بۇگىن الماتىدا «Almaty Invest 2016» IV حالىقارالىق ينۆەستيتسيالىق فورۋمى اياسىندا «Almaty Startup City» فورۋمى ءوتتى. وسىلايشا وڭتۇستىك شاھاردىڭ بيزنەسكە بەيىم جاستارىن جيناعان اۋقىمدى جيىننىڭ ماڭىزدى دا قىزىقتى بولىگى جۇما كۇنى الماتى مەنەدجمەنت ۋنيۆەرسيتەتىندە جالعاستى.
فورۋم اياسىندا قالادا كاسىپكەرلىك ورتا قالىپتاستىرىپ وتىرعان بيزنەستىڭ تانىمال وكىلدەرى ستۋدەنتتەرمەن سۇحبات الاڭىن قۇردى. جيىنعا «Almaty Invest 2016» فورۋمىنا كەلگەن شەتەلدىك قوناقتار دا قاتىستى.
«الماتى قالاسى قازاقستان تابىسىنىڭ 20 پايىزىن بەرەدى. الايدا, بىزدە مۇناي وندىرمەيدى, ونەركاسىپ جانە جوق. قالا – كاسىپكەرلەردىڭ ارقاسىندا دامۋدا. وڭتۇستىك استانانىڭ الداعى دامۋى, اقىلدى قالا (Smart City) جوباسىن جاساۋ – الماتىنىڭ جەتكەن جەتىستىكتەرىمەن شەكتەلمەي, ىشكى ءونىمدى 30 پايىزعا جەتكىزۋ كەرەك ەكەنىن ءتۇسىنۋدىڭ ءوزى جاقسى. ءبىز بۇل ماقساتقا جەتۋدى جەڭىلدەتەتىن – «دامۋ» قورى مەن الماتى دامۋ ورتالىعىنىڭ جاقسى جوبالارى مەن بىرەگەي ستراتەگياسىن, الاتاۋ يننوۆاتسيالىق تەحنولوگيالار پاركىن كورىپ وتىرمىز. «ەندى بىزگە نە جەتپەيدى؟», «بۇلاردى كىم اتقارادى؟» ساۋالىنا جاۋاپ جەتىسپەي تۇر. ەڭ باستىسى دا – وسى. بۇل جەردە ءبىلىمدى, كرەاتيۆتى, جاڭاشا ويلاي بىلەتىن, جىگەرلى – كاسىپكەرلەر قاجەت. وسى قاسيەتتەردىڭ ءبارى جاستارعا ءتان. سونىمەن قاتار, كاسىپكەرلىك, يننوۆاتسيالىق ەكوقۇرىلىم كەرەك. كاسىپكەرلىك مادەنيەت, ستۋدەنت جاستاردىڭ سينەرگياسى مەن جاقسى ساپالى ءبىلىم – مىنە, بىزگە ەڭ باستى بىزگە كەرەگى وسىلار», – دەيدى الماتى مەنەدجمەنت ۋنيۆەرسيتەتىنىڭ پرەزيدەنتى اسىلبەك كوجاحمەتوۆ.
ارينە, بيزنەس باستاۋدى ارمانداۋ ءبىر بولەك تە, ونى شىن مانىندە جۇزەگە اسىرۋ – كەڭەس بەرۋ, باعىتتاۋ, قارجىلىق قولداۋ وتە ماڭىزدى شارت. سوندىقتان فورۋمداعى «دامۋ» قورى وكىلدەرىنىڭ قاتىسۋى وزەكتى بولدى.
مۇددەلى جيىندا «دامۋ» قورىنىڭ باسقارۋشى ديرەكتورى – باسقارما مۇشەسى عابيت لەسبەكوۆ ەلدە جاس كاسىپكەرلەردىڭ 2 مىڭعا تارتا جوباسى «دامۋ» قورىنىڭ باعدارلامالارى بويىنشا قارجىلاندىرىلىپ, كاسىپكەرلەرگە قىزمەت كورسەتۋ ورتالىقتارىندا 34 مىڭنان استام جاس كەڭەس العانى تۋرالى مالىمدەدى.
«دامۋ» قورى «Almaty Startup City» فورۋمىنا قاتىسقان ستۋدەنت جاستارعا «جاڭا بيزنەس اشۋدى قولداۋ» جانە «ستۋدەنت جاستاردىڭ كاسىپكەرلىك باستامالارىن قولداۋ» جوبالارىنىڭ تيىمدىلىگى تۋرالى باياندادى.
سونداي-اق فورۋم اياسىندا وتكەن كورمەگە 24 يننوۆاتسيالىق جوبا ۇسىنىلدى. بۇلاردىڭ كوپشىلىگى – «اقىلدى قالا» جوباسىنىڭ شەشىمدەرى. ماسەلەن, الماتىنىڭ ينتەراكتيۆتى كارتاسى, عالامتورلىق قالالىق سىمسىز جەلىلەر, جاسىل ەكونوميكاعا جۇمىس ىستەيتىن «اقىلدى» ايالدامالار.
«Almaty Startup City» جيىنىندا قاتارلاس وتكەن سەسسيالاردا «كاسىپكەر الەمدى قالاي جاۋلايدى؟», «شىعارماشىلىقتان بيزنەس جاساۋعا بولا ما؟», «100 ينجەنەرگە جانە 100 ۇيالى ونىمگە بارار جولدا», «ستۋدەنتكە قالاي ميلليون تابۋعا بولادى؟» دەگەن تاقىرىپتاردا بيزنەس-دارىستەر ءجۇردى.
ايناش ەسالي, «ەگەمەن قازاقستان».
الماتى
