ۋنيۆەرسيادا-2017: الاۋ ەستافەتاسىنىڭ ءانۇرانى بەكىتىلدى

بۇگىن الماتىدا 28-ءشى دۇنيەجۇزىلىك قىسقى ۋنيۆەرسيادا-2017 الاۋ ەستافەتاسىنىڭ ءانۇرانى بەكىتىلدى, دەپ حابارلادى قازاقپارات. ءانۇران مۋزىكاسىنىڭ اۆتورى - بەلگىلى سازگەر, حالىقارالىق بايقاۋلاردىڭ لاۋرەاتى, ەۋرازيا مادەنيەت قورىنىڭ پرەزيدەنتى ەرۇلان قاناپيانوۆ. ءانۇران سوزدەرىن قر-نىڭ ەڭبەك سىڭىرگەن قايراتكەرى, اقىن ءشومىشباي ساريەۆ جازدى. ءانۇراندى «استانا وپەرا» تەاترىنىڭ جەتەكشى ءسوليسى مايرا مۇحامەدقىزى جانە مەدەت شوتاباەۆ ورىندادى. سونداي-اق, ونى جازۋعا «ارت-ۆوكال» توبى اتسالىستى. «ءانۇراندى شىعارۋ كەزىندە ءبىز قازاقستاندا, ءبىزدىڭ سۇلۋ قالامىز الماتىدا الەمدىك دەڭگەيدەگى اسا ماڭىزدى سپورت جارىستارى وتەتىندىگىنەن شابىت الدىق. ءبىزدىڭ مەگاپوليسكە مىڭداعان سپورتشى, سپورت اۋەسقويلارى مەن تۋريستەر كەلمەك. ولار ءبىزدىڭ تابيعاتىمىزعا ءتانتى بولىپ, الماتىلىقتاردىڭ قوناقجايلىعىنا جوعارى باعاسىن بەرەتىندىگىنە سەنىمدىمىن. وتكىزىلەيىن دەپ وتىرعان ۋنيۆەرسيادا كوپتەگەن جاستاردىڭ سپورتقا دەگەن قىزىعۋشىلىعىن ارتتىرادى دەپ ۇمىتتەنەمىن», دەدى انۇران اۆتورى ەرۇلان قاناپيانوۆ: ال ءانۇراندى ورىنداۋشى مايرا مۇحامەدقىزى Instagram-داعى پاراقشاسىندا: «ماعان وسى كەرەمەت ءاندى ورىنداۋدى ۇسىنعان كەزدە ول ماعان بىردەن ۇنادى. ال ءان جانىڭا جاقىن بولسا, ونى ءوز جۇرەگىڭنەن وتكىزبەي ورىنداۋ مۇمكىن ەمەس!» دەپ جازادى. الاۋ ەستافەتاسىنىڭ ءانۇرانى 2017 جىلدىڭ 25 قاڭتارىندا استاناداعى نازارباەۆ ۋنيۆەرسيتەتىندە وتكىزىلەتىن الاۋدى تۇتاتۋ سالتاناتىندا, سونداي-اق, قازاقستاننىڭ بۇكىل ايماقتارىندا وتكىزىلەتىن ەستافەتانىڭ كەلەسى كەزەڭدەرىندە شىرقالاتىن بولادى.