وڭىردەگى جاستار بىرلەستىكتەرى, كرەاتيۆتى يندۋستريا وكىلدەرى, ۆولونتەرلىك قوزعالىس, مەديا جانە قوعامدىق ۇيىمدارمەن وتكەن اڭگىمە بارىسىندا جوبا نورمالارىنىڭ باسىم بولىگى ءدال بۇگىنگى جاستارعا ارنالعانى ەرەكشە اتاپ ءوتىلدى.
ايدا بالاەۆا قولدانىستاعى كونستيتۋتسيا ءوزىنىڭ تاريحي ميسسياسىن ورىنداعانىن, ال جاڭا كونستيتۋتسيا بىلىمگە, عىلىمعا, مادەنيەتكە جانە يننوۆاتسياعا نەگىزدەلگەن جاڭا دامۋ مودەلىنە كوشۋگە باعىتتالعانىن ايتتى.
«پرەزيدەنت ەلدىڭ ۇزاقمەرزىمدى باسەكەگە قابىلەتتىلىگىن عىلىمدى, تەحنولوگيانى جانە ءبىلىمدى ىلگەرىلەتۋ ارقىلى قامتاماسىز ەتۋدى ستراتەگيالىق مىندەت رەتىندە ايقىنداپ وتىر. ويتكەنى شىنايى تابىستى مەملەكەت – بۇل ينتەللەكتۋالدىق الەۋەتى مىقتى, مادەنيەتى جوعارى, جاڭاشا ويلايتىن ۇلت. بۇل ۇدەرىستە سىزدەردىڭ رولدەرىڭىز اسا ماڭىزدى. سوندىقتان كونستيتۋتسيالىق باستامالاردا عىلىم مەن بىلىمگە قاتىستى نەگىزگى قاعيداتتاردىڭ – عىلىمي شىعارماشىلىق ەركىندىگىنىڭ, عالىم مارتەبەسىنىڭ, ءبىلىمنىڭ ادام مەن ازاماتتىڭ اجىراماس قۇقىعى رەتىندە تانىلۋىنىڭ بەكىتىلۋى ستراتەگيالىق مانگە يە. بۇل – بولاشاق ۇرپاق الدىنداعى مەملەكەتتىڭ ۇزاقمەرزىمدى جاۋاپكەرشىلىگى, ۇلت ساپاسىنا, ادامي كاپيتالدىڭ قۋاتىنا جانە ەلدىڭ زياتكەرلىك الەۋەتىنە باعىتتالعان جۇيەلى ينۆەستيتسيا», دەدى ۆيتسە-پرەمەر.
سونىمەن قاتار ايدا بالاەۆا تسيفرلاندىرۋ مەن جاساندى ينتەللەكت داۋىرىندە كونستيتۋتسيا جوباسىندا العاش رەت تسيفرلىق قاۋىپسىزدىككە, دەربەس دەرەكتەردى قورعاۋعا جانە ينتەرنەت-الاياقتىققا قارسى نورمالار بەكىتىلگەنىن تىلگە تيەك ەتتى.
«جاڭا كونستيتۋتسيا جوباسىندا مەملەكەت باسشىسىنىڭ ەرەكشە باقىلاۋىنداعى زياتكەرلىك مەنشىكتى قورعاۋ ماسەلەسى دە كورىنىس تاپتى. بۇل نورمانى اتا زاڭ دەڭگەيىندە بەكىتۋ – كرەاتيۆتى يندۋستريانى دەربەس ءارى ەكونوميكالىق ماڭىزى بار سالا رەتىندە قاراستىرۋدىڭ ايقىن دالەلى. ونەر, عىلىم, تسيفرلىق تەحنولوگيالار, ديزاين, مەديا جانە مادەني كونتەنت سالاسىندا قىزمەت ەتەتىن جاستار ءۇشىن بۇل قۇقىقتىق كەپىلدىكتەردىڭ كۇشەيگەنىن بىلدىرەدى», دەدى ا.بالاەۆا.
جيىندا «اسسامبلەيا جاستارى» جاستار قاناتى جەتەكشىسىنىڭ ورىنباسارى زالينا اليەۆا دا ءسوز سويلەدى. ول جاستاردىڭ بالالارمەن اتقارىلاتىن جوبالارىن, ەتنوسارالىق كەلىسىمدى نىعايتۋعا باعىتتالعان باستامالارى تۋرالى ايتىپ, رەفەرەندۋمعا قاتىستى جاستاردىڭ ۇستانىمىن جەتكىزدى.
