ەلوردادا جەلتوقسان وقيعاسىنا قاتىسقاندارعا ارنايى سىيلىقتار تابىستالدى

ەل تاۋەلسىزدىگىنىڭ 25 جىلدىعى قارساڭىندا ەلوردا اكىمى اسەت يسەكەشەۆ جەلتوقسان وقيعالارىنىڭ 18 قاتىسۋشىسىنا «جەلتوقساننىڭ 30 جىلدىعى» قۇرمەت مەدالدارىن تابىس ەتتى, دەپ حابارلادى استانا اكىمدىگىنىڭ ءباسپاسوز قىزمەتى. استانا اكىمى قوناقتاردى قۇتتىقتاپ, مەملەكەتتىك مەرەكەنىڭ ماڭىزدىلىعىن اتاپ ءوتتى. «بيىل ەل تاۋەلسىزدىگىنە 25 جىل, تاريحي تۇرعىدان بۇل قىسقا كەزەڭ, بىراق قازاقستان ءۇشىن بۇل تاريحي كەزەڭ. ەلباسىمىز ايتقانداي, بۇل جىلدىڭ ماڭىزدى وقيعاسى. ەلىمىزدىڭ بارلىق جەتىستىكتەرىن ۇعىنىپ, بولاشاققا جوسپار جاساۋىمىز كەرەك», – دەدى اكىم. «مەملەكەت باسشىسى «ماڭگىلىك ەلگە» اينالۋ جولىندا مىقتى مەملەكەت قۇرىپ, الەمنىڭ وركەنيەتى وزعان 30 ەلىنىڭ قاتارىنا قوسىلۋ ماقساتىن قويدى. مەرەكە قارساڭىندا جەلتوقسان وقيعالارىنىڭ قاتىسۋشىلارىنا ەستەلىك مەدالدار تابىس ەتۋ مەن ءۇشىن جانە مەنىڭ ارىپتەستەرىم ءۇشىن ۇلكەن قۇرمەت. تاۋەلسىزدىگىمىزدىڭ 25 جىلدىعى ەستە قالار وقيعا بولادى دەپ ويلايمىن», - دەدى اكىم ءوز سوزىندە. ءوز كەزەگىندە ماراپاتقا يە بولعاندار اكىمگە العىستارىن ايتتى. «استانا – پرەزيدەنتتىڭ ءتول پەرزەنتى. بۇل ءبىزدىڭ جوبا, مەملەكەتىمىزدىڭ كەلبەتى. قىزمەتىڭىزدە تولاعاي تابىستار تىلەيمىز! تاۋەلسىزدىكتىڭ 25 جىلدىعىنا ورايلاستىرىلعان شارالاردى, سونداي-اق جەلتوقسان وقيعاسىنىڭ 30 جىلدىعىن لايىقتى اتاپ وتەيىك. ەلىمىزدىڭ جەتىستىكتەرىن بارشا الەمگە تاعى دا پاش ەتەيىك. قولىمىزدان كەلگەنشە كومەك بەرۋگە دايىنبىز», - دەپ ءمالىم ەتتى قر پارلامەنتى ءماجىلىسى اپپاراتى باسشىسىنىڭ ورىنباسارى سابىر كاسيموۆ.