قازىرگى تاڭدا وبلىستا 5538 مەملەكەتتىك قىزمەتكەر بولسا, سونىڭ 7-ەۋى ساياسي, ال 19-ى «ا» كورپۋسىنىڭ جانە 5512-ءسى اكىمشىلىكتىك قىزمەتكەرلەرى ەكەن. مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ اقمولا وبلىسى بويىنشا دەپارتامەنتىنىڭ باسشىسى بەرگەن بەسپالينوۆ مەملەكەتتىك قىزمەتكەرلەردىڭ ورتاشا جاسى 39,2 جاس ەكەندىگىن تىلگە تيەك ەتە كەلىپ, ولاردىڭ قاتارىندا 29 ەتنوس وكىلى مەن 3486 ايەلدىڭ بار ەكەنىن العا تارتتى. شامامەن 4900 مەمقىزمەت جوعارى ءبىلىمدى بولسا, ورتاشا جۇمىس ءوتىلى 10,1 جىلدى قۇرايتىندىعىن دا ايتا كەتۋ كەرەك. مەملەكەتتىك قىزمەتكەرلەردى اتتەستاتتاۋ ماسەلەسى بويىنشا ءسوز ەتكەن دەپارتامەنت باسشىسى ءبىرتۇتاس وبلىستىق اتتەستاتتاۋدان كوميسسياسىنان 864 قىزمەتكەردىڭ سۇرىنبەي وتكەنىن, سونىڭ 77-ءسى ءوز قىزمەتتەرىنە لايىق, ءتىپتى لاۋازىمىن كوتەرۋ تۋرالى ۇسىنىس ەنگىزىلگەندىگىن جەتكىزدى. كەرىسىنشە, 9 قىزمەتكەر ءوز لاۋازىمىنا سايكەس ەمەس دەپ تابىلىپ, ولاردىڭ لاۋازىمدارىن تومەندەتۋ تۋرالى ۇسىنىس جاسالىپتى.
سونداي-اق, بريفينگتە ءسوز العان «اقمولا وبلىسى اكىمدىگى جانىنداعى مەملەكەتتىك قىزمەتشىلەردى قايتا دايىنداۋ جانە بىلىكتىلىگىن جەتىلدىرۋ ايماقتىق ورتالىعى» مەملەكەتتىك كوممۋنالدىق قازىناشىلىق كاسىپورنىنىڭ ديرەكتورى, اقمولا وبلىستىق ءماسليحاتىنىڭ دەپۋتاتى الىبەك بايماعامبەتوۆ ورتالىق اشىلعان 2005 جىلدان بەرى 13599 مەملەكەتتىك قىزمەتشى ءوز بىلىكتىلىكتەرىن ارتتىرعاندىعىن ايتتى. كەلتىرىلگەن مالىمەتتەرگە قاراعاندا, تەك 2016 جىلدىڭ وزىندە 914 مەملەكەتتىك قىزمەتشىنىڭ ورنىنا اتالعان ورتالىقتا 1356 ادام وقىتىلعان كورىنەدى. ال ۇستىمىزدەگى جىلدىڭ ءى توقسانىندا 303 مەملەكەتتىك قىزمەتشى ءوز بىلىكتىلىگىن جەتىلدىرىپتى.
جالپى, مەملەكەتتىك قىزمەتتەگىلەرگە قويىلاتىن تالاپتار دا جىل سايىن جەتىلدىرىلىپ, جاقسى دامىپ كەلە جاتقاندىعى دا ەرەكشە اتالدى.
اسقار تۇراپباي ۇلى,
«ەگەمەن قازاقستان»
اقمولا وبلىسى