ەلوردادا كونستيتۋتسيالىق رەفورماعا ارنالعان حالىقارالىق كونفەرەنتسيا ءوتتى
«الدىمىزدا رەفەرەندۋم تۇر, ونىڭ ماڭىزىن تۇسىنەمىز جانە بۇل شەشىمدى قولدايتىنىمىزدى اتاپ وتكىم كەلەدى. جاستاردىڭ ءبىلىمىن, قۇقىقتارىن جانە شىعارماشىلىق ەركىندىگىن قورعاۋدى ماقسات ەتەتىن قۇجات ەلدىڭ ءارى قاراي دامۋىنا تىڭ سەرپىن بەرەدى دەپ سەنەمىن. بۇگىندە جاستار مەن قوعامدىق ۇيىم وكىلدەرى جاۋاپكەرشىلىكتى سەزىنىپ, ەلىمىزدىڭ تاريحي دامۋىن قولداۋى ءتيىس», دەدى زالينا اليەۆا.
باتىس قازاقستان وبلىسىنداعى وڭىرلىك كوممۋنيكاتسيالار قىزمەتىنىڭ باسشىسى, جاس اقىن ادىلەت ورىنباساروۆ سانالى تاڭداۋ اقپاراتقا دەگەن سەنىم مەن بەلسەندى ازاماتتىق ۇستانىمنان باستالاتىنىن, ال رەفەرەندۋم ءار ازاماتتىڭ جەكە جاۋاپكەرشىلىگى ەكەنىن اتاپ ءوتتى.
«كونستيتۋتسيانىڭ 3-بابىندا «مەملەكەتتىك بيلىكتىڭ بىردەن-ءبىر باستاۋى – حالىق» دەپ ناقتى كورسەتىلگەن. بۇل ەل تاعدىرىنا قاتىستى ماڭىزدى شەشىمدەر حالىقتىڭ ەركىمەن ايقىندالاتىنىن بىلدىرەدى جانە ءاربىر ازاماتقا ۇلكەن جاۋاپكەرشىلىك جۇكتەيدى. رەفەرەندۋمعا قاتىسۋ – جاي فورمالدى ءراسىم ەمەس. بۇل – ازاماتتىق ۇستانىم. ءار داۋىس ماڭىزدى. ءار تاڭداۋ – ورتاق شەشىمنىڭ ءبىر بولىگى. بولاشاق وزدىگىنەن قالىپتاسپايدى – ءبىز ونى بۇگىنگى تاڭداۋىمىز ارقىلى جاسايمىز», دەدى ءا. ورىنباساروۆ.
وتىرىسقا قاتىسقان وزگە سپيكەرلەر دە اتا زاڭدى ۋاقىت تالابىنا ساي جاڭارتۋدى قولدادى. كونستيتۋتسيا جوباسى قۇقىقتار مەن بوستاندىقتاردى نىعايتۋعا, ادامي كاپيتالدى دامىتۋعا, جاستاردىڭ مۇمكىندىكتەرىن كەڭەيتۋگە باعىتتالعانى, سونداي-اق تسيفرلىق قاۋىپسىزدىككە, ەكولوگيالىق جاۋاپكەرشىلىككە جانە قوعامدىق ىنتىماقتى كۇشەيتۋگە قاتىستى نورمالاردى قامتيتىنى تالقىلاندى.
«تالداۋ» ۇلتتىق زەرتتەۋلەر ورتالىعىنىڭ ساراپشىلارى كونستيتۋتسيالىق جاڭاشىلدىقتاردى تالقىلادى
كەزدەسۋ سوڭىندا قاتىسۋشىلار سۇراقتار قويىپ, ءوز ۇسىنىستارىن ايتتى. 2026 جىلعى 15 ناۋرىزدا وتەتىن رەسپۋبليكالىق رەفەرەندۋمعا جاستاردىڭ بەلسەندى قاتىسۋىنىڭ ماڭىزى ءسوز بولدى. سەبەبى ەلدىڭ كونستيتۋتسيالىق دامۋىنىڭ الداعى باعىتىن ازاماتتاردىڭ تاڭداۋى ايقىندايدى.
