىلى «دوسسورنەفت» مگوب مۇناي ءوندىرۋ جونىندەگى وپەراتورى بولىپ باستاعان. 1977 جىلدان كۇنى بۇگىنگە دەيىن قارساق كەنىشىندە مۇناي جانە گاز ءوندىرۋ تسەحىندا وپەراتور بولىپ ەڭبەك ەتەدى.
ەمگ تاريحىندا وسىناۋ اۋىر دا قيىن جۇمىستا ارىپتەس ەر ادامدارمەن باسەكەگە ءتۇسكەن مۇنايشى ايەلدەر دە از ەمەس. وسىنداي ەڭبەگى ءۇشىن قارلىعا التىناليەۆا 3-دارەجەلى «ەڭبەك داڭقى» وردەنىمەن ماراپاتتالدى. ول مۇناي سالاسىنا 34 جىلىن ارناعان. 1977 جىلى «دوسسورنەفت» مگوب-كە ولشەۋشى بولىپ ورنالاستى. 1980 جىلدان باستاپ اۋداندىق ينجەنەرلىك-تەحنولوگيالىق قىزمەتتە ۇڭعىمالاردى زەرتتەۋ بويىنشا وپەراتور, ۇڭعىمالاردى زەرتتەۋ وپەراتورى, «دوسسورنەفت» مگوب قابات قىسىمىن ۇستاۋشى وپەراتور, «دوسسورمۇنايگاز» مگوب قاباتتىق قىسىمدى ۇستاۋ شەبەرى بولىپ ەڭبەك ەتۋدە. اتقارعان ەڭبەگى ءۇشىن ول قۇرمەت گراموتالارىمەن جانە توسبەلگىلەرمەن ماراپاتتالدى.
بۇدان كوپ جىل بۇرىن باستى كورپوراتيۆتىك قۇندىلىق – ادام رەسۋرستارى دەپ مالىمدەگەن «ەمبىمۇنايگاز» كومپانياسى ءوزىنىڭ دۇرىس باعىتتى تاڭداعانىنا كوز جەتكىزدى. ەمگ-دەگى مايتالمان ماماندار العان ماراپات – بۇل مۇناي ءوندىرۋ تاريحىندا اڭىزعا اينالعان بۇكىل ۇجىمنىڭ ماراپاتى.
ءاليا يماشەۆا
