ەلورداداعى «ازىرەت سۇلتان» مەشىتىنىڭ ءدىني ساۋات اشۋ كۋرسىندا ءدارىس الاتىن شاكىرتتەر اراسىندا ۇيىمداستىرىلعان ءبىلىم بايقاۋى ءوز مارەسىنە جەتتى. ەل تاۋەلسىزدىگىنىڭ 25 جىلدىق مەرەيتويىنا وراي ۇيىمداستىرىلعان «پايعامبار (س.ع.س.) ۇيرەتكەن ناماز» اتتى سايىستىڭ اقتىق اينالىمى جۇما نامازىنان كەيىن جاماعات الدىندا ءوتتى.
«قازىرگى تاڭدا مەشىتىمىزدە ءبىلىم الىپ جاتقان 600-دەن استام شاكىرت بار. وتكەن جىلى «سەنىمىڭە بەرىك بول!» تاقىرىبىندا سايىس وتكەن. يگى باستاما بيىل دا جالعاسىن تاۋىپ وتىر. بۇگىندە ەل اراسىنا ىرىتكى سالىپ, سالت-ءداستۇرىمىزدى تەرىسكە شىعاراتىن, جات اعىمنىڭ جەتەگىندە جۇرگەن وتانداستارىمىز از ەمەس. شارانىڭ باستى ماقساتى – ابۋ حانيفا ءمازحابىنىڭ نەگىزىندە ناماز وقۋدىڭ جولدارىن كورسەتىپ, ءدىني ەكسترەميزمنىڭ الدىن الۋ», – دەدى مەشىت ۇستازى فارحاد يسا ۇلى.
بايقاۋ ەكى كەزەڭنەن تۇرادى. 24 قاراشادا وتكەن العاشقى اينالىمعا 112 وقۋشى قاتىسىپ, جوعارى ۇپاي جيناعان التى ۇمىتكەر اقتىق اينالىمعا جولداما العان.
قازىلار القاسىندا استانا قالاسىنىڭ ءدىن ىستەرى جونىندەگى باسقارما جەتەكشىسى دانيار نۇراش ۇلى, «نۇر استانا» ورتالىق مەشىتىنىڭ نايب يمامى قابىلبەك ءالىپباي ۇلى, «ءاس-سالام» مەشىتىنىڭ باس يمامى نۇربول اۋباكيروۆ بولدى.
ناتيجەسىندە «پايعامبار (س.ع.س.) ۇيرەتكەن ناماز» سايىسىنىڭ ءى ورىن جۇلدەسىن سانۋەۆ نۇرحان جەڭىپ السا, ءىى ورىنعا راحيموۆ قۋات لايىق دەپ تانىلدى. ال ءىىى ورىن ەرگاشوۆ داۋرەنبەككە بۇيىردى. جەڭىمپازدارعا باعالى سىيلىقتار مەن «العىس حات» تابىستالدى.
ايان ءابدۋالي,
«ەگەمەن قازاقستان»
