قىزىلوردا اكىمىنىڭ ورىنباسارى جاڭا قىزمەتكە اۋىستى

بۇگىن قالا اكىمى ن. نالىباەۆتىڭ توراعالىعىمەن وتكەن اكىمدىك ماجىلىستە قالا اكىمى نۇرلىبەك ماشبەك ۇلى كادرلىق وزگەرىسكە توقتالدى. بۇعان دەيىن قالا اكىمىنىڭ ورىنباسارى قىزمەتىن اتقارىپ كەلگەن جاليەۆ نۇرحان بۇحارباي ۇلى جاقىندا عانا ەلباسىنىڭ جارلىعىمەن قۇرىلعان قر ءدىن ىستەرى جانە ازاماتتىق قوعام مينيسترلىگىنىڭ «تالداۋ جانە ستراتەگيالىق جوسپارلاۋ دەپارتامەنتى» ديرەكتورىنىڭ ورىنباسارى قىزمەتىنە تاعايىندالدى, دەپ حابارلايدى قالا اكىمدىگىنىڭ ءباسپاسوز قىزمەتى. "نۇرحان بۇحارباي ۇلى قىزمەت جولىندا ءوزىنىڭ ىسكەرلىگى مەن بىلىكتىلىگىنىڭ ارقاسىندا ءتۇرلى سالالاردا جەمىستى ەڭبەك ەتىپ, ايماعىمىزدىڭ الەۋمەتتىك جانە ەكونوميكالىق الەۋەتىنىڭ ارتۋىنا ەرەكشە ۇلەس قوسىپ جۇرگەن, ساياسي تەحنولوگيالاردى جانە يدەولوگيا سالاسىن جەتىك مەڭگەرگەن مامان رەتىندە, تاپسىرىلعان بارلىق قىزمەتتەردى ابىرويلى اتقاردى"- دەگەن قالا اكىمى, ن.جاليەۆكە بارشا ارىپتەستەرىنىڭ اتىنان العىسىن ءبىلدىرىپ, جاڭا قىزمەتىنە ساتتىلىك تىلەدى. سونىمەن قاتار, «قىزىلوردا قالاسىنىڭ الەۋمەتتىك-ەكونوميكالىق دامۋى مەن ءوڭىردىڭ قوعامدىق-ساياسي, مادەني-رۋحاني ءومىرىنىڭ ءوسىپ-وركەندەۋىنە قوسقان ۇلەسى جانە ابىرويلى ەڭبەگى ءۇشىن» قالا اكىمدىگىنىڭ «قۇرمەت» گراموتاسىمەن ماراپاتتادى.