قانات يسلام: كەلەسى كەزدەسۋىم اقش-تا وتەدى

قازاقستاندىق كاسىپقوي بوكسشى قانات يسلام جاراقاتى جايلى, سونداي-اق الداعى جوسپارلارى تۋرالى مالىمدەدى, دەپ حابارلادى vesti.kz «كاسىبي رينگكە ەكى قارسىلاس تا تەك جەڭىس ءۇشىن شىعادى. شارشى الاڭعا شىققاندا سەن ەشقاشان دا جالعىز ەمەسسىڭ. ساعان ءۇمىت ارتقان, تەك جەڭىس تىلەيتىن, بويىڭا ەرەكشە ءبىر كۇش بەرەتىن ۇلكەن ءبىر ەل تۇرادى. رينگكە مەن ىلعي دا جەڭىسكە جەتىپ, كوك تۋىمىزدى كەزەكتى رەت جەلبىرەتۋ ءۇشىن شىعامىن. بۇل ءۇشىن بويىمداعىنىڭ ءبارىن سالامىن. سوڭعى كەزدەسۋدە شامامەن ەكىنشى-ءۇشىنشى راۋندتا قولىمدى جاراقاتتاپ الدىم. قارسىلاسىڭا سوققى جاساعان كەزدە ءوز قولىڭدى جاراقاتتاپ الاتىن ساتتەر بوكستا ءجيى بولىپ تۇرادى. وسىدان كەيىن تاكتيكامىزدى بىردەن اۋىستىردىق. قارسىلاسىمدى تيتىقتاتىپ, ۇپاي بويىنشا جەڭۋدى كوزدەدىك. بۇل ماقساتىمىزعا جەتتىك تە. قازىر قولىم جازىلدى. كەلەسى جەكپە-جەككە دايىندالۋ ۇستىندەمىن», – دەدى قانات. حالىقتىڭ دەنساۋلىعىڭىزعا الاڭداۋشىلىق بىلدىرگەنى قانشالىقتى وڭ اسەرىن تيگىزدى دەگەن سۇراققا: «شىنى كەرەك, ءاربىر بوكسشىعا بۇكىل ەلى بولىپ, دەنساۋلىعىن ويلاسا, قوسىمشا كۇش بەرەدى. مەن تەك ءوزىمدى ويلاۋ ءۇشىن عانا بوكستا جۇرگەن جوقپىن. وسكەلەڭ ۇرپاققا تۋرا جول كورسەتسەم دەيمىن. ەگەر ءبىز ولارعا جول كورسەتپەسەك, باسقا كىم كورسەتەدى؟ سوندىقتان دا بەلگىلى ءبىر مەجەگە توقتاماۋىمىز كەرەك», – دەدى ول. سونىمەن قاتار, قانات رينگكە قاشان شىعاتىنىن دا ايتتى. «كەلەسى كەزدەسۋىم اقش-تا وتەدى. الداعى 10-15 كۇندە كىممەن قارسىلاساتىنىم جانە قاي كۇنى وتەتىنى بەلگىلى بولادى», – دەدى. استانا قالاسىنداعى ەكسپو كورمەسىندە جەكپە-جەك وتكىزۋ تۋرلى: "مادەنيەت جانە سپورت ءمينيسترى ارىستانبەك مۇحامەدي ۇلى شاقىرىپ, بوكس كەشىندە جۇدىرىقتاسۋ تۋرالى ۇسىنىس جاسادى. مەن كەلىستىم. بارىمىزگە بەلگىلى, حالىقارالىق كورمەگە كوپتەگەن تۋريستەر كەلەدى. ولارعا ءوزىمىزدىڭ جەتىستىكتەرىمىزدى, كوز تارتار عيماراتتارىمىزدى عانا ەمەس سپورتىمىزدى دا پاش ەتۋىمىز قاجەت. قازىر الەمدە قازاقستاندىق بوكسشىلارعا ۇلكەن سۇرانىس بار. ال ەلىمىزدە چەمپيون بولۋ ءۇشىن تىنباي جاتتىعىپ جۇرگەن كوپتەگەن ورەندەرىمىزدى بىلەمىن. مەنىڭشە, شەتەلدىكتەر ەكسپو كەزىندە بوكس كەشىنە قۋانا-قۋانا قاتىسادى", دەدى. ايتا كەتەيىك, 32 جاستاعى سپورتشى وسىعان دەيىن 22 كەزدەسۋ وتكىزىپ, بارلىعىندا جەڭىسكە جەتتى. سوڭعى تيتۋلدىق جەكپە-جەكتە گانالىق پاتريك اللوتەيدەن ۇپاي جاعىنان باسىم ءتۇستى ءارى قولىن جاراقاتتاپ الدى. بۇل جەتىستىگى ونى WBA رەيتينگىندە جوعارى كوتەرىلۋىنە مۇمكىندىك بەردى.